“အိမ်ဖော်လိုလား ကော်ရီး (ကိုကြီး)” ဆိုတဲ့စကားကို လူမှုကွန်ရက် သုံးစွဲသူတွေ ရင်းနှီးကြမယ် ထင်ပါတယ်။ အဲဒီစကားနဲ့အတူ တဆက်တည်း ဒေါ်ခင်မာမြင့် ဆိုသူကိုလည်း မြင်ယောင်လာပါလိမ့်မယ်။ ပြီးခဲ့တဲ့ ဇူလိုင်လ ဒုတိယအပတ်မှာ ဟိုးလေးတကြော်ဖြစ်ခဲ့တဲ့ ရုပ်ရှင်သရုပ်ဆောင် သီဟတင်စိုးကို မုဒိမ်းမှုနဲ့ တရားစွဲဖို့ ကြိုးစားခဲ့တဲ့ အသက် ၄၀ အရွယ် အိမ်အကူ ဒေါ်ခင်မာမြင့်ရဲ့ တိုင်တန်းချက်ဟာ ရက်ပိုင်းမှာပဲ အမှုမှန် ပေါ်ပေါက်ခဲ့ပါတယ်။ သတင်းမီဒီယာတွေနဲ့ လူမှုကွန်ရက် စာမျက်နှာတွေကနေတဆင့် သတင်းချိတ်ဆက်မှုတွေ၊ စွပ်စွဲခံရတဲ့ မိသားစုကို ချစ်ခင်အားပေးမှုတွေဟာ အမှုမှန်ပေါ်ပေါက်ရေးအတွက် တစိတ်တပိုင်း အရေးပါခဲ့တယ်ဆိုတာ ငြင်းလို့မရပါဘူး။ ဒီလိုနဲ့ အချိန်တိုအတွင်းမှာ ဒေါ်ခင်မာမြင့်ဟာ အမှုဆင်ပြီး လိမ်လည်တိုင်ကြားခဲ့တယ် ဆိုတာကို ရန်ကုန်တိုင်းဒေသကြီးရဲတပ်ဖွဲ့က ဖော်ထုတ်နိုင်ခဲ့ပါတယ်။ အခုတော့ လိမ်လည်အမှုဆင်ခဲ့တဲ့ ဒေါ်ခင်မာမြင့်ဟာ တရားလိုအဖြစ်ကနေ တရားခံဘဝ ရောက်နေပါပြီ။ ဒါဟာ မုဒိမ်းမှုနဲ့ မတရားစွပ်စွဲခံရသူတွေအတွက် မင်္ဂလာရှိတဲ့ သတင်းကောင်းတခု ဖြစ်သလို မုဒိမ်းမှုကို ပစ်မှတ်ထားပြီး လိမ်လည်လုပ်စားနေသူတွေကိုလည်း ကောင်းကောင်းကြီး သင်ခန်းစာပေးလိုက်နိုင်တဲ့ အောင်မြင်မှုတခုလည်း ဖြစ်ပါတယ်။ ဒေါ်ခင်မာမြင့်နဲ့ အပေါင်းပါတွေရဲ့ လုပ်ကြံမှုကြီး ပေါ်ပေါက်ပြီး အရှုံးနဲ့ရင်ဆိုင်ရတာ ဝမ်းသာစရာပါ။ ဒါပေမယ့် သူနဲ့အတူ ဘယ်အရာတွေ ကျရှုံးခဲ့ရပါသလဲ။ အဲဒါကတော့ victim blaming (ကျူးလွန်ခံရသူကို အပြစ်တင်ခြင်း) အလေ့အထနဲ့ အသားကျနေတဲ့ ကျမတို့ လူမှုအသိုင်းအဝိုင်းကြီးပါပဲ။ ဒီကျရှုံးမှုဟာ ဒေါ်ခင်မာမြင့်လို လိမ်လည်လုပ်ကြံတာ မဟုတ်တဲ့ မြန်မာနိုင်ငံက မုဒိမ်းမှု ကျူးလွန်ခံရသူပေါင်း များစွာအတွက် မသိမသာနဲ့ အထိနာလှတဲ့ ကျရှုံးမှုတခု ဖြစ်ပါတယ်။ ဒီနေရာမှာ ဒေါ်ခင်မာမြင့် ကျူးလွန်တဲ့အမှု မှန်ခြင်း၊ မှားခြင်း ဦးတည်ပြီး ဆိုလိုခြင်းမဟုတ်ပါ။ အမှုတခု ထွက်ပေါ်လာတဲ့အခါ လူပုဂ္ဂိုလ်အခြေခံပြီး ကျူးလွန်ခံရသူလို့ ယူဆရသူ (တရားလို) အပေါ် ကျား၊ မ အခြေပြု ပုံစံခွက်တွေထဲကနေ ခန့်မှန်းဝေဖန်မှုတွေရဲ့ အကျိုးဆက်တွေကို အဓိက ပြောချင်တာပါ။ ပထမတချက် ပြောချင်တာကတော့ အသက်အရွယ်အပေါ် အခြေခံတဲ့ ယူဆချက်ပါ။ “ပိုင်ဆိုင်ထားတဲ့ရုပ်နဲ့ ပိုင်ဆိုင်ထားတဲ့ အသက်အရွယ်အရ ပြောမယ်ဆိုရင် မုဒိမ်းကျင့်ရမယ့် တန်းထဲတော့ မပါဘူး….” ဆိုပြီး လူမှုကွန်ရက်ပေါ်မှာ သတင်းဓာတ်ပုံတွေနဲ့အတူ အမျိုးသားတဦးက ရေးတင်ခဲ့ပါတယ်။ ဒီလို အဓိပ္ပာယ်မျိုးနဲ့ လူပေါင်းများစွာ ဝေဖန် ပြောဆိုနေကြတာကိုလည်း တွေ့ရပါတယ်။ ဒီလို သုံးသပ်ပြောဆိုမှုတွေကြောင့် မုဒိမ်းမှု ကျူးလွန်ခံရသူတွေမှာ အသက်အရွယ် ကန့်သတ်ချက် ရှိသလားဆိုတာ မေးခွန်းထုတ်စရာပါ။ လွန်ခဲ့တဲ့နှစ်တုန်းကလည်း အသက် ၇၀ ကျော်အရွယ် သီလရှင် အဘွားအိုတဦးကို မုဒိမ်းကျင့်မှုနဲ့ လူလတ်ပိုင်း လူရွယ်တဦး အဖမ်းခံရတဲ့ သတင်းကို စံတော်ချိန်မှာ ဖော်ပြခဲ့ပါတယ်။ ပြီးခဲ့တဲ့ မေလထဲမှာလည်း လပွတ္တာမြို့နယ်ဘက်မှာ အသက် ၈၀ ကျော်အရွယ် အဘွားအိုတဦးကို အသက် ၂၀ ဝန်းကျင်ရှိ လူငယ်တဦးက မုဒိမ်းကျင့်ခဲ့လို့ ဆေးရုံပို့ခဲ့ရကြောင်း ကရုဏာမျက်ဝန်း လူမှုကူညီရေးအဖွဲ့က ဆိုပါတယ်။ ဒါပေမယ့် မုဒိမ်းမှု မြောက်၊ မမြောက်ကိုတော့ အခုထိ ရုံးတင်စစ်ဆေးနေသေးတယ်လို့ သိရပါတယ်။ တဖက်မှာလည်း သက်ငယ်မုဒိမ်းကတော့ အသက် ၂ နှစ်ကစလို့ ၁၈ နှစ်အောက် မိန်းကလေးငယ်တွေကို အပြင်လူ သူစိမ်း၊ ဆွေမျိုးသားချင်းတွေကသာမက ဖခင်အရင်းအချာကတောင် မုဒိမ်းပြုကျင့်မှုတွေ ရှိနေတာ သတင်းအချက်အလက်တွေအရ ငြင်းချက်ထုတ်စရာ မရှိပါဘူး။ ဒီလို အသက်အရွယ် ကြီးမားသူတွေ၊ လူမမည် ကလေးငယ်တွေကို ဘာလို့ ပစ်မှတ်ထားပြီး ကျူးလွန်နေကြသလဲဆိုတာ သေချာတိကျတဲ့ အဖြေ ဘယ်သူမှ မပေးနိုင်သေးပါဘူး။ ဒါပေမယ့် သေချာတာတခုက ဒီအသက်အရွယ်တွေကို လွယ်လွယ်နဲ့ မုဒိမ်းကျင့်ခွင့်ပေးနေတဲ့ အခြေအနေကို လူ့အသိုင်းအဝိုင်းက ဖန်တီးပေးနေတယ် ဆိုတာပါ။ “ဒီအရွယ်ကြီး ဘယ်သူမှ လာမလုပ်ဘူး”၊ “ကလေးပဲဟာ ဘာမှမဖြစ်ပါဘူး” ဆိုတဲ့ သတ်မှတ်ယူဆချက်က သူတို့တွေရဲ့ လုံခြုံမှုတံခါးကို အခွင့်အရေးသမားတွေအတွက် အဆုံးမဲ့ ဖွင့်ပေးလိုက်တာပါပဲ။ ဒီယူဆချက်တွေရဲ့ နောက်ကွယ်မှာ ဒီအသက်အရွယ်နဲ့ မိန်းကလေးငယ်၊ အမျိုးသမီးကြီးတွေ၊ အဘွားအရွယ်တွေက ပစ်မှတ်ဖြစ်လာတာပါပဲ။ ဒီအသက်အရွယ်တွေဟာ အင်အားအရ အားနည်းနိုင်တယ်ဆိုတဲ့ အချက်အပြင် “ဒီရုပ် ဒီရည်နဲ့ မဖြစ်နိုင်” ဆိုတဲ့ ယူဆချက်တခုက မုဒိမ်းသမားတွေကို ကင်းလွတ်ခွင့်ပေးနေတာပါ။ အဆိုးဆုံးကတော့ ဒီလိုအယူအဆတွေ များလာလေလေ ကျူးလွန်ခံရသူတွေအနေနဲ့ တရားရုံးရှေ့ ရောက်တဲ့အထိ အကူအညီတောင်းခံဖို့ အဟန့်အတား ဖြစ်လာလေလေ ဖြစ်လာတာပါ။ ဒါကြောင့် ဘယ်အသက်အရွယ်ကဖြင့် မုဒိမ်းကျင့်ရမယ့်တန်းမှာ မရှိလို့ မဖြစ်နိုင်ဘူးဆိုတဲ့ ယူဆချက်တွေ လူအများစုရဲ့ တွေးခေါ်မှုထဲ စိမ့်ဝင်နေတာဟာ အမှုမှန်ပေါ်ပေါက်ရေးအတွက် ဘယ်လိုမှ အထောက်အကူ မဖြစ်သလို အမှန်တကယ် ကျူးလွန်နေသူတွေဘက်ကတောင် တဖက်တလမ်းက ကာကွယ်ပေးနေတဲ့ အတွေးအခေါ်ဆိုးလို့ သတ်မှတ်လို့ရပါတယ်။ ဒီနေရာမှာ လိမ်လည်အမှုဆင်ပြီး မုဒိမ်းမှုကို ခြေကုပ်ယူလို့ မဟုတ်မမှန် လုပ်စားနေသူတွေအတွက် ဆိုလိုခြင်းမဟုတ်ဘူးဆိုတာ ထပ်မံပြောလိုပါတယ်။ သူတို့ရဲ့ လုပ်ရပ်အတွက် ဥပဒေအရ အရေးယူနိုင်တဲ့ လမ်းကြောင်းတွေ ရှိထားပြီးသားပါ။ ဒုတိယအချက်ကတော့ ရုပ်ဆင်းအင်္ဂါပါ။ “ကျင့်လိုက်တဲ့ မိန်းမက အရမ်းချော အရမ်းလှလို့ စိတ်မထိန်းနိုင်လို့ မှားသွားတယ် ထင်နေတာ၊ အခု ဘွားတော်ရုပ်ကိုကြည့်ရင် တရေးနိုး ထထိုင်ရင်တောင် ကြည့်ချင်စရာ တကွက်မှမရှိ..” ဆိုပြီး အမျိုးသမီးတဦးက လူမှုကွန်ရက်ပေါ်မှာ မှတ်ချက်ပေးခဲ့တာပါ။ ဒီလိုသဘောမျိုးပါတဲ့ မှတ်ချက်မျိုးတွေကိုလည်း လူအတော်များများ၊ အချို့မီဒီယာကတဆင့် သတင်းအချက်အလက် ဖြန့်ဝေသူတွေကြားထဲမှာတင် ဟာသလုပ်ပြီး ပြောနေကြသူတွေ တပုံတပင် တွေ့ရပါတယ်။ ပိုဆိုးတာက အမျိုးသမီးတွေထဲမှာပင် ဒါကို ထောက်ခံ ပြောဆိုနေကြတာပါ။ အမျိုးသမီးတယောက် ဘယ်လိုနေရင်၊ ဘယ်လိုဝတ်ရင်၊ ဘယ်လိုလှနေရင်ဖြင့် “မုဒိမ်းပါ ကျင့်ချင်တယ်” ဆိုတဲ့ အယူအဆတွေဟာ လူအတော်များများရဲ့ နှုတ်ဖျားမှာ ယဉ်ပါးနေတာဟာ မုဒိမ်းမှုကို လက်သင့်ခံနည်း တမျိုးပါပဲ။ ဒါဟာ လူ့အဖွဲ့အစည်းတရပ်အတွက် အတော်ဝမ်းနည်းစရာ ကောင်းပါတယ်။ တဖက်မှာ ယေဘုယျ သတ်မှတ်ထားတဲ့ ရုပ်ရည်မရှိတဲ့သူတွေဟာ မုဒိမ်းကျင့်ချင်စရာ မရှိဘူးဆိုတဲ့ အတွေးအခေါ်မျိုးကလည်း မုဒိမ်းမှု ကျူးလွန်သူတွေကို အခွင့်အရေးပေးနေတာပဲ ဖြစ်ပါတယ်။ ဒါကြောင့်လည်း လမ်းဘေးလေလွင့်နေတဲ့၊ တောက်တောက်ပြောင်ပြောင် မရှိတဲ့၊ အမျိုးသမီးတွေ၊ စိတ်ပိုင်းဆိုင်ရာ ချို့ယွင်းပြီး လမ်းဘေးမှာနေရတဲ့ အမျိုးသမီးတွေအပေါ် ကျူးလွန်တဲ့ မုဒိမ်းမှုတွေဟာ ဥပဒေရှေ့မှောက် ရောက်လာဖို့ နေနေသာသာ ပတ်ဝန်းကျင်ရဲ့ အာရုံစိုက်မှုတောင် မရတဲ့အဖြစ်တွေ မနည်းပါဘူး။ ဒါဟာ အသက်အရွယ်မရွေးမှာ ဖြစ်နေသလို အပျိုဖြစ်ခြင်း၊ ကလေးအမေဖြစ်ခြင်း၊ ရုပ်ဆိုးခြင်း၊ ရုပ်ချောခြင်းအပေါ် မူတည်တာမဟုတ်ဘဲ အခွင့်အရေးရရင်ရသလို မုဒိမ်းမှု ကျူးလွန်နေကြတယ်ဆိုတာ ပေါ်လွင်ပါတယ်။ မုဒိမ်းမှုတခု စွဲချက်ထွက်လာပြီဆိုရင် တရားဥပဒေ လုပ်ထုံးလုပ်နည်းအရ အဆင့်ဆင့် စစ်ဆေးပြီး တရားဥပဒေကသာ အမှုမြောက် မမြောက်၊ အပြစ်ရှိခြင်း၊ မရှိခြင်းကို အဆုံးအဖြတ်ပေးမှာ ဖြစ်ပါတယ်။ လူတွေရဲ့အမြင်ကလည်း အမှုတခုဖြစ်လာရင် ဖြစ်နိုင်ခြေ ရှိ၊ မရှိ ဝေဖန်သုံးသပ်ကြတာကလည်း သဘာဝပဲ ဖြစ်ပါတယ်။ လိမ်လည်လုပ်ကြံနေတာလား၊ ဘယ်လို အကျိုးအကြောင်းကြောင့် မဖြစ်နိုင်သလဲ ဆိုတာကို နည်းလမ်းပေါင်းများစွာနဲ့ ဝေဖန် သုံးသပ်ကြပါတယ်။ ဒါပေမယ့် လူမှုပတ်ဝန်းကျင်ရဲ့ အတွေးအမြင်မှာ ဘယ်လိုအတန်းအစားကတော့ မုဒိမ်းကျင့်လို့ရတဲ့ အတန်းအစား၊ ဘယ်အသက်အရွယ်ကတော့ မဖြစ်နိုင်ဘူး၊ ဘယ်လို နေထိုင်ပြုမူရင်တော့ မုဒိမ်းကျင့်ခံရတာတောင် နည်းသေးတယ်၊ ဘယ်လိုရုပ်ရည်ကဖြင့် ဘယ်သူမှ မုဒိမ်းကျင့်ချင်မှာ မဟုတ်ဘူး၊ စသဖြင့် သိမ်ဖျင်းသေးနုပ်တဲ့ စဉ်းစားရှုမြင်ချက်တွေ လူ့အသိုင်းအဝိုင်းထဲမှာ သက်ဝင်ရှင်သန်နေတာဟာ သွယ်ဝိုက်တဲ့နည်းနဲ့ မုဒိမ်းမှုကို လက်သင့်ခံနေတာပါ။ တဖက်မှာလည်း အဲဒီ အသက်ရွယ်အပိုင်းအခြား၊ (ဒါမှမဟုတ်) လူမှုအသိုင်းအဝိုင်းက သတ်မှတ်ထားတဲ့ ရုပ်ရည်ကန့်သတ်ချက်ရှိတဲ့ ကျူးလွန်ခံရသူ အမျိုးသမီးတွေရဲ့ အသံတွေ တရားရုံးရှေ့မှောက် မရောက်လာအောင် ဟန့်တားလိုက်တာပါပဲ။ တချိန်တည်းမှာ လူမှုအသိုင်းအဝိုင်းရဲ့ ဒီအမြင်တွေအပေါ် သက်ဝင်မှုကြီးလေလေ၊ အဲဒီ လူမှုအသိုင်းအဝိုင်းကနေ ပေါက်ဖွားလာတဲ့ တရားရေးစနစ်အောက်မှာ အမှုထမ်းနေတဲ့သူတွေ အပေါ်လည်း အကျိုးသက်ရောက်မှု အတိုင်းအတာက စိုးရိမ်စရာ ဖြစ်လေလေပါ။ အဲဒီလိုဖြစ်လာခဲ့ရင် သက်သေခံ အထောက်အထား မပြည့်စုံတဲ့ အမှုတွေမှာ တရားသူကြီးရဲ့ ဆင်ခြင်တုံတရားနဲ့ အဆုံးအဖြတ်ပေးရတဲ့အခါ တရားမျှတမှုဆိုတာ အာမခံချက် မဲ့နေဦးမှာ ဖြစ်ပါတယ်။ ဒါဟာ အဆိုးဆုံးထဲက တခုဖြစ်တဲ့ မုဒိမ်းကျင့်ခွင့်ရတဲ့ လူမှုရေးလိုင်စင် ပေးထားသလိုပါပဲ။ ရုပ်ပိုင်းဆိုင်ရာ၊ ကျား၊ မ ဆိုင်ရာ အခြေပြုပြီး ကျူးလွန်ခံရသူကို အပြစ်တင်တာဟာ သိမ်ဖျင်းနိမ့်ကျတဲ့ ရှက်စရာ အပြုအမူအဖြစ် လူအများက လက်ခံကျင့်သုံးမှု များလာမှ လုံခြုံကျန်းမာတဲ့ လူမှုအဝန်းအဝိုင်းတခု တည်ဆောက်နိုင်မှာ ဖြစ်ပါတယ်။ အခုလက်ရှိအချိန်ထိကတော့ ဒေါ်ခင်မာမြင့်လို လိမ်လည်တိုင်ကြားသူအတွက် အမှုတကြိမ် ကျရှုံးခဲ့ပေမယ့် မုဒိမ်းမှုတခု ထွက်ပေါ်လာတိုင်း တိုင်ကြားသူအပေါ် တရားနည်းလမ်းမကျတဲ့ ဓလေ့ထုံးတမ်း၊ အစွဲ၊ အမြင်၊ အယူအဆတွေနဲ့ ပြစ်တင်ရှုတ်ချတတ်တဲ့ အလေ့အထ လွှမ်းမိုးနေသေးတဲ့ မြန်မာ့လူမှုအသိုင်းအဝိုင်းကတော့ အကြိမ်ကြိမ် ကျရှုံးနေဦးမှာ ဖြစ်ပါတယ်။ မယ်လွန်း (hiburma.net ဝက်ဘ်ဆိုက်မှ ပြန်လည်ဖော်ပြသည်။)