မကွေးမြို့က စျေးဆိုင်ပိုင်ရှင်အချို့ကို လာမယ့် ဒီဇင်ဘာ ၁၀ ရက် “လူ့အခွင့်အရေးနေ့” မှာ စျေးဆိုင်တွေမပိတ်ဖို့ စျေးဆိုင်ပိုင်ရှင်အချို့ကို စစ်ကောင်စီလက်အောက်ခံ စည်ပင်ဝန်ထမ်းတွေက လိုက်လံလက်မှတ်ထိုးခိုင်းနေတယ်လို့ သိရပါတယ်။
မကွေးမြို့က ကုန်စုံဆိုင်ပိုင်ရှင်တဦးက “မနေ့က (ဒီဇင်ဘာ ၈) နေ့လည်ပိုင်းက စည်ပင်ဝန်ထမ်းတွေရောက်လာတယ်။ ဒီဇင်ဘာ ၁၀ ရက်နေ့ကို ဆိုင်မပိတ်ဖို့ လက်မှတ်ထိုးပေးပါဆိုပြီးလာတယ်။ စကားပြောရမှာ မတန်တာနဲ့ လက်မှတ်ထိုးပေးလိုက်တယ်။ ဒါပေမယ့် ၁၀ ရက်နေ့ကျရင် ဆိုင်ကတော့ပိတ်မှာပါ။ ကိုယ်ကျရာနေရာကနေ ပြည်သူ့အတွက် တာဝန်ထမ်းဆောင်ရတာပဲ” လို့ ပြောပါတယ်။
စည်ပင်ဝန်ထမ်းတွေဟာ ဒီဇင်ဘာ ၁၀ ရက်နေ့ စျေးဆိုင်တွေမပိတ်ဖို့ တချို့စျေးဆိုင်ပိုင်ရှင်တွေကို လက်မှတ်ရေးထိုးခိုင်းပြီး တချို့ကိုတော့ နှုတ်နဲ့သာ ပြောဆိုသွားကြတယ်လို့ စျေးဆိုင်ပိုင်ရှင်တွေဆီက သိရပါတယ်။
စတိုးဆိုင်ပိုင်ရှင်တဦးက “စည်ပင်ကလူတွေက ဒီဇင်ဘာ ၁၀ ရက်နေ့ကို စျေးဆိုင်တွေမပိတ်ဖို့ နှုတ်နဲ့ပြောသွားတယ်။ ဘာကြောင့်မပိတ်ရမှာလဲမေးတော့ ပြန်မဖြေကြဘူး။ သူတို့က ကြောက်နေကြတာလေ။ အကြမ်းဖက်စစ်ကောင်စီ အုပ်ချုပ်ခွင့်မရအောင် ဆိုင်တွေကတော့ ပိတ်ကြမှာပါ။ အဲ့ဒီနေ့မပိတ်တဲ့ဆိုင်တွေကို နောက်နောင်မှာ ပြည်သူတွေ စျေးမဝယ်ကြတော့နဲ့ဗျာ'' လို့ ပြောပါတယ်။
လာမယ့် ဒီဇင်ဘာ ၁၀ ရက်နေ့ ကျရောက်မယ့် "လူ့အခွင့်အရေးနေ့" မှာ မြန်မာတစ်နိုင်ငံလုံး အတိုင်းအတာအနေနဲ့ မနက် ၁၀ နာရီမှ ညနေ ၄ နာရီအထိ တိတ်ဆိတ်ခြင်းသပိတ် (Silent Strike) ပြုလုပ်သွားမှာဖြစ်လို့ ပြည်သူလူထုတရပ်လုံးပါဝင်ကြဖို့ အထွေထွေသပိတ်ပေါင်းစပ်ညှိနှိုင်းရေးအင်အားစု (GSCB) က တိုက်တွန်းနှိုးဆော်ထားပါတယ်။