သေနတ်ဖောက် ငွေကြေးတောင်းခံသည့် နယ်ခြားစောင့် တပ်ဖွဲ့ဝင် ၂ ဦးကို အရေးယူ
DVB
·
August 11, 2018
အာရှလမ်းမကြီးပေါ်မှာ ခရီးသွားပြည်သူတွေ အထိတ်တလန့်ဖြစ်အောင် သေနတ်ဖောက်ပြီး ငွေကြေးတောင်းခံခဲ့တဲ့ နယ်ခြားစောင့် တပ်ဖွဲ့ဝင်နှစ်ဦးကို စစ်စည်းကမ်းနဲ့ အရေးယူလိုက်ပြီလို့ နယ်ခြားစောင့်တပ်၊ ဗဟိုအကြံပေးနှင့်ကွပ်ကဲရေးအဖွဲ့၊ ဗိုလ်မှူး ဇော်လင်းက သြဂုတ် ၁ဝ ရက် ညနေ့ ၅ နာရီက ဒီဗွီဘီကို ပြောပါတယ်။
နယ်ခြားစောင့်တပ်၊ အမှတ် ၃ ဗဟိုအကြံပေးနှင့်ကွပ်ကဲရေးအဖွဲ့၊ ဗိုလ်မှူး ဇော်လင်းက “ကျနော်တို့ BGF တပ်က တပ်ဖွဲ့ဝင်ဖြစ်တဲ့အတွက် တပ်ရဲ့စစ်စည်းကမ်း ဥပဒေအတိုင်း အရေးယူထားတယ်။ စစ်သားဆိုတော့ ပြဿနာ တစုံတရာဖြစ်လာရင် တပ်ရဲ့ ဥပဒေနဲ့ပဲ ပြန်လည်အရေးယူရတယ်။ တပ်ရဲ့ စည်းကမ်းကိုချိုးဖောက်ရင် သတ် မှတ်ထားတဲ့ စည်းမျဉ်းအတိုင်း အပြစ်ဒဏ်ခံရမယ်” လို့ ပြောပါတယ်။
သြဂုတ် ၉ ရက်နေ့ မနက် ၄ နာရီက ဘားအံ-မြဝတီသွား အာရှလမ်းမကြီးအနီး ရင်ကွဲတောင်နဲ့ ၁ မိုင်ခန့်အကွာမှာ အမှတ် ၁ဝ၂၂ တပ်ရင်းက တပ်သားအဆင့်ရှိ ဇော်ကြီးနဲ့ ချာတိတ်(ခ) အေးစန်းတို့က အေကေ-၄၇၊ အမ်-၁၆ တို့ကို ၁ လက်စီ ကိုင်ဆောင်ပြီး ကွမ်း၊ ဆေးလိပ်ဖိုး ငွေတောင်းခံဖို့ မျက်နှာကို ပုဆိုးစည်းကာ မြဝတီမြို့ကိုထွက်ခွာလာတဲ့ မော်တော်ယာဉ်တွေကို လက်နက်ပြ ငွေတောင်းခံခဲ့တာပါ။
အဲဒီလို ငွေတောင်းရာမှာ မရပ်ပေးခဲ့တဲ့အတွက် သေနတ် ၂ ချက်ပစ်ဖောက် တားဆီးရာ မှန်လုံယာဉ်ရဲ့ ညာဘက်နောက်ကြည့်မှန်ကို ထိမှန်ခဲ့ပေမယ့် ခရီးသည်တွေကို ထိခိုက်မှုမရှိခဲ့ဘူးလို့ တာဝန်ရှိသူက ပြောပါတယ်။
တပ်မတော် ကာကွယ်ရေးဦးစီးချုပ်က တပ်မတော်သားတွေ ဥပဒေချိုးဖောက်ရင် လုံးဝလက်မခံသလို လက်နက်ကိုင်အဖွဲ့အစည်းမှာ စည်းကမ်းဖောက်ဖျက်ရင် ပြင်းထန်စွာ အရေးယူနေတယ်လို့ ဘားအံမြို့၊ ရေဘေးသင့် ပြည်သူတွေနဲ့ တွေ့ဆုံစဉ်က ပြောကြားခဲ့ပါသေးတယ်။
ရဲမင်းခေါင်
