စစ်ကိုင်းတိုင်း၊ က​လေးခရိုင်၊ မင်းကင်းမြို့နယ် ​တောင်တွင်း​ဒေသမှာ မတ် ၁၂ ရက် ဒီနေ့ မနက်ပိုင်း ၁၀ နာရီလောက်က  စစ်​ကောင်စီတပ်ဖွဲ့​တွေ  မိုင်းဆွဲတိုက်ခိုက်ခံရလို့  ၅ ဦးထက်မနည်း သေဆုံးသွားတယ်လို့ ဒေသခံ PDF ​အဖွဲ့ထံက  ​ သိရပါတယ်။

မုံရွာ-ယာကြီး-က​လေးဝလမ်းပိုင်း​ပေါ်မှာ မိုင်းဆွဲတိုက်ခိုက်ခံခဲ့ရတာဖြစ်ပြီး အင်းကုန်း​ကျေးရွာရဲ့ အ​ရှေ့ဘက်နားမှာ မင်းကင်း PDF(MKPDF)တပ်ရင်း  ၂၊ တပ်ခွဲ ၁ ​အဖွဲ့က တိုက်ခိုက်တာတာလို့ ဒေသခံ PDF ​ခေါင်း​ဆောင်တစ်ဦးက ​ပြောပါတယ်။

စစ်​ကောင်စီတပ်ဖွဲ့အင်အား ၆၀ လောက်ဟာ မြို့မ​ကျေးရွာဘက်ကိုသွားစဥ် သူတို့တပ်စွဲ​နေတဲ့ စခန်းနဲ့ ၁ မိုင်ခွဲ​အကွာ​​ဝေး​လောက်အ​ရောက်မှာ တိုက်ခိုက်ခြင်းခံခဲ့ရတာလို့ ​ဒေသခံ​တွေကလည်း ​ပြောပါတယ်။

မင်းကင်းမြို့နယ် ​တောင်တွင်း​ဒေသမှာ စစ်​ကောင်စီတပ်တွေ တပ်စွဲ​နေထိုင်​နေတာ ၁ လ​ကျော်ရှိနေပြီး  ကြာပင်​ကျေးရွာအနီးမှာ တစ်ဖွဲ့၊ မြို့မ​ကျေးရွာအနီးမှာ တစ်ဖွဲ့နဲ့ အိန္ဒိယလမ်းဆိုဒ် အနီးမှာ တစ်ဖွဲ့ စုစု​ပေါင်း ၃ ဖွဲ့ တပ်စွဲ​နေကာ စုစု​ပေါင်းအင်အား ၂၀၀ ဝန်းကျင်ခန့်ရှိတယ်လို့ ဆိုပါတယ်။

မနေ့ည ၁၀ နာရီခန့်​လောက်ကလည်း မြို့မ​ကျေးရွာအနီး တပ်စွဲထားတဲ့ စစ်​ကောင်စီတပ်ဖွဲ့​တွေက သာစည်​ကျေးရွာအတွင်းကို ဝင်​ရောက်​မွှေ​နှောက်ခဲ့သလို အပြစ်မဲ့ပြည်သူ ၇ ဦး​ကိုလည်း ရိုက်နှက်သွားတယ်လို့  ​​ဒေသခံတစ်ဦးက ​ပြောပါတယ်။

စစ်ကိုင်းတိုင်း၊ မြောင်မြို့နယ်မှာတော့ စစ်ကောင်စီတပ်ကို  မရိုးကုန်းတံတားအနီးမှာ  မတ် ၁၁ ရက် ည ၉ နာရီလောက်က မိုင်းဆွဲတိုက်ခိုက်ခဲ့ရာမှာ စစ်ကောင်စီတပ်သား ၁၀ ဦး သေဆုံးပြီး ၃ ဦးဒဏ်ရာရခဲ့တယ်လို့ မြောင်မြို့နယ်ပြည်သူ့ကာကွယ်ရေးတပ်က ပြန်ကြားရေးတာဝန်ခံက  ဒီဗွီဘီကို ပြောပါတယ်။

မိုင်းဆွဲခံရပြီးနောက် စစ်ကောင်စီတပ်က တရစပ် ပြန်လည်ပစ်ခတ်ခဲ့လို့ ပြည်သူ့ကာကွယ်ရေးတပ်ဖွဲ့က ရဲဘော်တွေ အလျင်အမြန် အန္တရာယ်ကင်းကင်းနဲ့ တပ်ဆုတ်နိုင်ခဲ့ရတယ်လို့လည်း ဆိုပါတယ်။

မြောင်မြို့နယ်ပြည်သူ့ကာကွယ်ရေးနဲ့ လုံခြုံရေးအဖွဲ့ -CDSOM နဲ့အတူ ပြည်သူ့တပ်မတော်(မြောင်)-MUA ၊ T.G.R  ပြည်သူ့ကာကွယ်ရေးတပ်ဖွဲ့(Myaung People’s Defense Force TGR)၊ Zamani Revolution Force (MMU) ၊ မြင်းမူမြို့ပြတော်လှန်ရေးအဖွဲ့- CRF ၊ 11 Brothers Revolution Forces တို့ ပူးပေါင်းကာ မိုင်းဆွဲတိုက်ခိုက်ခဲ့တာဖြစ်ပါတယ်။