အောင်လံမြို့နယ်၌  ရန်ကုန်ပြန် အမျိုးသား ၁ဦး ကိုဗစ်-၁၉ ကူးစက်ခံရ

မကွေးတိုင်းဒေသကြီး၊ အောင်လံမြို့နယ်မှာ ရန်ကုန်ကပြန်လာတဲ့ အမျိုးသားတစ်ဦး စက်တင်ဘာ ၂၄ ရက် ညပိုင်းက ကိုဗစ်-၁၉  ကူးစက်ခံရတယ်လို့ တိုင်းဒေကြီး ပြည်သူ့ကျန်းမာရေးဦးစီးဌာနကနေ သိရပါတယ်။ မကွေးတိုင်း ပြည်သူ့ကျန်းမာရေးဦးစီးဌာန လက်ထောက်ညွှန်ကြားရေးမှူး ဒေါက်တာခင်မောင်သန်းက "အောင်လံမြို့နယ် ပြလို့ကျေးရွာ Quarantine စင်တာမှာ Facility Quarantine ပြုလုပ်ထားတဲ့ အသက် ၂၀ နှစ်အရွယ် ရန်ကုန်ကပြန်လာတဲ့ အမျိုးသားတစ်ဦးကို နှာခေါင်းတို့ဖတ် အာခေါင်တို့ဖတ်တွေရယူပြီး ဓာတ်ခွဲနမူနာ ပေးပို့စစ်ဆေးရာမှာ ကိုဗစ်-၁၉ ရောဂါပိုး တွေ့ရှိခဲ့တာဖြစ်တယ်”လို့ ဒီဗွီဘီကို ပြောပါတယ်။ အဲဒီအတည်ပြုလူနာဟာ အောင်လံမြို့နယ် ထောက်ကြံ့တိုင် ကျေးရွာဇာတိဖြစ်ပြီးတော့ အောင်လံမြို့နယ်ပြည်သူ့ဆေးရုံမှာ သီးခြားကုသပေးမှာဖြစ်ကာ လူနာနဲ့ဆက်စပ်တဲ့သူတွေကို ဖော်ထုတ်ပြီး ဓာတ်ခွဲနမူနာပေးပို့စစ်ဆေးသွားမယ်လို့ ဆိုပါတယ်။ ဒါ့အပြင် စက်တင်ဘာ ၂၄ ရက် နေ့လယ်ပိုင်းက နတ်မောက်မြို့နယ်နဲ့ မြို့သစ်မြို့နယ်က အတည်ပြုလူနာနှစ်ဦးကို ကျန်းမာရေးကောင်းမွန်တဲ့ အတွက် ဆေးရုံဆင်းခွင့်ပြုလိုက်ပြီး Quarantine စင်တာမှာ ၇ ရက်ထားရှိမှာဖြစ်ပါတယ်။ မကွေးတိုင်းမှာ လက်ရှိအချိန်ထိ ကိုဗစ်-၁၉ အတည်ပြုလူနာ ၂၉ ဦး တွေ့ရှိထားပြီး ၃ ဦးရောဂါပိုးကင်းစင်ကာ ၇ ဦးဆေးရုံဆင်းခွင့်ရရှိပြီလို့ တိုင်းဒေသကြီး ပြည်သူ့ ကျန်းမာရေးဦးစီးဌာန ကနေ သိရပါတယ်။ သတင်း-မင်းထီး

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up