စစ်ကိုင်းတိုင်း၊ ယင်းမာပင်မြို့နယ်နဲ့ ဆားလင်းကြီးမြို့နယ်တို့က ကျေးလက်နေ ပြည်သူတွေရဲ့ စုပေါင်းသပိတ်စစ်ကြောင်းဟာ စစ်အာဏာရှင်အမြစ်ပြတ်ဖြုတ်ချရေး သပိတ်မှောက်နေတာ ရက်ပေါင်း ၉၀ ပြည့်နေ့အဖြစ် ဒီနေ့ ဇွန်လ ၈ ရက်နေ့မှာ ဆက်လက်ဆန္ဒပြခဲ့ကြပြီး ကျဆုံးသူရဲကောင်းတွေအတွက် ဆုတောင်းပွဲကိုလည်း ပြုလုပ်ခဲ့ပါတယ်။
ဒီကနေ့ ဆန္ဒပြသူတွေက စစ်အာဏာရှင်ဆန့်ကျင်တဲ့ ကြွေးကြော်သံတွေနဲ့ လမ်းလျှောက်ဆန္ဒဖော်ထုတ်ခဲ့သလို ထိုင်သပိတ်ကိုလည်း ပြုလုပ်ခဲ့ကြပြီး ဒီမိုကရေစီတောင်းဆိုရင်း နွေဦးတော်လှန်ရေးမှာ အသက်ပေးသွားရတဲ့ အာဇာနည်သူရဲကောင်းတွေအတွက် ဘုရားမှာ နှင်းဆီပန်းကပ်လှူ ဂုဏ်ပြုဆုတောင်းပေးခဲ့ကြတာပါ။
နှစ်မြို့နယ်ပူးပေါင်းသပိတ်တပ်ဟာ စစ်အာဏာရှင်အမြစ်ပြတ်ဖြုတ်ချရေးသပိတ်ကို နေ့စဉ် နေပူပူ မိုးရွာရွာ ပုံစံအမျိုးမျိုးနဲ့ ပြုလုပ်နေကြတာဖြစ်ပြီး ဒီနေ့အချိန်ထိ ဆန္ဒဖော်ထုတ်တဲ့ ပြည်သူအင်အား ကောင်းနေဆဲ ဖြစ်ပါတယ်။
