အစိုးရအောင်ဘာလေထီဥပဒေပြဋ္ဌာန်ပြီးရင် လက်ရှိ ထီစနစ်အပြင် အီလက်ထရောနစ်ထီ (E-Lottery) ကိုပါ ကျင့်သုံးသွားမယ်လို့ ဘဏ္ဍာရေးဝန်ကြီးဌာန ဒုတိယ၀န်ကြီး ဒေါက်တာလင်းအောင်က ပြောပါတယ်။
ဇန်န၀ါရီ ၁၄ ရက်က ကျင်းပတဲ့ ပြည်ထောင်စုလွှတ်တော် အစည်းအဝေးမှာ ပြောကြားခဲ့တာပါ။
“အောင်ဘာလေထီစနစ်ရဲ့ အားနည်းချက်တွေက ထီဈေးနှုန်းတည်ငြိမ်ဖို့ ခက်ခဲတာ၊ ထီလက်မှတ်တွေ ရိုက်နှိပ်ရတာ၊ သယ်ယူ သိုလှောင်ဖြန့်ဝေရာမှာ ကုန်ကျစရိတ်များပြားတာတွေ ဖြစ်ပါတယ်” လို့ ဒုဝန်ကြီးက ပြောပါတယ်။
အောင်ဘာလေထီဥပဒေပြဋ္ဌာန်ပြီးရင် အိမ်နီးချင်းနိုင်ငံတွေမှာ ကျင့်သုံးနေတဲ့ E-Lottery စနစ်ကို ပြောင်းလဲ ဆောင်ရွက်ရင် တရားမ၀င်ထီထိုးတာတွေ ပျောက်သွားမယ့်အပြင် ထီဈေးကွက်တည်ငြိမ်လာမယ်လို့ သူက ဆိုပါတယ်။ လက်ပွေ့ရောင်းနေတဲ့ အခြေခံလူတန်းစားတွေ လုပ်ငန်းမပျက်စေဖို့အတွက် လက်ရှိ အောင်ဘာလေထီစနစ်ကိုလည်း ပူးတွဲဆောင်ရွက်သွားနိုင်မယ်လို့လည်း သူက ဆက်ပြောပါတယ်။
ဒီအတွက် နိုင်ငံတကာ ထီကျွမ်းကျင်ပညာရှင်ငှားရမ်းပြီး ပြည်တွင်း၊ ပြည်ပ ထီလုပ်ငန်းရှင်တွေကို တင်ဒါ ခေါ်ယူပြီး E-Lottery စနစ်ကို အကောင်အထည်ဖော်ဖို့ စီစဉ်နေတယ်လို့ ဒုဝန်ကြီးက ပြောပါတယ်။
လက်ရှိ အောင်ဘာလေ ထီစနစ်ကနေ နှစ်စဉ်နိုင်ငံတော်ဘဏ္ဍာငွေ ကျပ်သန်းပေါင်း ၃ သောင်း (ဘီလျံ ၃၀ ) လောက် ရနေတယ်လို့လည်း ပြောကြားခဲ့ပါတယ်။
