စစ်ကိုင်းတိုင်း၊ ချောင်းဦးကနေ မြင်းမူဘက်ထွက်လာတဲ့ စစ်ကောင်စီအင်အား ၇၀ လောက်ပါတဲ့ ယာဉ် ၂ စီးကို ဒေသခံ ပြည်သူ့ကာကွယ်ရေး ပူးပေါင်းတပ်က ချောင်းဦးမြို့နယ် ငါးယှန်ရွာအရှေ့ဘက်မှာ သြဂုတ် ၂ ရက် မနက် ၆ နာရီ ၄၅ မိနစ်လောက်က နေရာ ၃ နေရာခွဲပြီး မိုင်း ၆ လုံးနဲ့ တိုက်ခိုက်ခဲ့တာကြောင့် စစ်ကောင်စီတပ်သား ၁၉ ဦးသေဆုံးပြီး အများအပြား ဒဏ်ရာရတယ်လို့ Farmers Revolution Force (FRF) ကနေ သိရပါတယ်။
Farmers Revolution Force (FRF) သတင်းပြန်ကြားရေး တာဝန်ရှိသူတဦးက “ချောင်းဦးကနေပြီးတော့ ထွက်တာ၊ သံချပ်ကာကား ၂ စီးနဲ့ ထွက်တယ်ဗျ။ ၂ လုံး ပွိုင့် ၃ ပွိုင့် ဆွဲလိုက်တာ ကားတစီးကတော့ အဲ့နားမှာတင် ထိုးရပ်သွားတယ်။ အကောင်ရေက တော်တော်များများရတယ်ဗျ” လို့ ပြောပါတယ်။
ပထမစစ်ကောင်စီကားတစီးမှာ အင်အား ၄၀ ခန့်ပါပြီး ဒုတိယအစီးမှာ အင်အား ၃၀ ခန့် ပါရှိကြောင်း၊ အင်အား ၃၀ ပါတဲ့အစီးက ထိုးရပ်သွားခဲ့ပြီး ကျန်အစီးမှာလည်း ကားနောက်ခြမ်းပိုင်းတွေ ထိခိုက်ပျက်စီးသွားကြောင်း၊ စစ်ကောင်စီကား ၂ စီးလုံး မိုင်းထိခဲ့တဲ့အတွက် ၁၉ ဦးထက်မနည်း သေဆုံးခဲ့တယ်လို့ ဆိုပါတယ်။
FRF သတင်းပြန်ကြားရေး တာဝန်ရှိသူတဦးက “မနက်က ကျနော် ပွိုင့်မဆွဲခင်ကို စစ်သုံးဂျက်လေယာဥ် ဝဲတယ်ဗျ။ အဲလိုဝဲတဲ့အချိန်ကျ ကျနော်တို့ ပွိုင့်ဆွဲတဲ့လူတွေက ချုံထဲမှာဝင်နေရတယ်ဗျ။ သူတို့ပြန်သွားတဲ့အချိန်မှ ချောင်းဦးက သံချပ်ကာကား ၂ စီး ထွက်လာတာ။ ထွက်လာတော့ ကျနော်တို့ ပွိုင့် ၃ ပွိုင့်ဆွဲလိုက်တာ ၂ စီးထွက်လာတာ ၂ စီးမြောက်ကားက ထိုးရပ်သွားတယ်။ ထိုးရပ်သွားပြီးတော့ ပစ်ထားခဲ့တယ်။ ပစ်ထားခဲ့ပြီးတော့ ဒီပြင့်ကားနဲ့ ဆွဲပြီးတော့ နတ်ရေကန်နားမှာ ထားပစ်ခဲ့တယ်။ ကျန်တဲ့အလောင်းတွေနဲ့ ဒဏ်ရာရတဲ့လူတွေကိုတော့ မြင်းမူမှာ သယ်သွားတယ်” လို့ ပြောပါတယ်။
အဆိုပါတိုက်ခိုက်မှုကို Farmers Revolution Force (FRF) တပ်ရင်းနဲ့ မြောင်မြို့နယ် တော်လှန်ရေးတပ် (စစ်ကိုင်းခရိုင် တပ်ရင်း ၅) တို့ ပူးပေါင်းတိုက်ခိုက်ခဲ့တာလို့ သိရပါတယ်။