ကချင်ပြည်နယ်၊ မြစ်ကြီးနား–ဗန်းမော်လမ်းမပေါ်မှာရှိတဲ့ လိုင်လွမ့်အောင်ဂျာ စခန်းသိမ်းတိုက်ပွဲက တော်လှန်ရေးအဖွဲ့အစည်းတွေရဲ့ ဌာနချုပ်တွေကို ခြိမ်းခြောက်လိုတဲ့ စစ်ကောင်စီရဲ့ အိပ်မက်ကို ရိုက်ချိုးပစ်နိုင်တဲ့ အောင်ပွဲဖြစ်တယ်လို့ အမျိုးသားညီညွတ်ရေး အစိုးရ (NUG) ကာကွယ်ရေးဝန်ကြီး ဦးရည်မွန်က ပြောပါတယ်။
“အောင်ဂျာအောင်ပွဲက အရေးကြီးပါတယ်။ PDF တပ်မတော် ပါဝင်ပြီး KIA ဦးဆောင်တဲ့ မဟာမိတ်များရဲ့ အားနဲ့ ရယူခဲ့တဲ့ အောင်ပွဲဖြစ်တယ်။ (ဒီစခန်းသိမ်းအောင်ပွဲမှာ AA CNF ABSDF KNA-BURMA KPDF နဲ့ PDF ရဲဘော်များ ပူးပေါင်းပါဝင်တယ်။) တော်လှန်ရေးအဖွဲ့အစည်းတွေရဲ့ ဌာနချုပ်တွေကို ခြိမ်းခြောက်လိုတဲ့ စစ်ကောင်စီရဲ့ အိပ်မက်ကို ရိုက်ချိုးပစ်နိုင်တဲ့ အောင်ပွဲလည်း ဖြစ်တယ်။ တော်လှန်ရေးထုအင်အားနဲ့ ဆင်နွှဲတဲ့ မဟာဗျူဟာထိုးစစ်ရဲ့ ကနဦးခြေလှမ်းလည်း ဖြစ်ပါတယ်။ ဒီပွဲမှာ ရန်သူ့အင်အား ရာကျော် ချေ မှုန်းနိုင်ခဲ့တယ်။”
ဒီအောင်ပွဲနဲ့ ပတ်သက်ပြီးတော့ KIA က ပါဝင်တိုက်ခိုက်ခဲ့ကြတဲ့ တော်လှန်ရေး မဟာမိတ်ပူးပေါင်းတပ်ဖွဲ့တွေဖြစ်တဲ့ ရက္ခိုင့်တပ်တော် (AA)၊ ပြည်သူ့ကာကွယ်ရေး တပ်မတော် (PDF) ၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (မြောက်ပိုင်း) (ABSDF-NB)၊ ချင်းအမျိုးသားတပ်မတော် (CNA) နဲ့ ကူကီးအမျိုးသားတပ်မတော် (မြန်မာပြည်) (KNA-Burma) စတဲ့တပ်ဖွဲ့တွေ ဆီ အောက်တိုဘာ ၂၂ ရက်မှာ ဂုဏ်ပြုမှတ်တမ်းတင်ကြောင်း စာတစောင် ရေးသားပေးပို့ခဲ့တာကို တွေ့ရပါတယ်။
ဂုဏ်ပြုမှတ်တမ်းစာထဲမှာတော့ ခုလိုခုခံစစ်ဆင် တိုက်ပွဲစဉ်တွေအတွင်း ကေအိုင်အေ တပ်မဟာ တပ်ရင်းတပ်ဖွဲ့ဝင်တွေ၊ K-PDF တွေနဲ့ အတူတကွ လက်တွဲပြီးတော့ မိမိအသက်ကို ပဓာနမထားပဲ စွန့်လွှတ်စွန့်စား တိုက်ပွဲဝင်ခဲ့ကြတဲ့ မဟာမိတ်တပ်ဖွဲ့ဝင် တွေ အသီးသီးနဲ့ တာဝန်ရှိ တပ်မှူးတွေအားလုံးကို KIA စစ်ရုံးချုပ်က အထူးကျေးဇူးတင် ဂုဏ်ပြုမှတ်တမ်းတင် အသိအမှတ်ပြုကြောင်းနဲ့ အာဏာရှင်စနစ် အပြီးတိုင်ချုပ်ငြိမ်းရေး တိုက်ပွဲမှာ အတူတကွ လက်တွဲပြီး ဆက်လက် တိုက်ပွဲဝင်သွားကြဖို့လည်း တိုက်တွန်း ထားပါတယ်။