ထိုင်းနိုင်ငံ၊ ကန်ချနဘူရီခရိုင်က အဝေးပြေးလမ်းမတခုပေါ်မှာ မေ ၂၈ ရက်က ကီလိုကျော်မောင်းနှင်ထွက်ပြေးတဲ့ ကားတစီးကို လိုက်လံဖမ်းဆီးရာကနေ တရားမဝင်နယ်စပ်ဖြတ်ကျော် ဝင်ရောက်လာတဲ့ မြန်မာနိုင်ငံသား ၁၇ ဦးကို ထိုင်းအာဏာပိုင်တွေ က ဖမ်းဆီးလိုက်တယ်လို့ ထိုင်းနိုင်ငံအခြေစိုက်သတင်းတွေမှာ ဖော်ပြထားပါတယ်။

မေ ၂၈ ရက်က ထောင်ဖာဖွန်-ဆိုင်ယွတ် လမ်းပိုင်းမှာ SUVအမျိုးအစား အမဲရောင်ကားတစီးက စစ်ဆေးရေးဂိတ်အရောက်မှာ ကီလိုကျော် မောင်းနှင်ထွက်ပြေးသွားခဲ့တဲ့အတွက် တာဝန်ကျ ထိုင်းအာဏာပိုင်တွေက လိုက်လံဖမ်းဆီးခဲ့ပြီး စစ်ဆေးရေးဂိတ်နဲ့ ၁၀ ကီလိုမီတာခန့်အကွာမှာ ဖမ်းဆီးရမိခဲ့တာပါ။

အဆိုပါ ထွက်ပြေးမောင်းနှင်တဲ့ကားကိုစစ်ဆေးရာ ထိုင်းနိုင်ငံသားယာဥ်မောင်းနဲ့အတူ မြန်မာနိုင်ငံသား ၁၇ ဦးကို တွေ့ရှိခဲ့တဲ့အတွက် စစ်ဆေးရာကနေ ထိုင်းအမျိုးသားယာဥ်မောင်းက သယ်ယူပို့ဆောင်ခ ဘတ် ၃၀၀၀ ရရှိတဲ့အတွက် ခေါ်ဆောင်လာခဲ့တာလို့ ဆိုပါတယ်။

​ဖမ်းဆီးရမိတဲ့ တရားမဝင်မြန်မာနိုင်ငံသားတွေက ရခိုင်၊ ပဲခူး၊ မော်လမြိုင် ဒေသတွေက ပွဲစားကတဆင့် ငွေတဝက်ပေးချေကာ ထိုင်း-မြန်မာနယ်စပ် စံခလဘူရီခရိုင်တောလမ်းကနေ လာရောက်တာဖြစ်ပြီး ဘန်ကောက်၊ စမွတ်ဆခွန်ဒေသတွေမှာ သွားရောက်အလုပ်လုပ်ကိုင်မှာဖြစ်ကာ နေရာရောက်ရင် ပွဲစားခ နောက်ထပ်တဝက် ထပ်မံပေးဆောင်ရမယ်လို့ ဖော်ပြထားပါတယ်။

လက်ရှိမှာတော့ ဖမ်းဆီးရမိတဲ့ ထိုင်းအမျိုးသားကို ကယ်ရီမှု၊ လူ ကုန်ကူးမှုတွေနဲ့ တရားစွဲဆိုနိုင်ဖို့ စီစဥ်နေပြီး တရားမဝင်မြန်မာနိုင်ငံသား ၁၇ ဦးအား လူဝင်မူကြီးကြပ်ရေးဥပဒေအရအရေးယူနိုင်ဖို့ ဆိုင်ယွတ်ရဲစခန်းကို ပို့ဆောင်ထားပြီး မြန်မာတဦးမှာ ကိုဗစ်ရောဂါတွေ့ရှိရတဲ့အတွက် ကွာရန်တင်း ၃ ရက်ဝင်ဖို့ စီစဥ်ထားတယ်လို့ သိရပါတယ်။

အာဏာသိမ်းပြီး ၂ နှစ်ကျော်ကာလအတွင်း မြန်မာနိုင်ငံမှာ စစ်ရေး အခြေအနေအရ၊ ပြည်တွင်းအလုပ်အကိုင်ရှားပါးမှုနဲ့ ကုန်စျေးနှုန်းမြင့်တက်လာမှုတွေကြောင့် မြန်မာနိုင်ငံသားတွေဟာ နီးစပ်ရာအိမ်နီးချင်းနိုင်ငံတွေကို တရားမဝင်နယ်စပ်ဖြတ်ကျော်ဝင်ရောက်ကာ အလုပ်လုပ်ကိုင်ဖို့ ရောက်ရှိလာကြပြီး မကြာခဏဆိုသလို ထိုင်းနယ်စပ် နေရာအသီးသီးမှာ ထိုင်းအာဏာပိုင်တွေရဲ့ ဖမ်းဆီးတာကို ခံနေရတာပါ။ 

၂၀၂၃ ခုနှစ် မေလအတွင်း ဖမ်းဆီးရမိတဲ့ မြန်မာနိုင်ငံသား ၁၀၀ ကျော် ရှိနေပြီလို့ ဒေသတွင်းသတင်းတွေရဲ့ ဖော်ပြချက်အရ သိရပါတယ်။

source-CH7HD News