ဂျာမနီနိုင်ငံ လိုက်ပ်ဇစ်မြို့မှာ ဒီမနက်အစောပိုင်း ကျင်းပတဲ့ ယူအီးအက်ဖ်အေ ကွန်းဖရင့်လိဂ် ဗိုလ်လုပွဲမှာ ခရစ္စတယ်ပဲလေ့စ်အသင်းက  ရာယိုဗယ်လကန်နိုကို ၁ ဂိုး - ဂိုးမရှိနဲ့ အနိုင်ရပြီး သမိုင်းတလျှောက် ပထမဆုံး ဥရောပဖလားကို ဆွတ်ခူးသွားပါတယ်။

ဒီပွဲမှာ ပဲလေ့စ်အတွက် တလုံးတည်းသော အနိုင်ဂိုးကို တိုက်စစ်မှူး မာတီတာက ဒုတိယပိုင်းမှာ သွင်းယူပေးခဲ့တာ ဖြစ်ပါတယ်။

အဒမ်ဝှာတန်ရဲ့ အဝေးကန်ချက်ကို ရာယိုဂိုးသမား ပုတ်ထုတ်လိုက်ရာကနေ ပြန်ကျလာတဲ့ ဘောလုံးကို မာတီတာက အနီးကပ် ပိတ်သွင်းခဲ့တာပါ။

ဒီနိုင်ပွဲကြောင့် ပဲလေ့စ်အသင်းဟာ လာမဲ့ရာသီမှာ ယူရိုပါလိဂ် ယှဉ်ပြိုင်ခွင့် ရရှိသွားပါတယ်။ ပဲလေ့စ်ကို ဥရောပဖလားအပြင် ပြီးခဲ့တဲ့ ၁၂ လအတွင်း အက်ဖ်အေဖလားနဲ့ ကွန်မြူနတီဒိုင်းတို့ ရယူပေးခဲ့တဲ့ နည်းပြ အိုလီဗာဂလက်စနာအတွက်လည်း ဒါဟာ ပြီးပြည့်စုံတဲ့ နှုတ်ဆက်ပွဲ ဖြစ်ခဲ့ပါတယ်။