ရန်ကုန်၊ မြောက်ဥက္ကလာပမြို့နယ်၊ ရွှေပေါက္ကံမြို့သစ်နဲ့ သာကေတမြို့နယ်တို့မှာ အောက်တိုဘာ ၂၇ ရက်က ဝါယာရှော့ဖြစ် မီးလောင်မှုဖြစ်ပွားခဲ့တယ်လို့ မြန်မာမီးသတ်ဌာနချုပ်က ထုတ်ပြန်ပါတယ်။
ရွှေပေါက္ကံစက်မှုဇုန်၊ ကနောင် ၇ လမ်းရှိ ရော်ဘာဆိုးပြားထုတ်လုပ်တဲ့ စက်ရုံမှာ မနက်အစောပိုင်း ၄ နာရီခွဲလောက်က မီးလောင်ခဲ့တာ ဖြစ်ပါတယ်။
မီးလောင်မှုဟာ စက်ရုံ ၂ ထပ် အဆောက်အဦရဲ့ အပေါ်နေရာကနေ စတင်ခဲ့တာဖြစ်ပြီး ကုန်ကြမ်းပစ္စည်းတွေက လောင်စာအားကောင်းနေတာကြောင့် Level 1 ဆင့်ခေါ် ငြှိမ်းသတ်ခဲ့ရပါတယ်။
မီးလောင်မှုနေရာကို မြောက်ဥက္ကလာပမြို့နယ်၊ ရွှေပေါက္ကံမြို့သစ် မီးသတ်ယာဉ်တွေနဲ့ အရပ်ဘက်အသင်းတွေ ပူးပေါင်းငြှိမ်းသတ်ခဲ့ကြပြီး မနက် ၄ နာရီ ၄၂ မိနစ်မှာ မီးထိန်းနိုင်ကာ ၄ နာရီ ၄၅ မိနစ်မှာ မီးငြိမ်းသွားပါတယ်။
ကယ်ဆယ်ရေးအဖွဲ့ တာဝန်ရှိသူတဦးက “စက်မှုဇုန်ထဲက ဆိုးပြားရုံ မီးလောင်တာပါ။ မီးတောက်က အဲ့လောက်မရှိဘူး။ ပစ္စည်းတွေများလို့ မီးခိုးက လှိုက်ထွက်တာ၊ Level 1 ခေါ်တယ်၊ ၅ နာရီမထိုးခင်လောက် ငြိမ်းသွားတယ်” လို့ ပြောပါတယ်။
သာကေတမြို့နယ်၊ အနော်မာ ၁ ရပ်ကွက်၊ အနော်မာ ၁၅ လမ်းရှိ တိုက်တလုံးရဲ့ ၃ လွှာမှာ နေ့လယ် ၁၂ နာရီ ၄ မိနစ်ခန့်က မီးလောင်မှုဖြစ်ပွားခဲ့တယ်လို့ မြို့ခံကယ်ဆယ်ရေး အသင်းတွေက ပြောပါတယ်။
မီးလောင်မှုဟာ ၆ ထပ်တိုက်ရဲ့ ၃ လွှာမှာ ဖြစ်ပေါ်ခဲ့တာဖြစ်ပြီး အိမ်ရှင်တွေ အပြင်သွားနေချိန်မှာ အိမ်ခန်းအတွင်းကနေ ဝါယာရှော့ဖြစ် မီးစလောင်ခဲ့တာ ဖြစ်ပါတယ်။
မီးလောင်မှုနေရာကို သာကေတမြို့နယ်၊ ဒေါပုံမြို့နယ်၊ အရှေ့ပိုင်းခရိုင်တို့က မီးသတ်ယာဥ်အုပ်စု၊ မဟော်သဓာအသင်း၊ ပေးဆပ်သူတို့နှလုံးသား၊ သာကေတလူမှုကူညီရေး အသင်းနဲ့ တခြားအသင်းတွေရဲ့ ရေသယ်ယာဉ်တွေက ပူးပေါင်းငြှိမ်းသတ်ခဲ့တာ ဖြစ်ပါတယ်။
မဟောသဓာအသင်း တာဝန်ရှိသူတဦးက “တိုက်ခန်း ၃ လွှာက သော့ခတ်ထားတဲ့အခန်း လောင်တာ။ လူတော့ မရှိဘူး၊ တခန်းလုံးနီးပါးပါပဲ၊ လူထိခိုက်မှုတော့ မရှိဘူး” လို့ ပြောပါတယ်။
မီးလောင်မှုကြောင့် တိုက်ခန်းအတွင်းပိုင်း ၁ ခုလုံးနဲ့ အိမ်သုံးပစ္စည်းတွေနဲ့ သစ်သားနံရံတွေ မီးစွဲလောင်သွားပြီး နေ့လယ် ၁၂ နာရီ ၁၅ မိနစ်ခန့်မှာ မီးငြိမ်းသွားပါတယ်။
မီးလောင်မှု ၂ ခုစလုံးရဲ့ ပျက်စီးဆုံးရှုံးမှု တန်ဖိုးတွေကို သက်ဆိုင်ရာ မီးသတ်တပ်ဖွဲ့တွေက စစ်ဆေးတွက်ချက်နေဆဲဖြစ်ပြီး မီးလောင်မှုအတွင်း လူထိခိုက်ဒဏ်ရာရရှိမှု မရှိဘူးလို့ သိရပါတယ်။
