မိတ္ထီလာတွင် သူနာပြုဆရာမ ၁ ဦး ကိုဗစ်-၁၉ ကူးစက်ခံရ
DVB
·
November 13, 2020
မန္တလေးတိုင်း၊ မိတ္ထီလာခရိုင်ဆေးရုံက အတည်ပြုလူနာတွေကို စောင့်ရှောက်ကုသပေးခဲ့တဲ့ သူနာပြုဆရာမ ၁ ဦး ကိုဗစ်-၁၉ ရောဂါကူးစက်ခံခဲ့ရတယ်လို့ နိုဝင်ဘာလ ၁၂ ရက်နေ့မှာ မိတ္ထီလာခရိုင်ဆေးရုံက သိရပါတယ်။
မိတ္ထီလာခရိုင် ဆေးရုံအုပ်ကြီးဒေါက်တာဦးညွှန့်စိန်က"အထက်တန်းသူနာပြုပါ။ ပိုးတွေ့ လူနာတွေထားတဲ့အဆောင်မှာ သူနာပြုဆရာမတွေပါတဲ့ ကျန်းမာရေးဝန်ထမ်း ၄-၅ ဦး လောက် အလှည့်ကျတာဝန်ချတယ်။ တာဝန်ပြီးရင် ကွာရန်တင်းဝင်ရတယ်။ အခုလည်း တာဝန်ကျ ဝန်ထမ်းတွေ မနေ့က တာဝန်ပြီးလို့ ကွာရန်တင်း ဝင်နေကြတယ်။ ဒီနေ့တော့ အမြန်စစ်လို့ရတဲ့ RDT(Rapid test kit)နဲ့ စစ်ဆေးတာ ပိုးကူးစက်ခံထားရတာကို တွေ့တာပါ။ အခုတော့ ပိုးတွေ့လူနာဆောင်မှာ ဆရာမကို ထားပြီး ကုသပေးနေပါတယ်။"လို့ ပြောပါတယ်။
မိတ္ထီလာခရိုင်ဆေးရုံကြီးမှာ အမြန်လမ်း သီးကုန်းဂိတ်မှာ ကိုဗစ်-၁၉ရောဂါပိုးတွေ့တဲ့ ယာဉ်မောင်းနဲ့ ယာဉ်နောက်လိုက်တွေကိုလည်း ဆေးကုသပေးခဲ့ပါတယ်။
အခုအချိန်အထိ ကျန်းမာရေးဆရာမအပါအဝင် ကိုဗစ်-၁၉ ရောဂါပိုးတွေ့လူနာ ၁၀၄ ဦးကို ဆေးကုသပေးနေပြီး ပိုးတွေလူနာ ၉၀ ဦးကတော့ ရောဂါပျောက်ကင်းလို့ ဆေးရုံက ဆင်းသွားခဲ့ပါတယ်။ ဆေးရုံမှာ ကိုဗစ်-၁၉ လူနာ ၁၄ ဦးသာ ဆေးကုသမှူခံယူနေတာပါ။
မိတ္ထီလာမြို့မှာ ကာရန်တင်စင်တာ ၂၀ ကျော်ရှိနေပြီး ကွာရန်တင်းဝင်နေသူ ၂၀၀ ကျော်ရှိနေတယ်လို့ ခရိုင်ကျန်းမာရေးဦးစီးဌာနက သိရပါတယ်။
