သိမ်းဆည်းမြေဧက ၆၀၀၀ ကျော် ပြန်ရရေး စာတင်ထားပေမယ့် မထူးခြား၍ တောင်သူများ စိုးရိမ်
DVB
·
February 12, 2018
ပဲခူးတိုင်းဒေသကြီး သာယာဝတီခရိုင် မင်းလှမြို့နယ်အတွင်းရှိ ကျေးရွာတွေက တောင်သူတွေ လုပ်ကိုင်နေတဲ့ ကိုင်းမြေဧက ၆၀၀၀ ကျော် ပြန်ရရှိဖို့ စာတင်ထားပေမယ့် ထူးခြားမှု မရှိသေးတာကြောင့် တောင်သူတွေ စိုးရိမ်နေကြပါတယ်။
မင်းလှမြို့နယ်အတွင်းရှိ ထန်းပင်ကုန်းကျေးရွာအုပ်စု၊ ထန်းပင်ကုန်းကျေးရွာ၊ ချောင်းနက်ကျေးရွာ၊ ပဒေသာကုန်းကျေးရွာ၊ မိုးသစ္စာကျေးရွာနဲ့ ဆင်တဲကုန်းရေကျော် ကျေးရွာတွေက တောင်သူတွေ လုပ်ကိုင်နေတဲ့ ကိုင်းမြေဧက ၆၀၀၀ ကျော်ကို ၁၉၉၉ ခုနှစ်က "ဦးသိန်းရွှေ" ပို့ကုန်လုပ်ငန်း ကုမ္ပဏီက သိမ်းသွားခဲ့တဲ့ မြေတွေ ပြန်လည်ပေးအပ်ဖို့ စာတင်တောင်းဆိုထားပေမယ့် ဒီနေ့အချိန်ထိ ထူးခြားမူမရှိဘူးလို့ ပြောပါတယ်။
ဦးဆောင်တောင်းဆိုသူ ကိုအောင်သွင်ထွန်းက “၂၀၁၇ ခုနှစ်တုန်းက ဦးစံဝင်း ဦးဆောင်ပြီး တောင်သူ ၆၈၄ ဦး လက်မှတ်ထိုးပြီး တခါစာတင် တောင်းဆိုထားတယ်။ အဲဒါကိုလည်း လယ်ယာမြေနဲ့ အခြားမြေသိမ်းဆည်းခြင်း ခံရမှုတွေ ပြန်လည်စိစစ်ရေး ဗဟိုကော်မတီက ၂၀၁၇ ခုနှစ် အောက်တိုဘာလမှာ ဒါတွေကို ပြန်လည်စိစစ်ပေးဖို့ဆိုပြီး ဌာနဆိုင်ရာတွေကို စာပြန်ချထားပေးတယ်။ ဒါပေမယ့် အခုချိန်ထိ ဘာမှာမလုပ်ဘူး။ အခုထန်းပင်ကုန်း ကျေးရွာအုပ်ချူပ်ရေးမှူးရယ်၊ အပိုင်မြေစာရင်းရယ်၊ လူတစုရယ်ပေါင်းပြီး သိမ်းထားတဲ့ မြေပေါ်မှာ ပုံစံ (၇) အတုတွေထုတ်ပြီး မူလပိုင်ရှင်တောင်သူတွေကို တရားစွဲထောင်ချတာတွေ လုပ်နေတယ်” လို့ ပြောပါတယ်။
ထောင်ကျခံရသူရဲ့ ဇနီးဖြစ်သူက “ကျမတို့မြေတွေကို ကုမ္ပဏီက သိမ်းသွားတယ်။ ဧက ၃၀ လောက်ပါသွားတယ်။ ကျန်တဲမြေကို လုပ်ကိုင်စားသောက်နေတာကို ထန်းပင်ကုန်း ကျေးရွာအုပ်ချူပ်ရေးမှူးနဲ့ အပိုင်မြေစာရင်းရယ်၊ ထန်းပင်ကုန်းရွာကပုံစံ (၇) အတုလုပ်ထားတဲ့ သူတွေက ကျမယောကျာ်းနဲ့ သားမက်ကို သူတို့ပိုင်မြေထဲမှာ လုပ်ကိုင်နေပါတယ်ဆိုပြီး တရားစွဲထောင်ချထားတယ်။ အခုလည်း နောက်ထပ် ၅ ဦးကို ထပ်တရားစွဲတယ်။ အဲဒီအထဲမှာ ကျမယောကျာ်းနဲ့ သမက်လည်းပါလို့ အခုမင်းလှမြို့နယ်ရဲစခန်းမှာ ခြေချင်းတွေနဲ့နေပြီး အမှု ရင်ဆိုင်နေရပါတယ်” လို့ ဒီဗွီဘီကို ပြောပါတယ်။
မင်းလှမြို့နယ် ဒုတိယအုပ်ချူပ်ရေးမှူး ဦးမျိုးကျော်က “တိုင်စာတွေက ကျနော်တို့ကို တိုင်တာ မဟုတ်ဘူး။ အထက်ဝန်ကြီးဌာနတွေကို တိုင်တာ။ ဒါကိုလည်း ပြန်လည်စိစစ်ပေးဖို့ စာရောက်ပါတယ်။ အခုလည်း ကျနော်တို့ ရပ်/ကျေး မြေယာစိစစ်ရေးအဖွဲ့ကို စစ်ဆေးခိုင်းထားပါတယ်။ ပုံစံ (၇) အတုကိစ္စတွေကိုလည်း စီမံကိန်းဦးစီးဌာနက ဦးဆောင်ပြီး အဖွဲ့ဖွဲ့ စစ်ဆေးဖို့ ဆောင်ရွက်နေပါတယ်။ မမှန်မကန် လုပ်ထားတာ မှန်ရင်တော့ သက်ဆိုင်ရာ ဌာနဆိုင်ရာတွေက အရေးယူ ဆောင်ရွက်တာတွေ ပြုလုပ်သွားမှာပါ” လို့ ပြောပါတယ်။
သတင်း - မေသွယ်