၂၀၁၅ နိုဝင်ဘာ ၈ ရက်မှာ ကျင်းပတဲ့ အထွေထွေရွေးကောက်ပွဲမှာ NLD က သောင်ပြိုကမ်းပြို   နိုင်ပါတယ်။ အဲဒီရွေးကောက်ပွဲရလဒ်အရ ၁-၂-၂၀၁၆ မှာ NLD ပြည်ထောင်စုလွှတ်တော် ပေါ်လာပါတယ်။ အဲဒီလွှတ်တော်ကတဆင့် ၃၀-၃-၂၀၁၆ မှာ NLD အစိုးရ ပေါ်လာပါတယ်။ အစိုးရသက်တမ်းက ၃၀-၃-၂၀၁၆ က ၂၉-၃-၂၀၂၁ အထိ ၅ နှစ်တိတိ ဖြစ်ပါတယ်။

၁-၂-၂၀၂၁ မှာ စစ်တပ်က နိုင်ငံတော်အာဏာကို သိမ်းယူလိုက်ပါတယ်။ အဲဒီအချိန်မှာ NLD အစိုးရရဲ့ သက်တမ်းက ၂ လနီးပါး ကျန်ပါသေးတယ်။ ဒါကြောင့် စစ်တပ်က NLD အစိုးရ   လက်ထဲက နိုင်ငံတော်အာဏာကို သိမ်းယူလိုက်တာဖြစ်တယ်လို့ ဆိုရမှာပါ။ အဲဒီတော့ အဲသလို အာဏာသိမ်းလိုက်ချိန်မှာ NLD က dejure အစိုးရ၊ အာဏာသိမ်းစစ်ကောင်စီ (စကစ) က defacto အစိုးရဆိုပြီး မြန်မာနိုင်ငံမှာ အစိုးရနှစ်ခု ရှိနေတဲ့အသွင် ဆောင်နေခဲ့ပါတယ်။

၅-၂-၂၀၂၁ မှာ ၂၀၂၀ ရွေးကောက်ပွဲ အနိုင်ရ ပြည်ထောင်စုလွှတ်တော်ကိုယ်စားလှယ် အများစုကြီးရဲ့ ထောက်ခံသဘောတူညီမှုနဲ့ CRPH ပေါ်လာပါတယ်။ CRPH က စစ်တပ်အာဏာသိမ်းမှုကို ဆန့်ကျင်တဲ့ ၂၀၂၀ ရွေးကောက်ပွဲအနိုင်ရ ပြည်ထောင်စုလွှတ်တော်ကိုယ်စားလှယ်များ၊ နိုင်ငံရေးပါတီများ၊ CDM နဲ့ သပိတ်အင်အားစုများ၊ EAO များ၊ အခြား ပါဝင်သင့် ပါဝင်ထိုက်သူများဆိုတဲ့ အစုအဖွဲ့ ၅ ခုမှ ကိုယ်စားလှယ်တွေနဲ့   NUG ကို ဖွဲ့စည်းကြောင်း ၁၆-၄-၂၀၂၁ မှာ ကြေညာချက်ထုတ်ပြန်ခဲ့ပါတယ်။ ဒီတော့ အခုလက်ရှိ မြန်မာနိုင်ငံမှာ ကိုယ့်ကိုယ်ကိုယ် အစိုးရအဖွဲ့လို့ ကြေညာပြောဆိုထားတဲ့ အင်စတီကျူးရှင်း ၃ ခု ရှိနေတာကို တွေ့မြင်ကြရမှာ ဖြစ်ပါတယ်။

ဒါပေမဲ့ NUG က NLD အစိုးရ ခေါင်းဆောင်တွေဖြစ်ကြတဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ သမ္မတ ဦးဝင်းမြင့်တို့ကို မူလရာထူးတာဝန်များအတိုင်း မိမိတို့ အစိုးရအဖွဲ့ရဲ့ ခေါင်းဆောင်များအဖြစ် တရားဝင် သတ်မှတ်ထားပါတယ်။ အဲဒါရဲ့ အဓိပ္ပာယ်က NLD အစိုးရနဲ့ မိမိတို့အစိုးရဟာ မတူကွဲပြားခြားနားတဲ့ နိုင်ငံရေးအခင်းအကျင်းတွေ အောက်မှာ ပေါ်ပေါက်လာခဲ့တဲ့ ပုံသဏ္ဌာန်အရ မတူကွဲပြားခြားနားတဲ့ အစိုးရတွေ ဖြစ်နေကြပေမဲ့ အနှစ်သာရအရ တူညီတဲ့ တခုတည်းသော အစိုးရသာ ဖြစ်တယ်ဆိုတာကို NUG က ဖော်ကျူးပြသခဲ့တာ ဖြစ်ပါတယ်။ NUG က စစ်တပ်အာဏာသိမ်းမှုကို ပြတ်ပြတ်သားသား ဆန့်ကျင်ခဲ့တဲ့ ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ် (သံအမတ်ကြီး) ဦးကျော်မိုးထွန်းကို သူ့ရဲ့ မူလတာဝန်မှာ ဆက်လက်ထားရှိဖို့လည်း အဆိုပြုခဲ့ပါတယ်။

ကမ္ဘာ့အကြီးဆုံး နိုင်ငံတကာအဖွဲ့အစည်းဖြစ်တဲ့ ကုလသမဂ္ဂက သူ့ရဲ့စာအုပ်ပြာ (နိုင်ငံများ၏  အကြီးအကဲနှင့် သံတမန်များဆိုင်ရာ မှတ်တမ်းစာအုပ်) မှာ ဒေါ်အောင်ဆန်းစုကြည်နဲ့ ဦးဝင်းမြင့်တို့ကို  မြန်မာနိုင်ငံရဲ့ အကြီးအကဲများအဖြစ် ဆက်လက်ထားရှိခဲ့ပါတယ်။ အဲဒါရဲ့ အဓိပ္ပာယ်က ကုလသမဂ္ဂအနေနဲ့ မြန်မာနိုင်ငံမှာ စစ်တပ်ရဲ့ အာဏာသိမ်းမှုကို လက်မခံဘူး၊ စစ်အစိုးရကို အသိအမှတ်မပြုဘူး ဆိုတာကို ပြသလိုက်တဲ့ တချိန်တည်းမှာ စစ်အာဏာသိမ်းမှုကို ဆန့်ကျင်ပြီး ပေါ်ပေါက်လာတဲ့ NUG ကိုလည်း အသိအမှတ်မပြုဘူး ဆိုတာကို ပြသလိုက်တာ ဖြစ်ပါတယ်။ နှစ်စဥ် စကစ အဆိုပြုတဲ့ ကိုယ်စားလှယ်ကို ပယ်ချပြီး ဦးကျော်မိုးထွန်းကို ဆက်လက် လက်ခံထားတာက NLD အစိုးရက ခန့်အပ်ထားတဲ့ ကိုယ်စားလှယ်အနေနဲ့သာ ဖြစ်ပြီး NUG ရဲ့ ကိုယ်စားလှယ်အနေနဲ့ မဟုတ်ပါဘူး။

အဲဒါက လက်ရှိ မြန်မာနိုင်ငံမှာ ကိုယ့်ကိုယ်ကိုယ် အစိုးရလို့ ခေါ်ဆိုနေတဲ့ အင်စတီကျူးရှင်း ၃   ခုရဲ့ အခြေအနေကို ကောက်ကြောင်းဆွဲပြလိုက်တာ ဖြစ်ပါတယ်။ ဒီကောက်ကြောင်းကို ကြည့်ရင် အစိုးရ ၃ ခုစလုံး နိုင်ငံတကာမျက်နှာစာမှာ ကြီးမားတဲ့ အကျပ်အတည်းကိုယ်စီနဲ့ နွံစေးအိုင်ထဲ ရောက်နေကြတာကို တွေ့ရမှာပါ။ NLD အစိုးရက ထောင်ထဲရောက်နေပါတယ်။ ဘယ်တော့လွတ်လာမလဲ ခန့်မှန်းရခက်ပါတယ်။ လွတ်တောင်မှ လွတ်လာပါတော့မလားလို့ စိုးရိမ်နေရတဲ့ အခြေအနေပါ။ စကစ ကလည်း ဗိုလ်နေဝင်းတို့ ဗိုလ်သန်းရွှေတို့လို ချောင်မလားဆိုတဲ့ မျှော်လင့်ချက်နဲ့ အာဏာသိမ်းခဲ့ပေမဲ့ ၄ နှစ်ကြာလာတဲ့အထိ ကုလသမဂ္ဂနဲ့ သူ့ရဲ့ ကန့်ကူလက်လှည့်ဆရာ ပေါက်ဖော်ကြီး အပါအဝင် ဘယ်နိုင်ငံရဲ့ တရားဝင် အသိအမှတ်ပြုမှုကိုမှမ ရရှိသေးပါဘူး။ ရန်ကုန်မှာ ဖွင့်လှစ်ထားတဲ့ ဘယ်နိုင်ငံခြားသံရုံးမှ ရုပ်သိမ်းထွက်ခွာသွားခြင်း မရှိသေးပေမဲ့ ဘယ်နိုင်ငံရဲ့ တူတူတန်တန် ဆက်ဆံခြင်းကိုမှလည်း မခံရပါဘူး။ နိုင်ငံအများအပြားက မြန်မာနိုင်ငံရှိ သူတို့ရဲ့ သံတမန်အဆင့်အတန်းကို လျှော့ချထားပြီး စကစ ဖိတ်တဲ့ ပွဲမှန်သမျှကို အဲဒီ အဆင့်နိမ့် သံတမန်တွေပဲ တက်ပါတယ်။ ဒါကို စကစက အခံရခက်ပေမဲ့ မတော်ရာ ကြမ်းညပ်သလို ဖြစ်နေတာကြောင့် မအော်ရဲဘဲ မချိသွားဖြဲ လုပ်နေရပါတယ်။ စကစ ခေါင်းဆောင် မအလဟာ နိုင်ငံတော် ယာယီသမ္မတနဲ့ နိုင်ငံတော်ဝန်ကြီးချုပ် အပါအဝင် ထိပ်ဆုံးရာထူးကြီး ၄ ခုစလုံးကို ယူထားပေမဲ့ ဘယ်နိုင်ငံခေါင်းဆောင်မှလည်း သူ့ဆီလာမလည်။ ဘယ်နိုင်ငံ ခေါင်းဆောင်ကမှလည်း သူ့ကို အလည်မဖိတ်ပါဘူး။ အရင်က ရှိထားတဲ့ နိုင်ငံခြားရင်းနှီးမြှုပ်နှံမှု အားလုံးနီးပါး ထွက်ခွာသွားကြပြီး အသစ်လည်း လုံးဝဝင်မလာပါဘူး။ ဒီကြားထဲ အာဂျင်တီးနားတရားရုံးက ဖမ်းဝရမ်းထုတ်ထားပြီး ICC က မကြာခင် ဖမ်းဝရမ်းထုတ်ဖို့ ရှိနေတဲ့ အခြေအနေကိုလည်း ရင်ဆိုင်နေရပါသေးတယ်။

NUG ရဲ့ အကျပ်အတည်းကလည်း မသေးပါဘူး။ ပူပူနွေးနွေး ရွေးကောက်ပွဲအနိုင်ရ ပြည်ထောင်စုလွှတ်တော် ကိုယ်စားလှယ်များ အပါအဝင် နိုင်ငံရဲ့ အရေးပါတဲ့ (stakeholder) အင်အားစု ၅ စုမှ ကိုယ်စားလှယ်တွေနဲ့ စုဖွဲ့ထားတာမို့ NLD အစိုးရ တာဝန်မထမ်းဆောင်နိုင်ခိုက်မှာ တရားဝင်မှုအရှိဆုံး အစိုးရဖြစ်ပေမဲ့ နိုင်ငံတကာဆက်ဆံရေး ယန္တရားစနစ်ကြီးရဲ့ အထွေထွေအားနည်းမှုကြောင့် သူနဲ့ထိုက်တန်တဲ့ နေရာအဆင့်အတန်းကို မရဘူး ဖြစ်နေပါတယ်။ NUG ကို ကုလသမဂ္ဂ  အပါအဝင် ဘယ်နိုင်ငံကမှ မြန်မာနိုင်ငံရဲ့ တရားဝင်အစိုးရအဖြစ် အသိအမှတ် မပြုကြပါဘူး။ ဘယ်နိုင်ငံရဲ့ အသိအမှတ်ပြုမှုကိုမှ မခံရတဲ့အတွက် ဘယ်နိုင်ငံ၊ ဘယ်နိုင်ငံတကာ အဖွဲ့အစည်းဆီကမှလည်း တရားဝင် ငွေချေး၊ လက်နက်ဝယ်လို့ မရပါဘူး။ ဘယ်နိုင်ငံနဲ့မှလည်း ရင်းနှီးမြှုပ်နှံမှုစာချုပ် ချုပ်လို့မရပါဘူး။ အစိုးရယန္တရား လည်ပတ်ဖို့နဲ့ ပြည်သူ့ဝန်ဆောင်မှု လုပ်ငန်းများအတွက် ကုန်ကျငွေကို ဓမ္မဘက်တော်သား  ပြည်တွင်းပြည်ပမှ ပြည်သူတွေရဲ့ လှူဒါန်းမှုကိုပဲ အားကိုးရပါတယ်။ ဒါတောင်မှ စကစ က ရက်စက်ကြမ်းကြုတ်တဲ့နည်း၊ ယုတ်မာကောက်ကျစ်တဲ့နည်းတွေ သုံးပြီး ပြည်တွင်းက အလှူရှင်တွေ NUG အပါအဝင် တော်လှန်ရေးအဖွဲ့တွေကို မလှူနိုင်အောင် အားသွန်ကြိုးပမ်း လုပ်ဆောင်နေတာကြောင့် အလှူငွေတွေ လျော့ပါးလာနေပါတယ်။ အခုနောက်ပိုင်း လွတ်မြောက်နယ်မြေတချို့မှာ အခွန်ငွေတွေ ကောက်ခံရရှိလာလို့ အလှူရှင်တွေအပေါ် ဖိအား အတန်အသင့် လျော့သွားခဲ့ပေမဲ့  အဲဒီအခွန်ငွေတွေ ပြည်သူ့ဘဏ္ဍာတိုက်ထဲ အပြည့်အဝ မရောက်တဲ့ ပြဿနာတော့ ရှိပါတယ်။

NUG က ရှေ့တနေရာမှာ ဖော်ပြခဲ့ပြီးဖြစ်တဲ့အတိုင်း စစ်ရေးအတွေ့အကြုံပိုင်းမှာ အစွယ်မှာတောင် အမွေးပေါက်နေပြီလို့ ဆိုရလောက်အောင် ရင့်နေတဲ့ စကစကို သမိုင်းရေးလိုအပ်ချက်အရ ထိထိရောက်ရောက် စိန်ခေါ်တုံ့ပြန်နိုင်ဖို့ စစ်ရေး တော်လှန်ရေး အတွေ့အကြုံရှိတဲ့ အင်အားစုတခု၊  ဘာစစ်ရေးတော်လှန်ရေး အတွေ့အကြုံမှမရှိတဲ့ အင်အားစု ၄ ခု ပေါင်းစုပြီး အရေးပေါ်ဖွဲ့ခဲ့ရတဲ့ အစိုးရပါ။ ရန်ပုံငွေနတ္ထိ၊ ယန္တရားစနစ် သုညနဲ့ စခဲ့ရတဲ့ အစိုးရ၊ ကမ္ဘာ့သမိုင်းမှာ ပထမဆုံးအဖြစ် အာကာသအတွင်း စီးဆင်းနေတဲ့ အမှုန် သို့မဟုတ် လှိုင်းတွေကို ကြီးကြီးမားမား အားထားပြီး ဖွဲ့ခဲ့ရတဲ့အစိုးရ ဖြစ်ပါတယ်။ ဒါပေမဲ့ အားလုံးသိကြတဲ့အတိုင်း စစ်အာဏာသိမ်းမှုကို ဆန့်ကျင်တဲ့ ပြည်သူတွေရဲ့ နွေဦးတော်လှန်ရေး ၄ နှစ်နီးပါး ရှိလာတဲ့ အခုအချိန်မှာ   ပြည်သူတွေရဲ့ မျှော်မှန်းချက်ဖြစ်တဲ့ စစ်အာဏာရှင်စနစ်ကို အပြီးတိုင် ဖယ်ရှားပြီး ဖက်ဒရယ်ဒီမိုကရေစီနိုင်ငံ ထူထောင်ရေးက အတော်အသင့် ခရီးပေါက်လာခဲ့ပါပြီ။ ဒီအောင်မြင်မှုက NUG ရဲ့ ထိရောက် ထက်မြက်တဲ့ ဦးဆောင်မှုကြောင့်လို့ မပြောနိုင်တာ သေချာပေမဲ့ ဒီအောင်မြင်မှုမှာ NUG ရဲ့ အခန်းကဏ္ဍ တစိတ်တပိုင်း ပါတယ်ဆိုတဲ့ အချက်ကိုတော့ နွေဦးဘက်တော်သားမှန်ရင် ဘယ်သူမှ မငြင်းသင့်ပါဘူး။

အစိုးရဆိုတာ ဖိအားအောက်မှာ နေထိုင်ရတယ် ဆိုတဲ့ အနောက်တိုင်း ဆိုရိုးစကားတခု ရှိပါတယ်။ မှန်ပါတယ်။ အစိုးရလုပ်ရင် ဖိအားပေးတဲ့ဒဏ် ခံရမှာပါပဲ။ တာဝန်သိစိတ် (duty conscious) ကြောင့်ပဲဖြစ်ဖြစ်၊ ကိုယ်ကျိုးမျှော်မှန်းချက် (personal interest) တခုခုကြောင့်ပဲဖြစ်ဖြစ်၊ နှစ်ခုရောပြီးတော့ပဲဖြစ်ဖြစ်၊ ဘာကြောင့်ပဲဖြစ်ဖြစ် အစိုးရလုပ်ရင်တော့ ဖိအားပေးတဲ့ဒဏ် ခံရမှာဖြစ်ပါတယ်။ ဖိအားပေးတဲ့ဒဏ် မခံနိုင်ရင် အစိုးရမလုပ်ဖို့ဘဲ ရှိပါတယ်။

ဖိအားဆိုတဲ့နေရာမှာ နှစ်မျိုးရှိပါတယ်။ တမျိုးက ရှေ့ကလာတဲ့ဖိအား ဖြစ်ပါတယ်။ ပြိုင်ဘက်၊ အတိုက်အခံ၊ ရန်သူဆီကလာတဲ့ ဖိအားပါ။ နောက်တမျိုးက နောက်ကလာတဲ့ ဖိအားပါ။ မိမိရဲ့ ရဲဘော်ရဲဘက်၊ မိတ်ဆွေ၊ မဟာမိတ်၊ မိမိဘက်တော်သားတွေဆီက လာတဲ့ ဖိအားပါ။ ရှေ့ကလာတဲ့ ဖိအား (ဓားချက်လည်းဖြစ်နိုင်) က မြင်နေရတာကြောင့် ကြိုတင်ပြင်ဆင်ထားနိုင်ပါတယ်။ အထိအခိုက် အရှအနာနည်းအောင် အရှောင်အတိမ်း အကာအကွယ် လုပ်နိုင်ပါတယ်။ နောက်ကလာတဲ့ ဖိအားကျတော့  မမြင်ရတာကြောင့် ကြိုတင်ပြင်ဆင်ထားတာ မလုပ်နိုင်ပါဘူး။ နောက်ကလည်း ဖိအားလာနိုင်တယ် ဆိုတာကို မျှော်လင့်ထားလို့ ရပေမဲ့ ဖိအားလား ဓားချက်လား ဆိုတာကို ကြိုမမြင်နိုင်တော့ ဓားချက်ဖြစ်ရင် ထိခိုက်မှု ကြီးသွားနိုင်ပါတယ်။ ဂျူးလီးယပ်စ်ဆီဇာ ပြဇာတ်ထဲက ဘရုတပ်စ်ရဲ့ ဓားချက်လိုပေါ့။

ပေါ်ပေါက်လာချိန်ကစပြီး နောက်ကလာတဲ့ ဖိအား (သို့မဟုတ်) ဝေဖန်မှုမျိုးစုံ ဒဏ်ခံလာခဲ့ရတဲ့ NUG ဟာအ ခုတလောမှာ နောက်ကလာတဲ့ ဖိအားတွေရဲ့ ဒဏ်ကို ပိုပြီး ပြင်းပြင်းထန်ထန် ခံနေရပါတယ်။ အွန်လိုင်း လူမှုမီဒီယာကွန်ရက်ပေါ်မှာ တွေ့တွေ့နေရတဲ့ အဲဒီ  ဝေဖန်မှုတွေထဲမှာ တချို့က ယထာဘူတကျပုံရပေမဲ့ တချို့ကတော့ (တော်လှန်ရေးအောင်မြင်ရေး ရှုထောင့်ကြည့်ရင်) စိတ်မသက်မသာ ဖြစ်ရလောက်အောင် တဖက်စောင်းနင်း ကျလှတယ်လို့ ခံစားမိပါတယ်။ ထုံးစံအတိုင်း အဲဒီဝေဖန်မှုတွေမှာ စကစ သူလျှို ဒလန် အကောင့်တုတွေက ဝိုင်းပြီး ဆွမ်းကြီးလောင်းနေကြတာ တွေ့ရတော့ စိတ်မသက်မသာ ဖြစ်နေရတဲ့ကြားက ပြုံးမိပါတယ်။

ကမ္ဘာပေါ်မှာ ခြောက်ပြစ်ကင်း သဲလဲစင်တဲ့လူဆိုတာ မရှိပါဘူး။ ဒီတော့ လူတွေနဲ့ဖွဲ့စည်းထားတာ ဖြစ်တဲ့ အစိုးရတွေက ဘယ်လိုလုပ် ခြောက်ပြစ်ကင်း သဲလဲစင်နိုင်မှာလဲ။ ကျနော် ရှေ့မှာရေးခဲ့ပြီး   ဖြစ်တဲ့အတိုင်း အနုတ်လက္ခဏာဆောင်တဲ့ ပေးထားချက် အများအပြားပေါ်မှာ ဖွဲ့စည်းပေါ်ပေါက်လာခဲ့ရတာဖြစ်တဲ့ NUG မှာ ချွတ်ယွင်းချက်၊ အားနည်းချက် အများအပြား ရှိနေမယ် ဆိုတာကတော့ ပြောစရာတောင် လိုမယ်မထင်ပါဘူး။ ဘယ်လိုအကြောင်းတွေကြောင့်ပဲ အားနည်းသည်ဖြစ်စေ ပြည်သူတွေရဲ့ တာဝန်တခုက မိမိတို့အစိုးရရဲ့ အားနည်းချက်တွေကို ထောက်ပြ ဝေဖန်ပြီး ကောင်းမွန် (တယ်လို့ မိမိတို့ယူဆ) တဲ့ အကြံတွေ ပေးရမှာဖြစ်ပါတယ်။

ဒီနေရာရောက်တဲ့အခါ ဝေဖန်မှုတွေနဲ့ ပတ်သက်ပြီး တခါက ပျဥ်းမနားက ကဗျာဆရာတယောက် ပြောခဲ့ဖူးတဲ့ စကားတခုကို သွားသတိရမိပါတယ်။ သူက… အမှန်ပြောတာတော့ ဟုတ်ပါရဲ့.. အပြောရော မှန်ကြရဲ့လား.. လို့ ပြောခဲ့တာပါ။ အဲဒီစကားကို တွေးမိတိုင်း အဖေ့နဖူးမှာ ကိုက်နေတဲ့ခြင်ကို သတ်ဖို့ ရည်ရွယ်ချက်နဲ့ အဲဒီခြင်ကို ပုဆိန်နဲ့ပေါက်လိုက်တဲ့ သားတယောက်အကြောင်း ပုံပြင်ကလေးကို ကျနော် သတိရလေ့ရှိပါတယ်။

လွန်ခဲ့တဲ့ တနှစ်ဝန်းကျင်လောက်က ဖြစ်မယ်ထင်ပါတယ်။ နိုင်ငံရေးမှုနဲ့ ထောင်အကြိမ်ကြိမ်ကျခဲ့ဖူးသူ တယောက်ရဲ့ (နိုင်ငံခြားရောက်နေတဲ့) ညီအရင်းတယောက်က Live လွှင့်ပြီး ပြောတဲ့စကားတွေထဲမှာ NUG သာမရှိရင် နွေဦးတော်လှန်ရေးဟာ အခုထက် အများကြီး ပိုပြီး ခရီးရောက်နေလောက်ပြီ ဆိုတဲ့စကား ပါပါတယ်။ အဲဒီစကားကို သူ့အစ်ကို ကိုယ်တိုင်က မနှစ်သက်လို့ ပြန်လည်ဖြေရှင်းခဲ့တာကိုလည်း သိခဲ့ရပါတယ်။ စစ်အစိုးရတွေရဲ့ ထိန်းသိမ်းမှုကို အကြိမ်ကြိမ်ခံခဲ့ရဖူးတဲ့ ဝါရင့်ရှေ့နေကြီးတယောက်ကလည်း NUG ကို စေတနာနဲ့ ဝေဖန်မှု လုပ်ရင်းလုပ်ရင်း စကားတွေက အလွန်အကျွံတွေ ဖြစ်လာတယ်လို့ ကျနော် ခံစားလာရပါတယ်။ အလားတူ Live တွေလွှင့်ရင်း အတန်အသင့် လူသိများလာကြတဲ့ နွေဦးဘက်တော်သား (ဖြစ်ပုံရသူ) တချို့ကလည်း NUG ရဲ့ ဝန်ထမ်းအဖွဲ့အစည်းတွေဖြစ်တဲ့ (ပ)သုံးလုံးတွေထဲက ပြည်သူအပေါ် စေတနာလည်းမရှိ၊   အရည်အချင်းလည်းမရှိတဲ့  (ပ)သုံးလုံးတချို့ရဲ့ လုပ်ရပ်တွေကို ထပ်တလဲလဲ Highlight လုပ်ပြနေကြပါတယ်။ ဒီလိုလုပ်ခြင်းအားဖြင့် (သူတို့က မရည်ရွယ်သည့်တိုင်) NUG ဟာ လုံးဝသုံးစားလို့မရတဲ့၊ အားကိုးလို့မရတဲ့ အဖွဲ့အစည်းတခု ဖြစ်တယ်ဆိုတဲ့ အတွေး နွေဦးပြည်သူတချို့အကြား စိမ့်ဝင်သွားနိုင်တဲ့ အန္တရာယ် ရှိနေပါတယ်။ လတ်တလော သတင်းဌာနတခုရဲ့ ဆောင်းပါးကလည်း အကြောင်းကြောင်းသော အကြောင်းကြောင်းတွေနဲ့ NUG ကို အစာမကြေ ဖြစ်နေသူများအတွက်တော့ မြိန်စရာဟင်းကောင်းတခွက်ပါပဲ။ ဆောင်းပါးပါ အချက်အလက်တွေ ဘယ်လောက်မှန်သလဲ ဆိုတာတော့ ကျနော် မပြောတတ်ပါဘူး။ မကြာသေးခင်ရက်ပိုင်းက ဖတ်ရှုခဲ့ရတဲ့ နာမည်နောက်မှာ NLD တပ်ထားတဲ့ (လွန်ခဲ့တဲ့နှစ်အတန်ကြာကတည်းက အမေရိကန်နိုင်ငံမှာ ရောက်ရှိနေထိုင်နေတဲ့) အမျိုးသမီးတယောက်ရဲ့  FB post တခုမှာ Non CDM အချုပ်သူတဦးကို အဓမ္မပြုကျင့်ခဲ့တဲ့ NLD တိုင်းလွှတ်တော်ကိုယ်စားလှယ်လည်းဖြစ်၊ ပအဖ ခရိုင်တာဝန်ခံလည်းဖြစ်သူဟာ အခုအချိန်မှာ ပြည်သူပိုင်ငွေ သိန်းပေါင်းနှစ်သောင်းကျော်ကို ယူဆောင်ပြီး စကစနဲ့ ပူးပေါင်းသွားပြီလို့ ရေးထားပါတယ်။ တရားခံဟာ NUG ပြည်ထဲရေးဝန်ကြီးနဲ့ ရင်းနှီးသူဖြစ်ပြီး ဝန်ကြီးရဲ့ အကာအကွယ်ပေးမှုကို တလျှောက်လုံး ရထားခဲ့သူဖြစ်တဲ့ သဘောမျိုးလည်း ရေးထားပါတယ်။ အဲဒီနေ့မှာပဲ အဲဒီသံသယတရားခံဟာ NUG ရဲ့ ထိန်းချုပ်မှုအောက်မှာ ရောက်ရှိနေပြီဖြစ်တဲ့ တန့်ဆည်ရဲစခန်းမှာ လာရောက်အဖမ်းခံခဲ့တယ်၊ သူ့ကို စစ်ဆေးမှုတွေ ပြုလုပ်နေပြီး မကြာခင် သက်ဆိုင်ရာ ကန့်ဘလူမြို့နယ်သို့ လွှဲပြောင်းပေးအပ်သွားမယ်လို့ NUG က ထုတ်ပြန်ခဲ့ပါတယ်။

သိကြားမင်း ကျွဲယောင်ဆောင်ပြီး လူ့ပြည်ဆင်းလာရင်တောင် ချိုကားတယ်လို့ ဝေဖန်ကြလိမ့်မယ် ဆိုတဲ့ စကားတခုကို ကြားဖူးကြမှာပါ။ ဆီလိုအပေါက်ရှာပြီး အပြစ်တင်တတ်ကြသူတချို့ရဲ့ သဘာဝကို ဖော်ညွှန်းတဲ့ တင်စားချက်လို့ ထင်ပါတယ်။ နတ်တို့သနင်း သိကြားမင်းတောင် အလွတ်မပေးမှတော့ NUG က ဘာမို့လဲလို့သာ ပြောရမှာပါ။ ဝေဖန်မှုကို ဖိတ်ခေါ်ရမယ်၊ အလေးထားရမယ် ဆိုတာက တိုးတက်အောင်မြင်လိုသူတိုင်း လက်ကိုင်ထားရမယ့် အခြေခံမူ ဖြစ်ပါတယ်။ ဒါပေမဲ့ သူတို့  နှစ်ယောက်စလုံးရော မြည်းပါ ရေထဲပြုတ်ကျသွားတဲ့ ခရီးသွား သားအဖလို ဝေဖန်မှုကို အလေးထား မလွန်မိဖို့တော့ လိုပါတယ်။ ဉာဏ်ပညာ အမြော်အမြင်ရှိသူ တယောက်သည် အလကားရသော အကြံများ၏ ၉၉ ရာခိုင်နှုန်းကို လျစ်လျူရှုသည် ဆိုတဲ့ သိုးဆောင်းတွေရဲ့ ဆိုရိုးစကားတခုကလည်း စဥ်းစားစရာပါ။

ဒီနေ့ မြန်မာပြည်သူတွေ ဆင်နွှဲနေတဲ့ နွေဦးတော်လှန်ရေး အောင်မြင်ဖို့ အရေးကြီးဆုံး လိုအပ်ချက်က ညီညွတ်ရေးဖြစ်တယ် ဆိုတဲ့ ပြောဆိုသံတွေ အများကြီး ကြားနေရပါတယ်။ ကျနော်ကတော့ အလိုအပ်ဆုံးက ဉာဏ်ပညာလို့ ပြောချင်ပါတယ်။

စည်တော်သံ (သူ့အတွေး သူ့အမြင် – Op-Ed)

(ဤဆောင်းပါးသည် စာရေးသူ၏ အတွေးအမြင်သာဖြစ်ပြီး ဒီဗွီဘီ၏ အာဘော်မဟုတ်ပါ။)