ပြည်ပလေကြောင်းခရီးစဉ်များ ဩဂုတ်လကုန်ထိ ထပ်မံရွှေ့ဆိုင်း
DVB
·
July 29, 2020
ကိုဗစ်-၁၉ ရောဂါ ကူးစက်ပျံ့နှံ့မှု တားဆီးကာကွယ်ရေးအတွက် ရန်ကုန်အပြည် ပြည်ဆိုင်ရာလေဆိပ် ပြည်ပလေကြောင်းခရီးစဉ်တွေကို လာမယ့် ဩဂုတ်လကုန်ထိ ထပ်မံရွှေ့ဆိုင်း လိုက်ပါတယ်။
အပြည်ပြည်ဆိုင်ရာ ခရီးသည်တင်လေယာဉ်တွေ ပျံသန်းပြေးဆွဲခွင့်ရပ်ဆိုင်းခြင်းကာလကို ၂၀၂၀ ပြည့်နှစ်၊ ဩဂုတ်လ ၃၁ ရက်၊ မြန်မာစံတော်ချိန် ၂၃ နာရီ ၅၉ မိနစ်အထိ ထပ်မံတိုးမြှင့်ဖို့ မြန်မာနိုင်ငံ ကိုဗစ်-၁၉ ကာကွယ်၊ ထိန်းချုပ်၊ ကုသရေးဆိုင်ရာ ဗဟိုကော်မတီဆုံးဖြတ်ချက်နဲ့အညီ ရွှေ့ဆိုင်းလိုက်တာလို့ ရန်ကုန်လေဆိပ်ရဲ့ တရားဝင်ဖေ့စ်ဘွတ်ခ်မှာ သတင်းထုတ်ပြန်ပါတယ်။
လေဆိပ် Terminal 3 ရှိ ပြည်တွင်းလေကြောင်းလိုင်းခရီးစဉ်တွေ ပြေးဆွဲပျံသန်းမှု တွေကိုတော့ ပုံမှန်အတိုင်းဝန်ဆောင်မှုပေးနေပြီး ခရီးသည်တွေကိုလည်း လေဆိပ်အတွင်း ချမှတ်ထားတဲ့ ကြိုတင်ကာကွယ်ရေး လုပ်ငန်းစဉ်တွေကို လိုက်နာဆောင်ရွက်ကြဖို့ အသိပေးနှိုးဆော်ထားတာပါ။
မြန်မာနိုင်ငံမှာ ကိုဗစ်-၁၉ အတည်ပြုလူနာကို ပြီးခဲ့တဲ့ မတ်လ ၂၃ ရက်နေ့က စတင် တွေ့ရှိခဲ့တာဖြစ်ပြီး ဒီမနက်အထိ အတည်ပြုလူနာ ၃၅၁ ဦး၊ သေဆုံးသူ ၆ ဦး ရှိပါတယ်။
ကမ္ဘာတဝန်းမှာတော့ ကိုဗစ်-၁၉ အတည်ပြုလူနာ ၁၆ ဒသမ ၇ သန်း ကျော်၊ သေဆုံးသူ ၆၆၀,၀၀၀ ကျော်နဲ့ ရောဂါပိုး ကင်းစင်လာသူ ၁၀ သန်းကျော် ရှိနေခဲ့ပြီ ဖြစ်ပါတယ်။
ဓာတ်ပုံ- Yangon Aerodrome
