ဧရာဝတီတိုင်း၊ ပုသိမ်မြို့နယ်မှာ ကိုဗစ်-၁၉ အတည်ပြုလူနာ ဖေဖော်ဝါရီလ အတွင်း ၃၇၉ ဦးအထိ ရှိလာတယ်လို့ စစ်ကောင်စီလက်အောက်ခံ ပုသိမ်မြို့နယ်အုပ်ချုပ်ရေးအဖွဲ့က ထုတ်ပြန်ထားပါတယ်။
ပုသိမ်မြို့အဝင် ကိုးဆူတိုးဂိတ်မှာ ခရီးသည်တွေကို အပူချိန်တိုင်းတာ၊ ရောဂါပိုးသံသယရှိ ခရီးသည်တွေကို ဖေဖော်ဝါရီ ၈ ရက်ကစပြီး Test Kit အခမဲ့စစ်ဆေးပေးနေတယ်လို့ မြို့ခံတွေက ပြောပါတယ်။
“မြို့အဝင်မှာ စစ်ဆေးတာတွေလုပ်တယ်၊ သူတို့ mask ဝေတာတွေတော့ လုပ်တယ်။ လူအစုအပြုံလိုက်ဖြစ်နေတာမျိုး ထိန်းချုပ်တာ မကြားပါဘူး။ ဖေဖော်ဝါရီထဲ အားကစားပွဲတွေ လုပ်ခဲ့တယ်၊ ကျောင်းတွေ ဖွင့်နေတာပဲ” လို့ ပုသိမ်မြို့ခံတစ်ဦးက ပြောပါတယ်။
ပုသိမ်မြို့မှာ ဖေဖော်ဝါရီ ၁၆ ရက်နေ့က အိုမီခရွန် ရောဂါပိုးတွေ့သူ ၄၈ ဦး၊ ၁၇ နေ့က ၅၁ ဦးထိ ပိုးတွေ့သူများပြားခဲ့ပြီး ဖေဖော်ဝါရီ ၂၀ ရက်နေ့ကတော့ ၁၆ ဦးသာ တွေ့ရှိခဲ့တယ်လို့ မြို့နယ်အုပ်ချုပ်ရေးအဖွဲ့က သိရပါတယ်။
ဧရာ၀တီတိုင်းအတွင်း မြို့နယ်တွေမှာ မြို့အဝင် ကိုဗစ်စစ်ဆေးရေးဂိတ်တွေ ထားပြီး စစ်ဆေးနေပါတယ်။
နိုင်ငံတဝန်းမှာတော့ ကိုဗစ်-၁၉ အတည်ပြုလူနာသစ် ၃,၀၀၀ ကျော် သုံးရက်ဆက်တိုက် စံချိန်တင် တွေ့ရှိခဲ့ပြီးနောက်မှာ ကူးစက်ခံရသူပေါင်း ၅၆၅,၆၆၇ ယောက်ရှိခဲ့ပြီလို့ စစ်ကောင်စီ ကျန်းမာရေးဝန်ကြီးဌာနက ဖေဖော်ဝါရီ ၂၀ ရက်ညမှာ ထုတ်ပြန်ထားပါတယ်။