ချင်းပြည်နယ်၊ ကန်ပက်လက်မြို့ကို စစ်ကောင်စီတပ်က မတ် ၁ ရက်က စပြီး လေကြောင်းတိုက်ခိုက်တာတွေ ဆက်တိုက်ပြုလုပ်ခဲ့တာကြောင့် ပြည်သူ ၂ ယောက် ဒဏ်ရာရရှိခဲ့သလို ဌာနဆိုင်ရာရုံးတွေနဲ့ လူနေအိမ်အများအပြား ထိခိုက်ပျက်စီးခဲ့တယ်လို့ ကန်ပက်လက်မြို့နယ်၊ လူသားစာနာဘေးစီမံဌာနက ဧပြီ ၃ ရက်မှာ သတင်းထုတ်ပြန်ပါတယ်။

ကန်ပက်လက်မြို့နယ်၊ လူသားစာနာဘေးစီမံဌာနရဲ့ တာဝန်ခံက “စစ်တပ်ဘက်က ဂျက်ဖိုက်တာသုံးပြီး ကန်ပက်လက်မြို့ပေါ်နဲ့ မြို့နယ်ထဲကို ၂ ရက်ဆက်တိုက် ဗုံးတွေအများကြီး ကြဲချ တိုက်ခိုက်ခဲ့တာပါ။ ၁၀ လုံးထက်တော့ မနည်းပါဘူး။ မြို့ပေါ်က လူနေအိမ်တွေနဲ့ ဌာနဆိုင်ရာရုံးတွေ အများကြီး ထိခိုက်ပျက်စီးသွားပါတယ်။ ပြည်သူ ၂ ဦးလည်း မစိုးရိမ်ရတဲ့ ဒဏ်ရာတွေ ရရှိခဲ့ကြပါတယ်” လို့ ပြောပါတယ်။

စစ်ကောင်စီတပ်ဟာ ဧပြီ ၁ ရက် မနက် ၁၀ နာရီကျော်မှာ ကန်ပက်လက်မြို့နယ်ထဲက လွန်ဒုံးကျေးရွာကို ဗုံးကြဲတိုက်ခိုက်ခဲ့သလို ဧပြီ ၂ ရက် နေ့လယ် ၂ နာရီဝန်းကျင်မှာလည်း ကန်ပက်လက်မြို့ကို ၂ ကြိမ်တိုင်တိုင် ထပ်မံဗုံးကြဲတိုက်ခိုက်ခဲ့တာ ဖြစ်တယ်လို့ ဆိုပါတယ်။

CDF ကန်ပက်လက်ရဲ့ ပြောရေးဆိုခွင့်ရှိသူ Stephen Shing Thang က “ကျနော်တို့ဟာ ကန်ပက်လက်မြို့ကို ထိန်းချုပ်ထားနိုင်ပေမဲ့ အခုလို တိုက်ခိုက်လာမယ့် သူတို့ စစ်ကောင်စီရဲ့ လေကြောင်းရန်ကို စိုးရိမ်ကြလို့ ပြည်သူအများစုကတော့ ပြန်မလာကြသေးဘူး။ SAC ဘက်က ထိုးစစ်တွေ ပြန်လာလိမ့်မယ်လို့ ယူဆရတယ်။ လွတ်မြောက်ပြီးသားနယ်မြေ ပြန်ဆုံးရှုံးရင် ပြည်သူတွေ ၃၊ ၄ ဆ နစ်နာကြမယ်။ ပြည်သူပိုင်အဆောက်အအုံတွေ ပိုပြီးပျက်စီးမယ်။ အဲဒါကြောင့်မို့ သူတို့ဘက်က ကြီးမားတဲ့ထိုးစစ် ပြန်ဆင်မလာခင် တပ်တည်ဆောက်မှုကို အရင်ကထက်ပိုပြီး စနစ်ကျဖို့လိုတယ်။ ဘယ်လောက်ကြီးမားတဲ့ ထိုးစစ်ကြီးဖြစ်ဖြစ် လွတ်မြောက်ပြီးသားနယ်မြေတွေ ထိန်းသိမ်းကာကွယ်နိုင်ဖို့ လိုအပ်တဲ့ တပ်တည်ဆောက်မှုနဲ့ မဟာမိတ်ဆက်ဆံရေးကို ပိုမိုမြှင့်တင်ကြဖို့ တိုက်တွန်းလိုပါတယ်” လို့ကို ပြောပါတယ်။

အဆိုပါ ဗုံးကြဲတိုက်ခိုက်မှုတွေကြောင့် ကန်ပက်လက်မြို့က ထွေ/အုပ်ရုံး အဆောက်အအုံ ၈ လုံး အပါအဝင် ခေါ်နူးစုမ်ရိပ်သာတလုံး၊ ကျေးလက်ဦးစီးမှူးရုံး ၂ လုံး၊ မြို့နယ်ရွေးကောက်ပွဲ ကော်မရှင်ရုံး တလုံး၊ မြို့နယ် စစစ ရုံး တလုံး၊ မြို့နယ်စီမံကိန်းရုံး ၂ လုံးနဲ့ လူနေအိမ် ၅ လုံးထက်မနည်း ပျက်စီးခဲ့တာကြောင့် ပျက်စီးသွားတဲ့ အဆောက်အအုံ ၂၀ ကျော် ရှိခဲ့တယ်လို့လည်း ဆိုပါတယ်။

စစ်ကောင်စီတပ်ဟာ ကန်ပက်လက်မြို့ပေါ်နဲ့ မြို့နယ်အတွင်းက ကျေးရွာတွေကို လေကြောင်းတိုက်ခိုက်တာတွေ ဆက်တိုက်ပြုလုပ်နေတဲ့အတွက်​ ပြည်သူတွေအနေနဲ့ စစ်ကောင်စီတပ်ရဲ့ လေကြောင်းရန်ကို အထူးသတိထားဖို့ လိုတယ်လို့လည်း ကန်ပက်လက်မြို့နယ်၊ ပြည်သူ့အုပ်ချုပ်ရေးအဖွဲ့က သတိပေး ထုတ်ပြန်ထားပါတယ်။

မတ်လ ၂၈ ရက်မှာ လှုပ်ခတ်သွားတဲ့ ငလျင်ဒဏ်သင့် ပြည်သူတွေကို အရေးပေါ် ကယ်ဆယ်ရေးလုပ်ငန်းတွေ ဆောင်ရွက်နိုင်ဖို့ ငလျင်ဘေးသင့်တဲ့ ဒေသတွေက ပြည်သူ့ကာကွယ်ရေးတပ်ဖွဲ့တွေ အနေနဲ့ မိမိကိုယ်ကို ခုခံကာကွယ်စစ်မှတပါး ထိုးစစ်အားလုံးကို မတ်လ ၃၀ ရက်က စတင်ပြီး ၂ ပတ်ကြာ ရပ်နားထားမှာဖြစ်တယ်လို့ အမျိုးသားညီညွတ်ရေးအစိုးရက မတ် ၃၀ ရက်မှာ ထုတ်ပြန်ထားပါတယ်။

အာဏာသိမ်း စစ်ကောင်စီတပ်ဘက်ကလည်း ငလျင်ဒဏ်ကြောင့် ထိခိုက်ခံစားနေရတဲ့ တနိုင်ငံလုံးက ပြည်သူလူထုတွေကို စာနာထောက်ထား နားလည်ပြီး ကူညီကယ်ဆယ် ပြန်လည်ထူထောင်ရေး လုပ်ငန်းတွေကို အရှိန်အဟုန်နဲ့ ဆောင်ရွက်နိုင်စေဖို့နဲ့ တည်ငြိမ်အေးချမ်းရေးကို ရှေးရှုပြီး ၂၀၂၅ ခုနှစ်၊ ဧပြီ ၂ ရက်ကနေ ၂၂ ရက်နေ့အထိ ယာယီပစ်ခတ်တိုက်ခိုက်မှု ရပ်စဲရေးကာလအဖြစ် သတ်မှတ်ထားတယ်လို့ စစ်ကောင်စီတပ်ဘက်ကလည်း ထုတ်ပြန်ကြေညာထားပါတယ်။

စစ်ကောင်စီတပ်ဟာ အဲဒီလို အပစ်အခတ်ရပ်စဲ​တယ်လို့ ကြေညာထားခဲ့ပေမဲ့လည်း ဧပြီ ၂ ရက်နဲ့ ၃ ရက်နေ့မှာ မန္တလေးတိုင်း၊ တောင်သာမြို့နယ်၊ စစ်ကိုင်းတိုင်းအတွင်းက ဟုမ္မလင်းမြို့နယ်နဲ့ ကနီမြို့ထဲက ကျေးရွာတွေကို ဂျက်ဖိုက်တာအပြင် စက်တပ်လေထီးတွေနဲ့ပါ ဗုံးကြဲတိုက်ခိုက်ခဲ့လို့ စာသင်ကျောင်းနဲ့ လူနေအိမ်တွေ ထိခိုက်ပျက်စီးသွားတဲ့အတွက် စစ်ကောင်စီတပ်ရဲ့ ကြေညာချက်ဟာ လီဆယ်လှည့်ဖြားမှုသာ ဖြစ်တယ်လို့ NUG က ဧပြီ ၃ ရက်မှာ ထုတ်ပြန်ပါ တယ်။