စစ်ကိုင်းတိုင်း၊ မုံရွာ-အမြင့်လမ်းခွဲကို ပြည်သူတွေဖြတ်သန်းသွားလာခွင့်ကို ဒီဇင်ဘာ ၂၈ ရက်နေ့ကစတင်ပြီး ယာယီပိတ်ထားလိုက်တယ်လို့ သိရတယ်။

ချောင်းဦးမြို့နယ် တော်လှန်ရေးတပ်တာဝန်ရှိသူတဦးက “စစ်(--) တွေခြေရှုပ်နေတဲ့အတွက် ဒေသခံပြည်သူ့ကာကွယ်ရေးတပ်တွေက ခဏပိတ်ထားလိုက်တာပါ။ ပြန်ဖွင့်မယ့်ရက်ကို ကြေညာပေးပါလိမ့်မယ်” လို့ ပြောပါတယ်။

မဟာမိတ်ညီနောင်ဒေသကာကွယ်ရေးတပ်တွေဖြစ်ကြတဲ့ Monywa Lightning PDF၊ Chaung U LDF၊ ချောင်းဦးမြို့နယ်တော်လှန်ရေးတပ်၊ Farmers Revolution Force CHU၊ ဗိုလ်မိုးကြိုး နှင့် အဖွဲ့သားများ၊ Monywa Underground Revolution တို့ ညှိနှိုင်းပြီး မုံရွာ-အမြင့်လမ်းခွဲကို ယာယီပိတ်ထားလိုက်တာလို့ ဆိုပါတယ်။

အခုလို လမ်းပိတ်ထားတဲ့အပေါ် မော်တော်ယာဉ်ပိုင်ရှင်တဦးက “ကားပိုင်ရှင်တွေကတော့ ဒုက္ခရောက်တာပေါ့။ ဒါပေမဲ့လည်း အများနဲ့ဆိုတော့ မထူးတော့ပါဘူး။ ကိုယ့်ထက်အများကြီးပိုပြီး ဒုက္ခပင်လယ်ဝေနေတဲ့သူတွေလည်း တပုံကြီးပဲလေ။ အနီးအနားက မြို့ရွာတွေကို ကုန်စည်စီးဆင်းမှုအတွက်ကတော့ တခြားနည်းလမ်းတွေသုံးရမှာပေါ့။ ကုန်စျေးနှုန်းမတက်ဖို့အတွက်လည်း ကြည့်ရဦးမယ်” လို့ ရှင်းပြပါတယ်။

မုံရွာ-အမြင့်ကားလမ်းပိုင်းကိုတော့ ဒီဇင်ဘာ ၁၉ ရက်ကစတင်ပြီး ည ၈ နာရီမှ  မနက် ၃ နာရီအထိ ပြည်သူတွေအနေနဲ့ လုံးဝဖြတ်သန်းသွားလာတာမပြုလုပ်ကြဖို့ ဒေသခံပြည်သူ့ကာကွယ်ရေးတပ်တွေက အသိပေးကြေညာထားပါတယ်။