ကိုဗစ်ထောက်ပံ့ကြေး အပြည့်အဝမရသဖြင့် ချောင်းဦးတွင် ဆန္ဒပြ
Aung Ko Latt
·
November 18, 2020
စစ်ကိုင်းတိုင်းဒေသကြီး၊ ချောင်းဦးမြို့မှာ နိုင်ငံတော်က ထောက်ပံ့တဲ့ ကိုဗစ်ထောက်ပံ့ကြေး ငွေ အပြည့်အဝမရတာကြောင့် ငွေဖြတ်တဲ့အုပ်ချုပ်ရေးမှူးတွေကို အရေးယူပေးဖို့အတွက် ဒေသခံတွေက မြို့တွင်းလှည့်လည် ဆန္ဒဖော်ထုတ်ခဲ့ပါတယ်။
ဒီဆန္ဒဖော်ထုတ်ပွဲကို ကိုဗစ်ညွှန်ကြားချက်နဲ့အညီ လူ ၂၉ ဦးက ခွင့်ပြုချက်နဲ့ ပြုလုပ်ခဲ့တာပါ။ ဆန္ဒဖော်ထုတ်ပွဲမှာ အခြေခံလူတန်းစားထောက်ပံ့ငွေ တန်းတူရရှိရေး၊ အဂတိမကင်းတဲ့ အုပ်ချုပ်ရေးမှူးတွေ အရေးယူပေးရေး စတဲ့ တောင်းဆိုချက်တွေကိုလည်း စီတန်းလှည့်လည်ရာမှာ ကြွေးကြော်တောင်းဆိုခဲ့ကြပါတယ်။
"လက်လုပ်လက်စားတွေကျတော့ မရဘူး။ အရင်က မရတာလည်း ရှိတယ်။ အရင်ကရပြီး အခုမရတာလည်းရှိတယ်။ စားနိုင်သောက်နိုင်သူတွေကျရပြီး တကယ်ရသင့်သူတွေကျ မရတာတွေလည်း ဖြစ်နေတယ်။ ဒါကြောင့် တာဝန်ရှိသူတွေ သိအောင် အခုလို ဆန္ဒဖော်ထုတ်တာပါ။"လို့ ဦးဆောင်သူ မာန်ဇာမြေမွန်က ပြောပါတယ်။
ကိုဗစ်ကာလအတွင်း အခြေခံလူတန်းစားတွေအတွက် ထောက်ပံ့တာ ၄ ကြိမ်ရှိပြီလည်း ဖြစ်ပါတယ်။ ချောင်းဦးမြို့နယ်အတွင်း ကျေးရွာပေါင်း ၈၉ ရွာရှိပြီး ကိုဗစ်ထောက်ပံ့ကြေးနဲ့ ပတ်သက်လို့ ဆန္ဒပြတာတော့ ပထမဆုံးအကြိမ်လည်း ဖြစ်ပါတယ်။