ထိုင်း-မြန်မာနယ်စပ်အနီးက စစ်ကောင်စီတပ်စခန်းသိမ်းတိုက်ပွဲတွေကြောင့် ထွက်ပြေးတိမ်းရှောင် လာတဲ့ စစ်ရှောင်ပြည်သူ ၃,၀၀၀ ကျော်ဟာ လူသားချင်း စာနာထောက်ထားမှုအကူအညီတွေ လိုအပ်နေတယ်လို့  ကရင်အရပ်ဘက်အဖွဲ့အစည်းတွေက ပြောပါတယ်။

ကရင်ပြည်နယ်၊ မြဝတီမြို့တောင်ဘက် စစ်ကောင်စီရဲ့ ဥကရစ်ထစခန်းနဲ့ ဝေါလေဗျူဟာကို  ဝိုင်းဝန်းပိတ် ဆို့ထားရာက ဇူလိုင် ၃ ရက်နေ့ကစတင်ပြီး ဒရုန်းတွေနဲ့ စတင်တိုက်ခိုက်နေတာကြောင့် စစ်ကောင်စီက လေကြောင်းကနေ ပစ်ကူပေးနေပါတယ်။ 

လက်ရှိမှာလည်း တိုက်ပွဲတွေ ပြင်းထန်နေတာကြောင့် ဥကရစ်ထ၊ ဝေါလေမြိုင် ကျေးရွာက ဒေသခံ ၃,၀၀၀ ကျော်ဟာ သောင်းရင်းမြစ်တဘက်ကမ်း ထိုင်းနိုင်ငံတွင်းနဲ့ နီးစပ်ရာကို  ထွက်ပြေးတိမ်းရှောင်ခဲ့ရပါတယ်။ လက်ရှိမှာလည်း စစ်ရှောင်ပြည်သူတွေဟာ နေထိုင်စားသောက်ရေးမှာ အခက်အခဲတွေနဲ့ ရင်ဆိုင်နေရပါတယ်။

ကရင်အမျိုးသမီးအစည်းအရုံး (KWO) အတွင်းရေးမှူး ၂ နော်အဲ့တဖွီဖောက “အခုအခြေအနေကတော့  အဓိကလိုအပ်တာက သူတို့အစားအသောက်ပေါ့။ အပြည့်အဝ မကူညီနိုင်တာလည်း ရှိတယ်။  အခုကလည်း မိုးတွေအရမ်းရွာတော့လည်း သူတို့နေထိုင်ရတာလည်း အခက်အခဲရှိတယ်” လို့ ပြောပါတယ်။

ပြီးခဲ့တဲ့ ဇူလိုင် ၃ ရက်နေ့နဲ့ ၄ ရက်နေ့တွေက စစ်ကောင်စီက ဝေါလေမြိုင်ကျေးရွာအတွင်းကို လက်နက်ကြီး အဆက်မပြတ် ပစ်ခတ်ခဲ့တာကြောင့် ဒေသခံ ၃ ယောက် ထိခိုက်ဒဏ်ရာရရှိခဲ့ပြီး ဒဏ်ရာပြင်းထန်တဲ့ ‌ဒေသခံ ၁ ယောက် သေဆုံးခဲ့ပါတယ်။ 

ဒါ့အပြင် စစ်ရှောင်ပြည်သူတွေကို လူသားချင်းစာနာထောက်ထားမှု အကူအညီတွေက လုံလောက်စွာ မပံ့ပိုးပေးနိုင်ပါက စားသောက်ရေးနဲ့ နေထိုင်ရေးမှာ အခက်အခဲရှိနိုင်တယ်လို့ ဒေသခံတွေက ပြောပါတယ်။

ဒေသခံတယောက်က “လူသားချင်းစာနာထောက်ထားမှု လုပ်ငန်းစဉ်နဲ့ပတ်သက်ပြီး လုပ်ဆောင်နေတဲ့ အဖွဲ့အစည်းတွေက စစ်ဘေးရှောင်အင်အားနဲ့ မညီမျှဘူး။ လုံလောက်စွာ မပံ့ပိုးပေးနိုင်ဘူးဆိုရင်တော့ အစားအစာတွေရော နေရေးထိုင်ရေးကော အခက်အခဲရှိနိုင်တယ်” လို့ ပြောပါတယ်။

စစ်အာဏာသိမ်းပြီးနောက်ပိုင်း စစ်ဘေးရှောင်ဦးရေ ၆ သိန်းခွဲခန့်သာ ရှိခဲ့ပေမဲ့ ၄ နှစ်ကျော် ကာလ အတွင်း  ၁၀ သိန်းကျော်အထိ  တိုးမြင့်လာခဲ့ပါတယ်။ ဒါ့အပြင် လူသားချင်းစာနာထောက်ထားမှု အကူအညီတွေလည်း အရေးပေါ်လိုအပ်နေတယ်လို့ အရပ်ဘက်အဖွဲ့အစည်းတွေရဲ့ ထုတ်ပြန်ချက် တွေအရ သိရပါတယ်။

 အောင်ခန့်