မြန်မာနိုင်ငံအတွင်း ငလျင်ဒဏ်သင့်ဒေသတွေက ဆေးရုံတွေမှာ ဒဏ်ရာရရှိသူတွေရဲ့ များပြားလှတဲ့ လိုအပ်ချက်တွေကို ကိုင်တွယ်ဖြေရှင်းဖို့အတွက် ကမ္ဘာ့ကျန်းမာရေးအဖွဲ့ (WHO) ဟာ ရွေ့လျားဆေးဘက်ဆိုင်ရာတဲတွေ၊ ခွဲစိတ်ကုသရေးအိတ်တွေနဲ့ အရေးကြီးဆေးဝါးတွေ အပါအဝင် တန်ချိန် ၆၀ ကျော်ရှိတဲ့ အရေးပေါ်ဆေးဘက်ဆိုင်ရာပစ္စည်းတွေကို ပို့ဆောင်ပေးနေတယ်လို့ ထုတ်ပြန်ပါတယ်။

လူနာစိစစ်ရေးနဲ့ ကုသရေးဇုန်တွေ၊ လူနာဝန်ပိဆေးရုံတွေရဲ့ ယာယီချဲ့ထွင်မှုတွေအနေနဲ့ အသုံးပြုဖို့ရည်ရွယ်ပြီး မန္တလေးနဲ့ နေပြည်တော်တို့မှာလည်း ယာယီတဲတွေ တပ်ဆင်နေတယ်လို့ ဆိုပါတယ်။

မန္တလေးမှာရှိတဲ့ WHO အရေးပေါ်အဖွဲ့ဝင်တယောက်က “ဒီယာယီတဲတွေကတော့ ငလျင်ဒဏ်ကြောင့် အရိုးကျိုး၊ ထိတ်လန့်မှုနဲ့ တခြားအထွေထွေဒဏ်ရာရသွားတဲ့ လူနာတွေကို ကုသပေးနိုင်မှာဖြစ်ပါတယ်။ ဒါ့အပြင် ငလျင်ဒဏ်ကြောင့် ပျက်စီးဆုံးရှုံးသွားတဲ့၊ တစိတ်တပိုင်း ပြိုလဲသွားတဲ့ ကျန်းမာရေးအဆောက်အအုံတွေအစား ကျန်းမာရေးစောင့်ရှောက်မှုတွေ ပေးနိုင်မှာ ဖြစ်ပါတယ်” လို့ ပြောပါတယ်။

အခြေခံအဆောက်အအုံတွေ ပျက်စီးမှုနဲ့ လူနာတွေ အလျင်အမြန် တိုးပွားလာတဲ့အတွက် အထိခိုက်ဆုံး ဒေသတွေမှာ ကျန်းမာရေးစောင့်ရှောက်မှုရရှိဖို့ ခက်ခဲနေပြီး အလေးပေး ဆောင်ရွက်လျက်ရှိတယ်လို့လည်း WHO က ဆိုပါတယ်။

မတ်လ ၂၈ ရက်က မြန်မာနိုင်ငံအလယ်ပိုင်းမှာ လှုပ်ခတ်ခဲ့တဲ့ ရစ်ချ်တာစကေး ၇ ဒသမ ၇ ပြင်းအားရှိ ငလျင်ကြောင့် ထောင်နဲ့ချီတဲ့ ပြည်သူတွေဟာ ဒဏ်ရာကုသမှု၊ ခွဲစိတ်ကုသမှုနဲ့ ရောဂါဖြစ်ပွားမှုတွေအတွက် အရေးပေါ်အထောက်အပံ့တွေ လိုအပ်နေပါတယ်။