ဇန်န၀ါရီလ ၄ ရက်မနက် မြန်မာစံတော်ချိန် ၅ နာရီ ၃၅ မိနစ်၊ ၂၂ စက္ကန့်အချိန်မှာ မန္တလေးမြေငလျင်စခန်းမှ အနောက်မြောက်ဘက် မိုင် ၂၅၀ ခန့်အကွာ မြန်မာနိုင်ငံပြည်ပ အိန္ဒိယနိုင်ငံ မဏိပူဒေသကို ဗဟိုပြုပြီး အင်အားရစ်ခ်ျတာစကေး ၆.၈ အဆင့်ရှိ အင်အားပြင်း မြေငလျင်တစ်ခုလှုပ်သွားတယ်လို့ မိုးဇလဌာနက ထုတ်ပြန်ပါတယ်။

မြန်မာနိုင်ငံမှာလည်း ငလျင်ကြောင့် မြေတုန်ခါမှုတွေ ရှိခဲ့ပေမယ့် ထိခိုက်ပျက်စီးမှု သတင်းတွေတော့ မသိရသေးဘူးလို့ အထက်မြန်မာပြည် မိုးလေ၀သနဲ့ ဇလဗေဒ ညွှန်ကြားရေးမှူး ဦးကျော်လွင်ဦးက ဒီဗွီဘီကို ပြောပါတယ်။

ငလျင်ဒဏ်ကြောင့် အိန္ဒိယနိုင်ငံ အရှေ့မြောက်ပိုင်း အင်ဖာမြို့မှာတော့ အနည်းဆုံး သေဆုံးသူ ၆ ဦးရှိပြီး ဒဏ်ရာရသူ ၁၀၀ လောက် ရှိတယ်လို့ Times of India သတင်းမှာဖော်ပြပါတယ်။

ဘင်္ဂလားဒေ့ရ်ှနိုင်ငံမှာလည်း လူတချို့ ထိခိုက်သေဆုံးမှုရှိခဲ့သလို မြန်မာနိုင်ငံမှာလည်း စစ်ကိုင်းတိုင်း အပါအ၀င်ဒေသတချိုမှာ ငလျင်ဒဏ်ကို ဒေသခံတွေ သိရှိခံစားခဲ့ကြရပါတယ်။