ပြက္ခဒိန်ရှိ ဇယားကွက်များနှင့် တိုင်းတာဆုံးဖြတ်လိုက်သည့်အခါ မကြာမီရက်ပိုင်းအတွင်း နှစ်ဟောင်းကုန်၊ နှစ်သစ်သို့ ကူးပြောင်းရောက်ရှိပေတော့မည်။ ပြက္ခဒိန်အဟောင်းတို့ နေရာ၌ ပြက္ခဒိန်အသစ်တို့ အစားထိုး ဝင်ရောက်လာ‌ချေတော့မည်။ နှစ်သစ်မှာ ကျန်းမာ ချမ်းသာပါစေ၊ လိုအင်ဆန္ဒပြည့်ဝပါစေဟု ၂၀၂၀ ကုန်ချိန်က တောင်းခဲ့သောဆုများသည် ၂၀၂၁ မှာတော့ မပြည့်ဝခဲ့။ 

၂၀၂၁ ဖေဖော်ဝါရီလတွင် ထင်မှတ်မထားသော စစ်အာဏာသိမ်းမှုကြောင့် တိုင်းပြည်သည်လည်း တခဏအတွင်းမှာပင် ဦး‌စောက်ကျွမ်းပြန် ဖြစ်ခဲ့ရပြန်ပါသည်။ အကျပ်အတည်း အခက်အခဲပေါင်းများစွာ ကြုံတွေ့ခဲ့ရသလို နေ့ရက်များသည်လည်း မှောင်အတိဖုံးခဲ့ရသည်။ အပြစ်မဲ့ပြည်သူများ၏ အသက်အိုးအိမ်စည်းစိမ်များ ပျက်စီးကာ ဘဝပေါင်းများစွာလည်း ပြိုလဲခဲ့ကြသည်။ မြို့ပြများ၊ တောရွာ၊ တောင်တန်းများတွင်လည်း အကြမ်းဖက်စစ်ကောင်စီကြောင့် စိတ်ရောကိုယ်ပါ လုံခြုံမှုဆိုသည်မှာ ဗလာနတ္ထိ။ 

စင်စစ် ၂၀၂၁ သည် မြန်မာပြည်သူများအတွက် နှစ်ဆိုးတစ်ခုသာ ဖြစ်ခဲ့ပါသည်။ ပြည်သူအားလုံး၏ ဘဝကံကြမ္မာများကို စစ်အာဏာသိမ်းမှုက အလုံးစုံ ဖျက်ဆီးပစ်လိုက်ပါတော့သည်။ ဤသို့သော အတိဒုက္ခများ၊ ဖိနှိပ်ညှဉ်းပန်းမှုများ ရှိနေသော်လည်း အခြားတဘက်မှာတော့ လူထုသည် အညံ့မခံ။ နိုင်အောင်တိုက်မည် ဆိုသည့် စိတ်ဓာတ်ဖြင့် တိုက်ပွဲဝင်လျက် ရှိကြသည်။ မိမိတို့၏ ဘဝကံကြမ္မာများကို ဖျက်ဆီးခဲ့သော လက်သည်တရားခံ အကြမ်းဖက်စစ်ကောင်စီကို ရရာလက်နက်၊ ရရာနည်းပေါင်းစုံများဖြင့် ကျရာအခန်းကဏ္ဍမှ ဆန့်ကျင်တော်လှန်လျက် ရှိကြသည်။ 

Invictus က‌ဗျာထဲကလို။ ငါ၏ဦးခေါင်းသည် သွေးချင်းချင်းဖြင့် ရဲရဲနီ၏၊ သို့သော် ညွှတ်ကား မညွှတ် ဆိုသလို။ 

အကြမ်းစစ်ကောင်စီမှ နေ့စဉ်နေ့တိုင်း ဖမ်းဆီးထောင်ချ၊ ညှဉ်းပန်းနှိပ်စက် သတ်ဖြတ်မှုများ၊ ဆုံးရှံးမှုများ ရှိနေသည့်တိုင် စစ်အာဏာရှင်စနစ် အပြီးတိုင်ချုပ်ငြိမ်းရန်အတွက် တာစူနေကြသည်။ ဟိုနိုင်ငံက ကူနိုးနိုး၊ ကုလသမဂ္ဂက ကယ်နိုးနိုး‌ မျှော်လင့်ချက်များကို စွန့်လွှတ်ကာ ကိုယ့်အားကိုယ်ကိုးရင်း အကြမ်းဖက်စစ်ကောင်စီကို တိုက်ပွဲဝင်နေကြသည်။ ပြည်သူမှာ ပြည်သူပဲ ရှိတယ် ဆိုသည့် ခံယူချက်ဖြင့် လက်တွဲညီညီ ရှေ့ဆက်လျက်ရှိကြသည်။ ဤသို့ ဤနှယ် ရှိသည့် ကျွန်မတို့ မြန်မာပြည် အခြေအနေကို တခါက ကြည့်ခဲ့ဖူးသည့် ဇာတ်ကားတစ်ကားနှင့် နှိုင်းယှဉ်စဉ်းစားကြည့်မိပါသည်။

ဇာတ်ကားအမည်က ‘127 hours’ ။ သည်ဇာတ်ကားက လူကြိုက်များသည့်အပြင် အကယ်ဒမီဆု တော်တော်များများ ရခဲ့ဖူးသည်။ ဇာတ်လမ်းအကျဉ်းကို ပြန်ပြောရသော်-

တစ်ရက်မှာတော့ အေရွန် ဆိုသည့် တောင်တက်သမားသည် မြို့တစ်မြို့က နက်ရှိုင်းသည့် တောင်တွေဆီကို တက်ရင်းနှင့် မထင်မှတ်ဘဲ ခြေချော်ကာ ပပ်ကြားအက်နေသော တောင်အောက်သို့ ပြုတ်ကျသွားသည်။ သူနှင့်အတူ ကျောက်တုံးကြီးပါ ပြုတ်ကျလာသည်။ ကျောက်တုံးကြီးက သူ့ညာလက်တစ်ဖက်ကိုပါ ဖိသွားသည်။ အပေါ်ကို လှမ်းအော်ကာ အကူအညီရလိုရငြား အော်ဟစ်တောင်းဆိုသည်။ အတန်ကြာသည်အထိ မည်သို့မျှ အကူအညီမရ။ ဒီကြားထဲ ကျောက်တုံးဖိခံထားရသည့်လက်မှာ ကြာလေ ပိုဆိုးလေ ဖြစ်သည်။ ဒါကြောင့် သူ့ဘာသာသူ အားကိုးရတော့သည်။ သူ၏လက်ကို ကျောက်တုံးအောက်မှ ဆွဲထုတ်ကြည့်သည်။ ထုတ်၍မရ။ ကျန်သည့်လက်တစ်ဖက်နှင့် အားကုန် မ ကာ ဆွဲထုတ်ကြည့်ဖို့ ကြိုးစားသည်။ မရ။ ခန္ဓာကိုယ်တစ်ခုလုံးကိုသုံး။ ဘယ်လိုမျှ မတတ်နိုင်။ သည်လိုနှင့် မရနိုင်တော့သည့်အဆုံး သူ့မှာ ပါလာသော ပစ္စည်း‌များ အကုန်ထုတ်ကြည့်ပြီး ပြဿနာကို ဖြေရှင်းဖို့ ရှာကြံကြိုးစားသည်။ ဓားတစ်ချောင်းတော့ တွေ့ပြီ။ ထိုဓားနှင့် သူ့ညာလက်ကို ဖိထားသော ကျောက်တုံးကို ပဲ့သွားအောင် အကြိမ်ကြိမ်ဖဲ့သည်။ ထူးမခြားနား။ ဇောချွေးတို့ ပြန်လာသည်။ ဘာလုပ်ရမည် မသိတော့။ သူ ဘာမျှ မတတ်နိုင်တော့။ ဒီလိုပုံစံနှင့် တရက်ပြီးတစ်ရက် တောင်ကြားအောက်ခြေမှာ သူ့အသက်သူ ရှင်သန်အောင် မွေးခဲ့ရသည်။ သူ့အခြေအနေက‌တော့ ကောင်းမလာသည့်အပြင် ပို၍ပင် ဆိုးလာသည်။ နောက်ဆုံး သူ့မှာ ပါလာသည့် အစာရိက္ခာလည်း လုံးဝပြတ်လပ်သွား၏။ ကျောက်တုံး ဖိခံထားရသည့်လက်မှာလည်း အချိန်ကြာလာတော့ သွေးပုပ်‌တွေစုကာ ပုပ်ချင်သလို ဖြစ်လာသည်။ ဒီကြားထဲ မိုးက ရွာလိုက်သေးသည်။ ငါးရက်မြောက်နေ့မှာတော့ သူ့ကိုယ်သူလည်း မဟန်တော့ဘူးဟု ထင်လာမိသည်။ တောင်တက်သမားတစ်ယောက် ဒီတောင်ကိုတော့ မကျော်နိုင်တော့ဘူးလို့ သူ စိုးရိမ်စပြုလာသည်။ ဒီတော့ သူ တစ်ခုခုကို ဆုံးဖြတ်ရတော့မည်။ သေခြင်းတရားက အသာစီးရနေသည့်တိုင် သူ အလျှော့မပေး။ အရှုံး‌ပေးဖို့ထက် ဘယ်လို အသက်ရှင်အောင် နေထိုင်ရမလဲဆိုတာကို သူ မရမက စဉ်းစားသည်။ အဆုံးမှာတော့ သူ၏ ကျောက်တုံးဖိခံထားရသော ညာဘက်လက်ကို အစိမ်းလိုက်ဖြတ်ပစ်ဖို့ ဆုံးဖြတ်လိုက်သည်။ ထိုမှတပါး အခြားရွေးစရာလည်း မရှိတော့ပြီ။ ဤသို့ဖြင့် ထိုမရဏ‌ဘေးမှ သူ လွတ်မြောက်လာခဲ့သည်။ စင်စစ် ဒီဇာတ်ကားက ဇာတ်ကားသက်သက်မျှ မဟုတ်။ အတ္ထုပ္ပတ္တိတစ်ခုကို အခြေခံပြီး ရိုက်ထားခြင်း ဖြစ်၏။ တောင်တက်သမား Aron Ralston၏ 2004 က ထွက်သော Between a Rock and a Hard Place ဟူသော ကိုယ်တိုင်ရေးအတ္ထုပ္ပတ္တိ စာအုပ်ကို အခြေခံကာ ရိုက်ကူးထားခြင်း ဖြစ်သည်။

မြန်မာပြည်၏ ယခုတော်လှန်ရေးသည်လည်း ဇာတ်ကားထဲက အဖြစ်အပျက်နှင့် ခပ်ဆင်ဆင်ပင်။ ထင်မှတ်မထားသော အာဏာသိမ်းမှုကြောင့် တတိုင်းပြည်လုံး ဆင်းရဲဒုက္ခတွင်းထဲ သက်ဆင်းခဲ့ရသည် မဟုတ်ပါလော။

အစပထမတွင် ဇာတ်ကားထဲက ဇာတ်ကောင်နည်းတူ အကြမ်းဖက်စစ်ကောင်စီ၏ မတရားဖိနှိပ်မှုကို ခံနေရသော ပြည်သူများက အကူအညီရလိုရငြား နိုင်ငံတကာအသိုင်းအဝိုင်းကို အကူအညီ‌ပေးဖို့ အော်ကြသည်။ သို့တိုင် ကုလ အပါအဝင် နိုင်ငံတကာအသိုင်းအဝိုင်းဘက်မှ ကြေညာချက်များကလွဲ၍ ယခုအချိန်ထိ မည်သည့်ထိရောက်သည့် အကူအညီမျှ မရခဲ့။ သည်တော့ ကိုယ့်အားကိုယ်ကိုးမှ ရတော့မည်ဟူသည့် ဘဝပေးအသိကို ရလာကြသည်။

ဇာတ်ကားထဲက ဇာတ်ကောင်သည် သူ၏လွတ်မြောက်ရေးအတွက် လက်တစ်ဖက်ကို စတေးခဲ့ရသလို မြန်မာပြည်သူများကလည်း တိုင်းပြည်စစ်ကျွန်ဘဝမှ လွတ်မြောက်ရေးအတွက် အသက်စွန့်၊ ဘဝစွန့်လွှတ်ကာ စ‌တေးနေကြသည်။ ယခုဆိုလျှင်ပင် ပြည်သူများ၏ ကိုယ့်အားကိုယ်ကိုး စိတ်ဓာတ်ဖြင့် တွန်းလှန်တိုက်ခိုက်မှုများကြောင့် အကြမ်းဖက်စစ်ကောင်စီသည် များစွာအထိနာလျက် ရှိနေပြီဖြစ်သည်။ ၎င်းတို့၏ အုပ်ချုပ်ယန္တရားများမှာလည်း လည်ပတ်လို့ မရ၊ သံတမန်မျက်နှာစာမှာလည်း မရှုမလှ ရှုံးနိမ့်ကာ စစ်ရေးအခြေအနေမှာပင် လေကြောင်းကို ထုတ်သုံးနေရပြီ ဖြစ်သည် မဟုတ်ပါလော။

နှစ်တစ်နှစ် ဆိုသည်ကို ပြက္ခဒိန်မှာပါသည့် ဇယားကွက်များနှင့် တိုင်းတာဆုံးဖြတ်လိုက်သည့်အခါ မကြာမီရက်ပိုင်းအတွင်း နှစ်ဟောင်းကုန်ကာ နှစ်သစ်သို့ ကူးပြောင်းရောက်ရှိပေတော့မည်။ နှစ်သစ်မှာ ကျန်းမာ ချမ်းသာပါစေ၊ လိုအင်ဆန္ဒပြည့်ဝပါစေဟု ၂၀၂၀ ကုန်ချိန်က တောင်းခဲ့သော ဆုများသည် ၂၀၂၁ မှာတော့ ပြည့်ဝခဲ့ခြင်းမရှိခဲ့ပေ။ ဒီနှစ်တွင်လည်း အစဉ်အလာအရ စစ်အာဏာရှင်စနစ် ချုပ်ငြိမ်းပါစေ။ ဒီအခြေအနေကြီးက အမြန်ဆုံး လွတ်မြောက်ရပါစေဟု ဆုတောင်းကြရမည်။ 

သို့စဥ်လျက် ဆုတောင်းနေရုံဖြင့် ကျမတို့၏ တော်လှန်ရေး အောင်မြင်ကာ ကျမတို့ ဘဝသာယာသွားမည် မဟုတ်ပေ။ တောင်းသည့်ဆုများက လက်တွေ့ဖြစ်ရပ်များနှင့် ထပ်တူကျလေ့ မရှိသည်ကို ၂၀၂၀ က ဖြစ်ရပ်များက အကောင်းဆုံးသက်သေခံလျက်ပင် ရှိသည်မဟုတ်ပါလား။ 

သို့ဆိုလျှင် ကျမတို့ ဘာလုပ်ကြမည်နည်း။ ဆုတောင်းမှုများနေရာတွင် ယခုထက်ပို၍ ကြိုးစားကြမည်ဆိုသည့် သန္နိဋ္ဌာန်များ ချမှတ်ကြရမည်။ ဆုတောင်းစကားတို့ နေရာတွင် စစ်အာဏာရှင်စနစ် အမြစ်ဖြတ်ရာ၌ လက်‌တွေ့လုပ်ဆောင်ချက်များဖြင့် အစားထိုးကြရမည်။ 

ဤသို့သော ပြည်သူလူထုတရပ်လုံး၏ ပိုမိုခိုင်မာ‌သည့် သန္နိဋ္ဌာန်များ၊‌ ဆုံးဖြတ်ချက်များဖြင့်သာ နှစ်သစ်ကို ဖြတ်သန်းကြမည်ဆိုလျှင် ၂၀၂၂ သည် စစ်အာဏာရှင်စနစ် အပြီးသတ်ချုပ်ငြိမ်းကာ ကျမတို့အားလုံး၏ ဆန္ဒဖြစ်သော ဖက်ဒရယ်ပြည်ထောင်စုကြီး ပေါ်ထွန်းလာမည့် နှစ်တစ်နှစ် ဖြစ်လာမည်မှာ ယုံမှားသံသယ မရှိနိုင်တော့ပြီ။

နွေဦးဇင်