စစ်ကိုင်းတိုင်း၊ မုံရွာမြို့၊ အေးသာယာရပ် အမှတ် ၁ လမ်းမှာ ၄ နှစ်အရွယ် ကလေးအပါအဝင် မိသားစုဝင် ၅ ဦးကို အကြမ်းဖက်စစ်တပ်တွေက PDF အဖွဲ့ကို ထောက်ပံ့လို့စွပ်စွဲပြီး ဇွန်လ ၂၁ ရက်နေ့ ည ၁၁ နာရီလောက်ရောက်ဖမ်းဆီး သွားတယ်လို့ ဒေသခံတွေက ပြောပါတယ်။
“အခု အဖမ်းခံရတာ အရင်က ကျောင်းဆရာအငြိမ်းစား မိသားစုပါ။ ဆရာကြီး ဦးတင်မြင့်စိုး အပါအဝင် သူ့မိသားစု ၅ ယောက်လုံး ဖမ်းတယ်။ နောက် ၃ ယောက်လည်း အဖမ်း ခံရတယ်”လို့ ဒေသခံတစ်ဦးက ပြောပါတယ်။
ပြည်သူ ၈ ဦးကို PDF ထောက်ပံ့မှုတွေပြုလုပ်တယ်လို့ စွပ်စွဲချက်နဲ့ ဝင်ရောက်ဖမ်းဆီးခဲ့ပြီး ၄ နှစ်ရွယ် ကလေးငယ်ကတော့ ဇွန် ၂၂ ရက် နေ့လယ်ပိုင်းက လွတ်မြောက်လာတယ်လို့ အေးသာရပ်ကွက်ပြည်သူတစ်ဦးက ပြောပါတယ်။
ဆရာကြီးဦးတင်မြင့်စိုးဟာ စစ်ဘေးရှောင်ပြည်သူတွေကို ထောက်ပံ့ပစ္စည်းလှူဒါန်းဖို့ ပြုလုပ်နေချိန်အတွင်းမှာ ဖမ်းဆီးခဲ့ရတာလို့ သိရပါတယ်။