ဗဟန်းမြို့နယ် ရွှေတောင်ကြား ၂ ရပ်ကွက်မှာ စည်ပင်သန့်ရှင်းရေးဝန်ထမ်းတွေက စွန့်ပစ်အမှိုက်တွေ သိမ်းဆည်းရာကနေ ခြောက်လုံးပြူးသေနတ်နဲ့ ကျည်ဆန်တွေ တွေ့ရှိခဲ့ပါတယ်။
စည်ပင်သန့်ရှင်းရေးဝန်ထမ်းတွေဟာ မတ် ၁၁ ရက်နေ့က ဗဟန်းမြို့နယ်၊ ရွှေတောင်ကြား(၂)ရပ်ကွက်၊ ရွှေတောင်ကြားလမ်း၊ ရပ်ကွက်အုပ်ချုပ်ရေးမှူးရုံးဘေးရှိ စည်ပင်အမှိုက်ပုံကနေ အမှိုက်တွေ ယာဉ်ပေါ်ကို တင်နေစဉ် အဖြူရောင်ပီနံအိတ်တလုံးကို တွေ့ရှိ စစ်ဆေးရာကနေ အခုလို တွေ့ရှိခဲ့တာလို့ ရန်ကုန်ရဲတပ်ဖွဲ့ ဖေ့စ်ဘွတ်ခ်စာမျက်နှာမှာ ဖော်ပြထားပါတယ်။
အိတ်အတွင်း စွန့်ပစ်အမှိုက်တွေနဲ့အတူ Smith & Wesson 32 အမျိုးအစား ခြောက်လုံးပြူး သေနတ် ၁ လက်၊ အသုံးမပြုရသေးတဲ့ ကျည် ၈ တောင့်နဲ့ အသုံးပြုပြီး ကျည် ၁ တောင့် အစိမ်းရောင်သေနတ်အိတ် ၁ ခုတို့ကို တွေ့ရှိခဲ့ပါတယ်။
အဲဒီ ခြောက်လုံးပြူး သေနတ်နဲ့ ခဲယမ်းတွေကို စည်ပင်တာဝန်ရှိသူတွေက ဗဟန်းမြို့မရဲစခန်းကို ပေးပို့ထားပြီး စုံစမ်းစစ်ဆေးနေတယ်လို့ သိရပါတယ်။
