မင်းလှမြို့နယ် စစ်အာဏာရှင်ဆန့်ကျင်ရေးဆန္ဒပြပွဲမှာ ဦးဆောင်ပါဝင်လှုပ်ရှားနေသူအချို့ရဲ့ နေအိမ်တွေကို စစ်တပ်က ၁၀ ရက်နေ့ ညပိုင်းနဲ့ ၁၁ ရက်နေ့ မနက် အစောပိုင်းတွေမှာ လာရောက်ရှာဖွေမေးမြန်းတာ တွေရှိခဲ့တယ်လို့ ပါဝင်လှုပ်ရှားသူတွေရဲ့ မိသားစုအချို့က ပြောပါတယ်။
မင်းလှမြို့နယ် ရွေးကောက်ပွဲကော်မရှင်ဥက္ကဋ္ဌကိုတော့ မနေ့ညက ဖမ်းဆီးခေါ်ဆောင်သွားတယ်လို့ သိရပါတယ်။
လာရောက်ရှာဖွေရာမှာ ပါဝင်လှုပ်ရှားသူတွေ အိမ်မှာမရှိတဲ့အတွက် ဖမ်းဆီးခေါ်ဆောင်သွားခြင်း မရှိသေးဘူးလို့ မိသားစုအချို့ကပြောပါတယ်။
ပဲခူးတိုင်း၊ သာယာဝတီခရိုင်၊ မင်းလှမြို့နယ်က ပြည်သူတွေ စစ်အာဏာရှင်ဆန့်ကျင်ရေး ငြိမ်းချမ်းစွာ ဆန္ဒပြခဲ့တာဟာ ဒီနေ့နဲ့ဆို ငါးရက်မြောက်နေ့ရှိလာပြီဖြစ်ပါတယ်။
မြို့နယ်တစ်ဝန်းက ပြည်သူတွေ၊ ကျန်းမာရေးနဲ့ ပညာရေးဝန်ထမ်းတွေအပြင် ဌာနဆိုင်ရာ ဝန်ထမ်းအချို့နဲ့ တောင်သူလယ်သမားအချို့ကလည်း လယ်ထွန်စက်တွေနဲ့ စစ်အာဏာရှင်ဆန့်ကျင်ရေး ပါဝင်လာတာကိုတွေ့ရပါတယ်။
မင်းလှမြို့နယ်မှာ စစ်အာဏာရှင်ဆန့်ကျင်ရေးဆန္ဒပြသူတွေဟာ မင်းလှမြို့တွင်းမှာ တစ်ဖွဲ့၊ မင်းလှမြို့နယ် စစ်ကွင်းမြို့မှာတစ်ဖွဲ့ အဖွဲ့နှစ်ဖွဲ့ခွဲပြီး မနက် ၈ ခွဲကစတင်ကာ မြို့အတွင်း လူစည်ကားရာလမ်းမပေါ်တွေမှာ ငြိမ်းချမ်းစွာ လှည့်လည်ဆန္ဒပြပြီး ၁၁ နာရီအချိန်လောက်မှာ လူစုခွဲခဲ့ကြပါတယ်။
စစ်အာဏာရှင်ဆန့်ကျင်ရေးဆန္ဒပြသူတွေကို ရဲတပ်ဖွဲ့က ပိတ်ဆို့ဖမ်းဆီးထားခြင်းမရှိပဲ မင်းလှမြို့ ဈေးချိုတန်းလမ်းတစ်ခုကိုပဲ ရဲတပ်ဖွဲ့အင်းအားအနည်းငယ်နဲ့ ပိတ်ဆို့ထားပါတယ်။
သက်နိုင်ဝင်း
