ချင်းပြည်နယ်၊ တီးတိန်မြို့ရှိ အထက (၁) အထက်တန်းကျောင်းရှေ့မှာ လုံခြုံရေးအကြောင်းပြချက်နဲ့ စစ်သားနဲ့ ရဲအင်အား ၁၀ ယောက်လောက် ဇွန် ၁၄ ရက်ကစပြီး မနက် ၇ နာရီကနေ ညနေ ၄ နာရီ ကျောင်းဆင်းချိန်ထိ လုံခြုံရေးယူထားတယ်လို့ မြို့ခံတွေထံက သိရပါတယ်။
ဒါ့အပြင် ကျောင်းလာတက်တဲ့ အထက်တန်းအရွယ် ကျောင်းသားတွေနဲ့ တခြား ကျောင်းသားမိဘတွေကိုလည်း စစ်ဆေးတာတွေရှိတယ်လို့ ဆိုပါတယ်။
တီးတိန်မြို့ပေါ်မှာ အစိုးရစာသင်ကျောင်း ၇ ကျောင်းရှိပြီး အထက ၁ တီးတိန် ကျောင်းတကျောင်းသာ ကျောင်းဖွင့်နိုင်တာဖြစ်ပြီး ကျန်တဲ့ ကျောင်း ၆ ကျောင်းလုံးမှာ ကျောင်းတက်မယ့်သူ မရှိတာကြောင့် ပိတ်ထားရပါတယ်။
ချင်းပြည်နယ်ထဲက တခြားမြို့နယ်တခုဖြစ်တဲ့ ပလက်ဝမြို့မှာတော့ စစ်ကောင်စီလက်ထက်မှာ တက္ကသိုလ်ဝင်တန်းစာမေးပွဲ ဖြေဆိုသူ ၁,၀၀၀ နီးပါး အောင်မြင်ခဲ့တာကြောင့် အောင်ချက်ကောင်းတယ်ဆိုပြီး တက္ကသိုလ်ဝင်တန်း ကျောင်းအပ်နှံသူတွေ များပြားနေကာ အထက ၁ မြို့မကျောင်းမှာ ထိုင်ခုံနဲ့ အခန်းတွေ လုံလောက်မှုမရှိတဲ့အထိ ဖြစ်နေတယ်လို့ သိရပါတယ်။
တီးတိန်မြို့မှာ အခုနှစ် ပညာသင်နှစ်အတွင်း ကျေးရွာ ၄၄ ရွာမှာ စာသင်ကျောင်းပေါင်း ၁၅၇ ကျောင်း ဖွင့်လှစ်နိုင်ခဲ့ပြီး မနေ့ ဇွန် ၁၄ ရက်အထိ ကျောင်းအပ်နှံသူ ၉,၆၂၆ ဦးရှိတယ်လို့ စစ်ကောင်စီလက်အောက်ခံ ပညာရေးဝန်ကြီးဌာနက ထုတ်ပြန်ထားပါတယ်။
