ရှမ်းပြည်မြောက်ပိုင်း မူဆယ်ခရိုင်မှာ ရွှေလီမြစ်ဝှမ်းဒေသ ပြည်သူ့ကာကွယ်ရေးတပ်ဖွဲ့စည်းလိုက်ကြောင်း နိုင်ငံရေးဦးဆောင်ကော်မတီ စစ်ဆင်ရေးနဲ့စည်းရုံးရေးဌာနက ၂၀၂၁ ဇွန်လ ၁၉ ရက်နေ့စွဲနဲ့ ထုတ်ပြန်ကြေညာပါတယ်။
ပြည်သူ့ကာကွယ်ရေးတပ်ဖွဲ့ (ရွှေလီမြစ်ဝှမ်းဒေသ) ဟာ ဌာနေတိုင်းရင်းသားပေါင်းစုံနဲ့ စုပေါင်းတည်ထောင်ထားပြီး တိုင်းရင်းသားတွေရဲ့ မူလကိုယ်ပိုင်ပြဌာန်းခွင့်များအရ မိမိတို့ကြမ္မာကို မိမိတို့ဖန်တီးနိုင်တဲ့ စစ်မှန်တဲ့ဖက်ဒရယ်ဒီမိုကရေစီပြည်ထောင်စုကို တည်ထောင်နိုင်ဖို့ ဝိုင်းဝန်းကြိုးပမ်းဆောင်ရွက်သွားမယ်လို့ ဆိုပါတယ်။
သူတို့တပ်ဖွဲ့အနေနဲ့ တိုင်းရင်းသားပေါင်းစုံ၊ လူထုလူတန်းစားအလွှာပေါင်းစုံရဲ့ အကျိုးစီးပွား ထိခိုက်မှုမဖြစ်ပေါ်စေရေး အထူးဂရုစိုက်ပြီး မတရားဖိနှိပ်အနိုင်ကျင့်နေတဲ့ စစ်အာဏာရှင်တွေရဲ့ မဟာလူမျိုးကြီးဝါဒီတွေကို ဘုံရန်သူအဖြစ် ဆန့်ကျင်တိုက်ပွဲဝင်သွားမယ်လို့ ဖော်ပြထားပါတယ်။
ဒါ့အပြင် စစ်အာဏာရှင်လမ်းစဉ်မှန်သမျှကို အဆုံးစွန်လက်တွဲ တိုက်ပွဲဝင်သွားမှာဖြစ်ပြီး မျိုးဆက်အသီးသီးက တတ်သိပညာရှင်တွေ၊ တိုက်ပွဲဝင်လူငယ်မျိုးဆက်သစ်တွေ၊ နိုင်ငံတကာ ရောက် တက်ကြွလှုပ်ရှားသူတွေနဲ့ ဟန်ချက်ညီညီ ချိတ်ဆက်လှုပ်ရှားမယ့် လွတ်လပ်တဲ့ တော်လှန်ရေးအင်အားစုတစ်ရပ်အဖြစ် ရပ်တည်သွားမယ်လို့ ဆိုပါတယ်။
အမျိုးသားညီညွတ်ရေးအစိုးရ၊ ပြည်ထောင်စုလွှတ်တော်ကိုယ်စားပြုကော်မတီတို့နဲ့ ဘုံရပ်တည်ချက် လုပ်ငန်းစဉ်တွေ တူညီပေမယ့် လတ်တလော နယ်မြေနဲ့တိုင်းရင်းသားများ အကျိုးစီးပွားဆိုင်ရာ ကိစ္စရပ်တွေကြောင့် လက်တွဲဆောင်ရွက်နိုင်ခြင်းမရှိသေးကြောင်း၊ ပြည်သူ့ကကွယ်ရေးတပ်ဖွဲ့ ( ရွှေလီမြစ်ဝှမ်းဒေသ) ဟာ ကောင်းမွန်တဲ့ စုဖွဲ့တည်ဆောက်မှု၊ မြန်ဆန်တဲ့လုပ်ငန်းစဉ်တွေနဲ့ စစ်အာဏာရှင်တော်လှန်ရေး ပြည်သူလူထုတရပ်လုံးရဲ့ လူမှုစီးပွားဘဝ ကာကွယ်စောင့်ရှောက်ရေးအတွက် စတင်တော်လှန်တိုက်ပွဲဝင်တော့မယ်လို့ ထုတ်ပြန်ချက်မှာ ဖော်ပြထားပါတယ်။
မူဆယ်ခရိုင်ထဲမှာ စစ်ကောင်စီတပ်ဖွဲ့အပြင် ဌာနေပြည်သူ့စစ်တွေ၊ KIA / TNLA / SSPP/ RCSS စတဲ့လက်နက်ကိုင်အဖွဲ့တွေလည်း လှုပ်ရှားနေပါတယ်။