အမေရိကန်ရဲ့ အကူအညီရပ်ဆိုင်းခံရပြီးနောက် ယူကရိန်းဘက်က ရပ်တည်ကြောင်းနဲ့ ကာကွယ်ရေးအသုံးစရိတ် တိုးမြှင့်မှာဖြစ်ကြောင်း ဥရောပခေါင်းဆောင်တွေက မတ် ၆ ရက်မှာ ပြောပါတယ်။

ယူကရိန်းအရေးနဲ့ ပတ်သက်ပြီး အမေရိကန်သမ္မတ ဒေါ်နယ်ထရမ့်ပ်ရဲ့ သဘောထားကြောင့် ဥရောပခေါင်းဆောင်တွေက ကာကွယ်ရေးအသုံးစရိတ် တိုးမြှင့်ဖို့ အစီအစဉ်ဆွဲနေတာပါ။

ဘရပ်ဆဲလ်မှာ ပြုလုပ်တဲ့ ဥရောပသမဂ္ဂ ကာကွယ်ရေးဆိုင်ရာ ထိပ်သီးအစည်းအဝေးမှာ ဥရောပအတွက် ကာကွယ်ရေးကို အဓိက ဆွေးနွေးခဲ့တာ ဖြစ်ပါတယ်။

ယူကရိန်းကို ကျူးကျော်ထားတဲ့ ရုရှားဟာ နောက်ပိုင်းမှာ ဥရောပက တခြားနိုင်ငံတွေကိုလည်း တိုက်မှာ စိုးရိမ်ရပါတယ်။

ဒါ့ကြောင့် ဥရောပအနေနဲ့ အမေရိကန်ရဲ့ အကူအညီပေးမှုကို ရေရှည်မှီခိုနိုင်မှာ မဟုတ်တဲ့အကြောင်း ဆွေးနွေးခဲ့ပါတယ်။ ဥရောပခေါင်းဆောင်တွေဟာ ဥရောပကော်မရှင်ရဲ့ ကာကွယ်ရေးဆိုင်ရာ ဘဏ္ဍာငွေ အသုံးပြုရေး အစီရင်ခံစာကို ထောက်ခံခဲ့ပါတယ်။

ဥရောပနိုင်ငံတွေရဲ့ စစ်တပ်တွေအတွက် ဒေါ်လာ ၁၆၀ ဘီလီယံ ပူးတွဲ ချေးသွားမှာ ဖြစ်ပါတယ်။

အဖွဲ့ဝင် ၂၇ နိုင်ငံရဲ့ သဘောတူညီချက်ထုတ်ပြန်ခဲ့ပြီး နိုင်ငံခေါင်းဆောင်တွေက သူတို့ရဲ့ ဝန်ကြီးတွေကို အစီရင်ခံစာကို သေချာစစ်ဆေးဖို့ ညွှန်ကြားထားပါတယ်။

အဲဒီ ၂၇ ယောက်ထဲမှာ ထရမ့်ပ်ရဲ့ မဟာမိတ်၊ ရုရှားနဲ့ ဆက်ဆံရေးရှိသူ ဟန်ဂေရီ အမျိုးသားရေးဝါဒီ ခေါင်းဆောင် အော်ဘန် မပါဝင်ဘူးလို့လည်း ဖော်ပြပါတယ်။

ဒါ့အပြင် ဥရောပခေါင်းဆောင်တွေဟာ ယူကရိန်းနိုင်ငံကို ထောက်ခံမှုပေးကြောင်း ပြောဆိုခဲ့ပါတယ်။

ယူကရိန်း မပါဘဲ ဆွေးနွေးမှုဆိုတာ မရှိကြောင်း ၂၆ နိုင်ငံရဲ့ ဥရောပခေါင်းဆောင်တွေက ပြောခဲ့ပြီး ယူကရိန်းကို ဆက်အကူအညီပေးဖို့ ကတိပြုခဲ့ကြပါတယ်။

Source : Reuters