ရန်ကုန်တိုင်း၊ ဒဂုံဆိပ်ကမ်းမြို့နယ်၊ ယုဇနဥယျာဉ်မြို့တော်မှာ မတ်လ ၂၇ ရက် မနက်က ငြိမ်းချမ်းစွာဆန္ဒပြတဲ့ ပြည်သူတွေကို အကြမ်းဖက်စစ်အုပ်စုက လာရောက် ပစ်ခတ်ဖြိုခွင်းခဲ့ရာမှာ လက်ရှိအချိန်အထိ ပြည်သူ အနည်းဆုံး ၂ ဦးဒဏ်ရာရပြီး ၄ ဦးဖမ်းခံရတယ်လို့ အခင်းဖြစ်နေရာ ရောက်ရှိနေသူတွေက ပြောပါတယ်။
ဒါ့အပြင် ကျည်ဆန်ဝမ်းဗိုက်ထိမှန်ထားတဲ့ ပြည်သူတစ်ဦးကို စစ်အုပ်စုက တရွတ်တိုက်ဆွဲခေါ်သွားပြီး သွေးထွက်လွန်နေတယ်လို့သိရပါတယ်။ ကျန်အလောင်းတွေကိုလည်း သယ်ယူသွားတယ်လို့ ပြောပါတယ်။ လတ်တလော သေဆုံးဒဏ်ရာရသူ စာရင်း အတိအကျ မသိရသေးပါဘူး။
ဆန္ဒပြရာမှာ ပါဝင်သူတွေကို ရဲနဲ့စစ်တပ်က အိမ်ပေါ်တွေအထိ ထုရိုက်ဖွင့်ပြီး ဖမ်းဆီးခေါ်ဆောင်နေပါတယ်။ ရပ်ကွက်အတွင်းကိုလည်း စစ်ကားတွေနဲ့ လှည့်ပတ်သွားကာ အသံဗုံးအပြင် သေနတ်မိုးပေါ်ထောင်ပစ်ပြီး အပြင်ထွက်မလာဖို့ ခြိမ်းခြောက်ပြောဆိုမှုတွေရှိနေတယ်လို့ ရပ်ကွက်နေပြည်သူတွေက ပြောပါတယ်။
