ပြည်သူပြေလည်ရင် အဆဲခံရလည်း ကျေနပ်ဟု ဦးသိန်းစိန် ပြော
DVB
·
March 20, 2016
ပြည်သူတွေ အစစအဆင်ပြေကြရင် အဆဲခံရတာ သူကျေနပ်ပါတယ်လို့ သမ္မတ ဦးသိန်းစိန်က ပူတာအိုမြို့ လူထုတွေ့ဆုံပွဲမှာ ပြောကြားခဲ့ကြောင်း မွေးမြူရေးနဲ့ ကျေးလက်ဖွံ့ဖြိုးရေးဝန်ကြီး ဦးအုန်းမြင့်ရဲ့ ဖေ့စ်ဘွတ်ခ်စာမျက်နှာမှာ ရေးသားဖော်ပြထားပါတယ်။
မတ်လ ၁၈ ရက် ကချင်ပြည်နယ်၊ ပူတာအိုမြို့၊ ဖုန်ကန်ရာဇီခန်းမမှာ ဦးသိန်းစိန်က ပြုပြင်ပြောင်းလဲမှုတွေအကြောင်း၊ ဖွံ့ဖြိုးတိုးတက်မှုတွေအကြောင်း.၊ ငြိမ်းချမ်းရေးဖြစ်စဉ်တွေအကြောင်း၊ ငါးနှစ်တာအတွင်းဆောင်ရွက်ခဲ့တာတွေ ပြောမဆုံးပါဘူး။ ဒါပေမယ့်လည်း ပြည်သူတွေထဲက ကျေနပ်ကြသူတွေ မကျေနပ်ကြသူတွေထဲက အဆိုးဝါးဆုံးတုံ့ပြန်မှုတခုက ကားတွေကြပ်လို့ အစိုးရကိုဆဲတာ မကြားဝံ့ မနာသာပါဘဲ။ ကျနော်ကတော့ ပြည်သူ့အသံကို နားစွင့်ရင်းအော်.,.ကားကြပ်တာ ကားတွေများလာလို့ ကားတွေများတာ ဝယ်စီးနိုင်ကြလို့၊ ဝယ်စီးနိုင်တာ စီးပွားရေး အဆင်ပြေလာလို့ ပြည်သူတွေ အစစအဆင်ပြေရင်အဆဲခံရတာကျေနပ်ပါတယ်လို့ ပြောခဲ့ကြောင်း ရေးသားဖော်ပြထားတာ ဖြစ်ပါတယ်။
ဝန်ကြီးဦးအုန်းမြင့်ရဲ့ ရေးသားဖော်ပြချက်အောက်မှာ ကောမန့်ဝင်ရေးတဲ့ မျိုးမင်း ဆိုသူက ကားကျပ်တာဟာ စီးပွားရေးပြေလည်လာလို့ ဆိုတဲ့အတွေးအခေါ်ထက် နည်းနည်း ပိုအဆင့်မြင့်မြင့်တွေးပါလို့ ၀င်ရေးထားတာလည်း တွေ့ရပါတယ်။
နိုင်ငံတော်သမ္မတရဲ့ ကချင်ပြည်နယ်ခရီးစဉ်အတွင်း မချမ်းဘောမြို့မှာ စေတီနှစ်ဆူကို ဘုရားထီးတော်တင်လှူခဲ့ပြီး ဒေသခံလူထုနဲ့ တွေ့ဆုံခဲ့တယ်လို့ ပြန်ကြားရေးဝန်ကြီးဌာနသတင်းမှာ ဖော်ပြပါတယ်။