မကွေးတိုင်းတွင် Test Kits ဖြင့် စစ်ဆေးချက်အရ ကိုဗစ်-၁၉ လူနာသစ် ၇ ဦး ထပ်မံတွေ့ရှိ
DVB
·
October 8, 2020
မကွေးတိုင်းမှာ အောက်တိုဘာ ၇ ရက်နေ့က Test Kits နဲ့ စစ်ဆေးချက်အရ ကိုဗစ်-၁၉ အတည်ပြုလူနာသစ် ၇ ဦး ထပ်မံတွေ့ရှိခဲ့တယ်လို့ တိုင်းဒေသကြီး ပြည်သူ့ကျန်းမာရေးဦးစီးဌာနကနေ သိရပါတယ်။
တိုင်းအတွင်း မြို့နယ်တွေအလိုက် Test Kits တွေနဲ့ ကိုဗစ်-၁၉ ရေဂါပိုးရှိမရှိ စစ်ဆေးချက်တွေအရ မကွေးမြို့နယ်၊ မကြီးကန် ယာယီယာဉ်ရပ်နားစခန်းက အမျိုးသား ၃ ဦး၊ ငဖဲမြို့နယ် ပျဉ်းဝ ပူးပေါင်းစစ်ဆေးရေးဂိတ်က အမျိုးသား ၁ ဦး၊ ပခုက္ကူမြို့နယ် ပူပေါင်းစစ်ဆေးရေးဂိတ်က အမျိုးသား ၁ ဦး၊ မြို့သစ်မြို့နယ်နဲ့ တောင်းတွင်းကြီးမြို့နယ်က အနံ့မရတဲ့ အမျိုးသမီး ၂ ဦးမှာ ကိုဗစ်-၁၉ ရောဂါပိုးတွေ့ရှိခဲ့တယ်လို့ တိုင်း ပြည်သူ့ကျန်းမာရေးဦးစီးဌာန လက်ထောက်ညွှန်ကြားရေးမှူး ဒေါက်တာခင်မောင်သန်းက DVB ကို ပြောပါတယ်။
အောက်တိုဘာလ ၆ ရက်နေ့ကလည်း Test Kits နဲ့ စစ်ဆေးရာမှာ ငဖဲမြို့နယ် ပျဉ်းဝ ပူးပေါင်းစစ်ဆေးရေးဂိတ်မှာ အမျိုးသား ၁ ဦးနဲ့ တောင်တွင်းကြီးမြို့နယ်က အနံ့ပျောက်တဲ့ အမျိုးသမီး ၁ ဦးမှာ ကိုဗစ်-၁၉ ရောဂါပိုးတွေ့ရှိခဲ့တယ်လို့ ဆိုပါတယ်။
အဲဒီ အတည်ပြုလူနာတွေဟာ ရန်ကုန်တိုင်းနဲ့ ရခိုင်ပြည်နယ် ဘက်တွေက ဝင်ရောက်လာတာဖြစ်ပြီး မြို့သစ်မြို့နယ်က အမျိုးသမီးတစ်ဦးကတော့ ခရီးသွားရာဇဝင်မရှိဘဲ ရောဂါကူးစက်ခံရကာ လူနာနဲ့ဆက်စပ်ခဲ့တဲ့သူတွေကို အသွားအလာကန့်သတ်ပြီး ဓာတ်ခွဲနမူနာပေးပို့သွားမယ်လို့ ဒေါက်တာခင်မောင်သန်းက ပြောပါတယ်။
မကွေးတိုင်း မြို့နယ်တွေမှာ ကိုဗစ်-၁၉ ရောဂါရှိမရှိ နာရီပိုင်းအတွင်းစစ်ဆေးနိုင်တဲ့ Test Kits ၄၀၀၀ ဖြန့်ဝေထားပြီး နောက်ထပ် ၅၀၀၀ ထပ်မံဖြန့်ဝေသွားမယ်လို့ တိုင်းဒေသကြီး ပြည်သူ့ကျန်းမာရေးဦးစီးဌာနကနေ သိရပါတယ်။
မကွေးတိုင်းမှာ အောက်တိုဘာ ၆ ရက်နေ့အထိ ကိုဗစ်-၁၉ အတည်ပြုလူနာ ၇၂ ဦး ရှိပြီး သေဆုံးသူတော့ မရှိသေးဘူးလို့ ပြည်သူ့ကျန်းမာရေးဦးစီးဌာန ထုတ်ပြန်ချက်အရ သိရပါတယ်။
သတင်း-မင်းထီး
