ဖက်ဒရယ်စနစ်ဆိုင်ရာ အခြေခံအယူအဆများနှင့် မြန်မာ့ဖက်ဒရယ်အရေး
DVB
·
April 5, 2017
ဖက်ဒရယ်စနစ်ဆိုတာ ဘာလဲ
ဖက်ဒရယ်စနစ်သည် ယနေ့အချိန်အခါတွင် နိုင်ငံတကာလူ့အသိုင်းအဝန်းတွင် အရေးကြီးပြီး ကျယ်ကျယ်ပြန့်ပြန့် အသုံးတည့်နေသော နိုင်ငံရေးဖြစ်လို့နေပါပြီ။ ကမ္ဘာ့တိုင်းပြည်များ၏ ၇၀ ရာခိုင်နှုန်းခန့်မှာ ဖက်ဒရယ်စနစ်၏ လက္ခဏာတချို့ လက်ခံကျင့်သုံးနေပြီး ကမ္ဘာ့တိုင်းပြည် ၂၀ ကျော်ခန့်မှာ ဖက်ဒရယ်စနစ် ကျင့်သုံးသည့် တိုင်းပြည်များ ဖြစ်ကြသည်။ အဆိုပါ ဖက်ဒရယ်စနစ်ကျင့်သုံးသည့် နိုင်ငံများရှိ လူဦးရေမှာ ကမ္ဘာ့လူဦးရေ၏ ၄၀ ရာခိုင်နှုန်းခန့် ရှိသည်။
ယခုအခါ ကမ္ဘာ့နိုင်ငံ အတော်များများတွင် တနိုင်ငံချင်းစီ၏ မတူ ကွဲပြားသော သမိုင်းရေး အချက်အလက်များနှင့် ဖြတ်သန်းမှုများအလျောက် သင့်တော်ရာပုံစံများဖြင့် ဖက်ဒရယ်စနစ်ကို ကျင့်သုံးလျက်ရှိကြရာ ကမ္ဘာ့နိုင်ငံကြီးများဖြစ်ကြသည့် ရုရှား၊ အမေရိကန် ဘရာဇီး၊ ကနေဒါ၊ သြတြေးလျ၊ အိန္ဒိယတို့အပြင် အသေးငယ်ဆုံးသောနိုင်ငံများ ဖြစ်ကြသည့် ဘယ်လ်ဂျီယမ်၊ ဆွစ်ဇာလန်နှင့် ကာရစ်ဗီယန်ပင်လယ်တွင်းမှ (Saint Kitts and Nevis) စိန့်ကစ်နှင့် နီးဗစ် စသည့် နိုင်ငံများ အပါအဝင် ၂၇ နိုင်ငံ (၂၀၁၃ ခုနှစ် အောက်တိုဘာလ အထိ) ရှိပြီဟု ဆိုပါသည်။ ကျင့်သုံးသည့် ပုံစံများမှာလည်း တနိုင်ငံနှင့် တနိုင်ငံ အပ်ကျမပ်ကျ တူညီကြသည် မဟုတ်ချေ။
သို့ဖြစ်လေရာ “ဖက်ဒရယ်စနစ်ဆိုတာ ဘာလဲ” ဆိုသည်ကို နားလည် သဘောပေါက်ရန် အရေးကြီးသည်။ ကနေဒါနိုင်ငံ၏ ပထမဆုံးဝန်ကြီးချုပ် ဆာဂျွန် အေ မက္ကဒေါ်နယ်က ဖက်ဒရယ်စနစ်ကို ဤသို့ အဓိပ္ပာယ်ဖွင့်ဆိုခဲ့သည်။
“ဒေသဆိုင်ရာ ကိစ္စရပ်များကို ဖြေရှင်းရန် ‘ဒေသဆိုင်ရာ အစိုးရများနှင့် ဥပဒေပြု အဖွဲ့အစည်းများ ပါဝင်ပြီး’၊ တနိုင်ငံလုံးဆိုင်ရာ ကိစ္စများကို ဖြေရှင်းရန် အမျိုးသားအစိုးရ တရပ်နှင့် ဥပဒေပြုအဖွဲ့အစည်း”၊ ပါဝင်ပေါင်းစပ်ထားသည့်စနစ် ဖြစ်ပေသည်။
နိုင်ငံအသီးသီးတွင် ဖက်ဒရယ်စနစ်ကို မတူသော ဒီဂရီအမျိုးမျိုးဖြင့် ကျင့်သုံးနေ ကြသော်လည်း၊ အဓိကကျသည့် အချက်မှာ အာဏာခွဲဝေမှုနှင့် ကိုယ်ပိုင်အုပ်ချုပ်ရေး ကျင့်သုံးမှု ဖြစ်သည်။
အာဏာခွဲဝေမှုနှင့် ကိုယ်ပိုင်အုပ်ချုပ်ရေးကို အာမခံသည့်အရာ
အာဏာခွဲဝေမှု ဆိုသည်မှာ အုပ်ချုပ်ရေးအာဏာကို ခွဲဝေကျင့်သုံးခြင်း ဖြစ်သည်။ နိုင်ငံ တခုလုံးကို အုပ်ချုပ်သည့် ဗဟိုအစိုးရ အာဏာနှင့် တိုင်းဒေသကြီး သို့မဟုတ် ပြည်နယ်များတွင် အုပ်ချုပ်သည့် အာဏာတို့အကြား မည်သို့ ခွဲဝေထားသနည်း ဆိုခြင်းပင် ဖြစ်သည်။
တချို့သောနိုင်ငံများတွင် နှစ်ဆင့်မက သုံးဆင့်မျှ ခွဲခြားထားသည်လည်း ရှိသည်။
ကိုယ်ပိုင်အုပ်ချုပ်ရေး ဆိုသည်မှာကား အဆိုပါ ခွဲဝေထားသော အာဏာများကို မိမိတို့ဒေသအတွက် အကောင်းဆုံးဟု ယုံကြည် ယူဆသည့်အတိုင်း လွတ်လပ်စွာ ဆုံးဖြတ်ချက်ချ၊ လုပ်ပိုင်ခွင့်ရှိရေးပင် ဖြစ်သည်။ တချိန်တည်းမှာပင် ၎င်းတို့အနေဖြင့် နိုင်ငံတခုလုံး၏ အစိတ်အပိုင်းဖြစ်သည်ကို သိရှိနားလည်ရမည် ဖြစ်ပြီး တနိုင်ငံလုံးနှင့် ဆိုင်သည့် ဥပဒေများကို ရိုသလိုက်နာရန် လိုအပ်သည်။
သဘောထားချင်း မတိုက်ဆိုင်၊ ငြင်းခုံမှုများမှာ ဤကိုယ်ပိုင်အုပ်ချုပ်သည့်ကိစ္စမှ ထွက်ပေါ်လာလေ့ရှိသည်။ မည်သည့်အရာများက ဒေသဆိုင်ရာတို့၏ တာဝန်ဝတ္တရားများ ဖြစ်၍ မည်သည့်အရာများက ဗဟိုအစိုးရ၏ ချုပ်ကိုင်မှုအောက်တွင် ရှိသင့်သည် ဆိုသော ကိစ္စများနှင့်ပတ်သက်၍ အငြင်းပွားရတတ်သည်။
သို့ဖြစ်၍ အာဏာခွဲဝေမှု၊ ကိုယ်ပိုင်အုပ်ချုပ်မှုတို့နှင့် ပတ်သက်လျင် တိကျသေချာမှု ရှိစေရန် ရေးသားထားသော ဖွဲ့စည်းပုံအခြေခံဥပဒေဖြင့် အာမခံကြရသည်။
နိုင်ငံအသီးသီးတွင် ဖက်ဒရယ်စနစ် ကျင့်သုံးလာရခြင်းနှင့်ပတ်သက်ပြီး အောက်ပါ အခြေခံ ၅ ချက်ကြောင့် ဖြစ်လေ့ရှိကြောင်း နိုင်ငံရေးသုတေသီများက ဆိုသည်။
(၁) အုပ်ချုပ်မှု လွယ်ကူစေရန်၊ (၂) ပြည်ပ ခြိမ်းခြောက်မှုရန်ကို ကာကွယ်ရန်၊ (၃) ပြည်တွင်းပဋိပက္ခများကို ဖြေရှင်းရန်၊ (၄) စီးပွားရေး ဖွံ့ဖြိုးတိုးတက်စေရန်၊ (၅) တိုင်းရင်းသား လူမျိုးများ၏ မတူကွဲပြားမှုကို အသိအမှတ်ပြု ထိန်းသိမ်းရန်၊ (၆) လူများစုနည်းတူ လူနည်းစုက ဒီမိုကရေစီအခွင့်အရေးများ ခံစားစေနိုင်ရန် စသည့်အကြောင်းများကြောင့် ဖြစ်လေ့ ရှိကြသည်။
ဖက်ဒရယ်စနစ်တွင် ဗဟိုအစိုးရတရပ်နှင့် အောက်အဆင့် ပြည်နယ်၊ သို့မဟုတ် တိုင်းဒေသကြီး၊ သို့မဟုတ် ပြည်ထောင်စု နယ်မြေအစိုးရများ ပါဝင်ပြီး အာဏာကို ခွဲဝေကျင့်သုံးသည်။ သို့ဖြစ်ရာ နိုင်ငံသားတို့ လိုက်နာရန် ဥပဒေများကို ဗဟိုအဆင့်ကသော် လည်းကောင်း၊ ပြည်နယ်နှင့် တိုင်းဒေသကြီးအဆင့်ကသော် လည်းကောင်း ဖွဲ့စည်းပုံ အခြေခံဥပဒေက ခွဲဝေသတ်မှတ်ထားသည့်အတိုင်း ပြဋ္ဌာန်းအုပ်ချုပ်လေ့ရှိသည်။
ဖက်ဒရယ်ပြည်ထောင်စုတခု မည်သို့ဖြစ်တည်လာသလဲ ရှုထောင့်မှ အမြင်
နိုင်ငံတနိုင်ငံတွင် ဖက်ဒရယ်စနစ် စတင်ဖြစ်တည်လာပုံ သို့မဟုတ် အာဏာများ မည်သို့ခွဲဝေထားပုံကို ကြည့်၍ နှစ်မျိုးနှစ်စား ခွဲခြားနိုင်ကြောင်း ပညာရှင်များက ဆိုသည်။ ၎င်းတို့မှာ (၁) Coming together federalism ‘အတူတကွ ယှဉ်တွဲနေထိုင်ရေး ဖက်ဒရယ်စနစ်’ နှင့် (၂) Holding together federalism ‘အတူပေါင်းစည်းရေး ဖက်ဒရယ်စနစ်’ ဟူ၍ ဖြစ်သည်။
(၁) အတူယှဉ်တွဲနေထိုင်ရေး ဖက်ဒရယ်ပုံစံ (Coming together federal) မှာ မူလက လွတ်လပ်စွာ တည်ရှိခဲ့သော နိုင်ငံများ သို့မဟုတ် ယူနစ်များက စိတ်တူ ကိုယ်တူဖြင့် တနိုင်ငံတည်းအဖြစ် ပေါင်းစည်းကြရန် ရည်ရွယ်ပြီး ဗဟိုအစိုးရတရပ်ကို ဖန်တီးကာ အာဏာ မည်မျှအပ်နှင်းမည်နည်း ဆိုသည့် သမိုင်းဆိုင်ရာအခြေခံမှ ပေါ်ပေါက်လာသည့် ပုံစံဖြစ်ပါသည်။ အထင်ရှားဆုံး သာဓကမှာ အမေရိကန်ပြည်ထောင်စုဖြစ်ပြီး ဆွစ်ဇာလန်၊ သြစတြေးလျတို့လည်း ပါဝင်သည်။
မြောက်အမေရိကတိုက်ရှိ ဗြိတိန်နိုင်ငံ၏ ကိုလိုနီ ၁၃ ခုနှင့် ဗြိတိန်အစိုးရတို့အကြား ၁၇၆၅ ခုနှစ်မှစ၍ တံဆိပ်ခေါင်းဥပဒေ (Stamp Act) နှင့်ပတ်သက်ကာ အချင်းများကြရာမှ ၁၇၇၅ ခုနှစ်တွင် စစ်ပွဲဖြစ်ပွားပြီး ၁၇၇၆ ခုနှစ်တွင် လွတ်လပ်ရေး ကြောညာခဲ့သည်။ ဂရိတ်ဗြိတိန် လက်အောက်တွင် ကိုလိုနီအဖြစ် နေထိုင်လာခဲ့ကြသော အတွေ့အကြုံအရ အဆိုပါ ၁၃ နယ်သည် အားကောင်းသော ဗဟိုအစိုးရကို မလိုလားကြချေ။ သို့ဖြစ်၍ လွတ်လပ်ရေး ကြေညာပြီးနောက် ၁၇၈၁ ခုနှစ်တွင် လျော့ရဲရဲရှိသော ပြည်ထောင်စုတခုကို (Articles of Confederation) ဟု ခေါ်ဆိုသော အခြေခံဥပဒေဖြင့် ဖွဲ့စည်းကြသည်။ ဤအခြေခံဥပဒေဖြင့် ပြည်နယ်များအကြား ဗဟိုအစိုးရထက် ပိုမိုသောအာဏာများကို အညီအမျှ ခွဲဝေယူခဲ့ကြသည်။ အကန့်အသတ်ရှိသော အာဏာကိုသာ ပေးအပ်ထားသဖြင့် အားနည်း ချည့်နဲ့သော ဗဟိုအစိုးရတရပ်နှင့် လျော့တိလျော့ရဲနိုင်လှသော ကွန်ဖက်ဒရေးရှင်း တခုကိုသာ ပေါ်ထွန်းစေသည်။ ပြည်နယ်များချင်းချင်းအကြား ရှုပ်ထွေး၍ ခက်ခဲသော ပြဿနာများ ဖြေရှင်းရန်နှင့် ပြည်ပအန္တရာယ်ကို တွန်းလှန်ရန် အားကောင်းသော ဗဟိုအစိုးရတရပ် လိုအပ်ကြောင်း သဘောပေါက်လာသည့် ၁၇၈၉ ခုနှစ်ကျမှသာ ပိုမိုအားကောင်းသော ဗဟိုအစိုးရကို ဖွဲ့စည်းနိုင်မည့် အခြေခံဥပဒေ (Constitution of 1789) တရပ်ကို အတည်ပြုနိုင်ခဲ့ကြသည်။
ယခုအခါ အမေရိကန်ပြည်ထောင်စုမှာ ဗဟိုအစိုးရမှ လုပ်ပိုင်ခွင့်အာဏာ ပိုမိုအားကောင်းသော ဖက်ဒရယ်ပြည်ထောင်စုနိုင်ငံ ဖြစ်နေပါပြီ။
(၂) အတူပေါင်းစည်းရေး ဖက်ဒရယ်ပုံစံ (Holding together) ဆိုသည်မှာ မူလဗဟိုက တစုတစည်းတည်း ချုပ်ကိုင်ထားသော တပြည်ထောင်နိုင်ငံရေးစနစ်မှ လိုအပ်ချက်များအရ အာဏာများကို ဗဟိုနှင့် အောက်အဆင့်များ ခွဲဝေကျင့်သုံးသည့်ပုံစံ ဖြစ်ပါသည်။
ဤသို့သောနိုင်ငံမျိုးမှာ နယ်ချဲ့လက်အောက်မှ လွတ်လပ်ရေးရသည့်အချိန်တွင် ဖြစ်စေ၊ ပြည်တွင်းစစ်ကြောင့် ပြိုကွဲသွားမည်ကို စိုးရိမ်သောကြောင့် ဖြစ်စေ၊ မူလက တပြည်ထောင်စနစ်ကို ကျင့်သုံးခဲ့ရာမှ ဤဖက်ဒရယ်စနစ်ကို ပြောင်းလဲကျင့်သုံးခြင်း ဖြစ်သည်။ အထင်ရှားဆုံးသာဓကမှာ အိန္ဒိယနိုင်ငံဖြစ်ပြီး၊ စပိန်နှင့် ဘယ်လ်ဂျီယမ်တို့တွင်လည်း ကျင့်သုံးသည်။ ဤစနစ်တွင် မူလကတည်းက ဗဟိုအစိုးရက ပိုမိုကြီးမားသော အာဏာကို ရယူထားလေ့ရှိပြီး နိုင်ငံရေး၊ စီးပွားရေးနှင့် တိုင်းရင်းသား စည်းလုံးညီညွတ်ရေးဆိုင်ရာ လိုအပ်ချက်များအရ ဗဟိုချုပ်ကိုင်မှုကို တဖြည်းဖြည်း လျှော့ချပေးသည့်စနစ်ကို ကျင့်သုံးသည်။ ခွဲဝေပေးထားခြင်း ခံရသော ယူနစ်များ ရရှိသည့် အာဏာမှာလည်း တခုနှင့်တခု အချိုးညီ ဖြစ်ချင်မှဖြစ်လေ့ရှိသည်။
ဖက်ဒရယ်ပြည်ထောင်စုတွင် ပေါင်းစပ်ပါဝင်သော ယူနစ်အမျိုးအစား ရှုထောင့်မှ အမြင်
ဆိုခဲ့ပါအတိုင်း ဖက်ဒရယ်စနစ် ၂ မျိုးရှိသည်ဟု ပြောခြင်းမှာ မည်သို့ ဖွဲ့တည်လာသနည်းဆိုသည့် ရှုထောင့်မှ ကြည့်၍ပြောခြင်းသာဖြစ်ပြီး မည်သို့ ပေါင်းစပ် ဖွဲ့စည်းထားသနည်း ဆိုသည့် ရှုထောင့်မှကြည့်လျှင် တမျိူး တွေ့ရမည် ဖြစ်ပါသည်။
(က) နယ်မြေဒေသကို အခြေခံ၍ ဖွဲ့စည်းသော Territorial federalism (အမေရိကန်ပြည်ထောင်စု၊ ဂျာမနီ၊ သြစတြေးလျ၊ ဘရာဇီးလ် စသဖြင့်)
ဤပြည်ထောင်စုနိုင်ငံများတွင် ပါဝင်ဖွဲ့စည်းသော ယူနစ်များမှာ လူမျိုးအမည်များကို အခြေမခံဘဲ နေထိုင်ကြသည့် နယ်မြေဒေသများကိုသာ အခြေခံသည်။ ထင်ရှားသည့် ဥပမာမှာ အမေရိကန်ပြည်ထောင်စုဖြစ်ပြီး ကာလီဖိုးနီးယားပြည်နယ်၊ လူဝီဇီးယားနား ပြည်နယ်၊ တက္ကဆက်ပြည်နယ်၊ ဟာဝိုင်အီပြည်နယ် စသဖြင့် အရွယ်အစား အကြီးအသေး မျိုးစုံရှိသော ပြည်နယ် ၅၀ ပါဝင်ပြီး၊ ပြည်နယ်တခုချင်းစီ၏ အမည်သည် မည်သည့် လူမျိုးတမျိုးကိုမျှ ကိုယ်စားပြု မှည့်ခေါ်ထားခြင်း မဟုတ်ပေ။
အမေရိကန်ပြည်ထောင်စုမှာ ဒီမိုကရေစီစနစ် ကျင့်သုံးပြီး (territorial federalism ) နယ်မြေဒေသကို အခြေခံဖွဲ့စည်းသော အစောဆုံး ဖက်ဒရယ်ပြည်ထောင်စု နိုင်ငံတနိုင်ငံ ဖြစ်ကာ ဖွံ့ဖြိုးတိုးတက်ဆုံးသော ကမ္ဘာ့စီးပွားရေးအင်အားကြီးနိုင်ငံလည်း ဖြစ်ပါသည်။ သက်တမ်း ၂၂၀ ကျော်ကာလအတွင်း ငွေဝယ်ကျွန်စနစ် ဖျက်သိမ်းရေးကိစ္စနှင့်ပတ်သက်ပြီး တောင်ပိုင်းနှင့် မြောက်ပိုင်း သဘောထားကွဲကာ ပြည်တွင်းစစ် ဖြစ်ခဲ့သည်မှလွဲ၍ လူမျိုးရေးအရ ပြိုကွဲမည့်အန္တရယ်နှင့် မကြုံခဲ့ရဘူးချေ။
(ခ) လူမျိုးအခြေခံ ပြည်နယ်များဖြင့် ဖွဲ့စည်းသော ဖက်ဒရယ်ပြည်ထောင်စု Ethnofederalism (ယခုအခါ ပြိုကွဲသွားပြီဖြစ်သော ဆိုဗီယက်ယူနီယံ၊ ယူဂိုဆလားဗီးယား၊ ချက်ကိုဆလိုဗက်ကီးယားနှင့် ဘယ်လ်ဂျီယမ် စသဖြင့်)
ဤဖက်ဒရယ်စနစ်ကို ဆိုဗီယက်ပြည်ထောင်စုတွင် ၁၉၂၂ ခုနှစ်နှင့်၊ ချက်နှင့် ယူဂိုဆလပ်တို့တွင် ဒုတိယကမ္ဘာစစ်အပြီး ၁၉၄၅ ခုနှစ်နောက်ပိုင်း စတင်ကျင့်သုံးခဲ့သည်။ ဤပြည်ထောင်စုနိုင်ငံများတွင် ပါဝင်ဖွဲ့စည်းသော ယူနစ်များမှာ လူမျိုးကို အခြေခံသည်။
ဥပမာ- ဆိုရှယ်လစ် ဖက်ဒရယ်ရီပတ်ဘလစ် ယူဂိုဆလပ်ဗီးယားတွင် ပါဝင်ခဲ့သော ပြည်နယ်များမှာ... ဘော့စနီးယား၊ ဟာဇီဂိုဗီးနား၊ ကရိုးရှား၊ မက်ဆီဒိုးနီးယား၊ မွန်တီ နီးဂရိုး၊ ဆာဗီးယား၊ ဆလိုဗင်းနီးယား စသဖြင့် လူမျိုးကို အခြေခံ၍ ဖွဲ့စည်းထားသည်။
ယူဂိုဆလပ်ဗီးယားတွင် ခေါင်းဆောင် ဂျိူးဇက်တီတိုး ကွယ်လွန်သော ၁၉၈၀ ပြည့်နှစ်နောက်ပိုင်းမှစ၍ ပြည်ထောင်စုအဖွဲ့ဝင် ရီပတ်ဘလစ်များမှ ခေါင်းဆောင်များက တနှစ် တကြိမ် အလှည့်ကျ သမ္မတတာဝန်ယူသော စနစ်ဖြင့် အုပ်ချုပ်ခဲ့သော်လည်း ပြိုကွဲခြင်းကို မတားဆီးနိုင်ခဲ့ပေ။ ၁၉၉၁ မှစ၍ ပြည်တွင်းစစ် ဖြစ်ပွားပြီး စတင်ပြိုကွဲခဲ့ရာ ၁၉၉၂ ခုနှစ်၊ ၁၉၉၅ ခုနှစ်နှင့် ၁၉၉၉ ခုနှစ်တို့အတွင်း စစ်ပွဲ ၄ ကြိမ်ဖြစ်ပွားပြီး နိုင်ငံ ၆ ခုအဖြစ် ပြိုကွဲသွားလေသည်။
ထိုနည်းတူ သမ္မတနိုင်ငံ ၁၅ ခုဖြင့် ဖွဲ့စည်းထားသော ဆိုဗီယက်ယူနီယံသည် ၁၉၉၁ ခုနှစ်တွင် လည်းကောင်း၊ ချက်နှင့် ဆလိုဗက် ယူနစ်နှစ်ခုဖြင့် ဖွဲ့စည်းထားသော ချက်ကိုဆလိုဗက်ကီးယားသည် ၁၉၉၃ ခုနှစ်တွင် လည်းကောင်း ပြိုကွဲသွားခဲ့သည်။ အဆိုပါ နိုင်ငံ ၃ ခုလုံးမှာ တပါတီစနစ် ကျင့်သုံးသော ဆိုရှယ်လစ်နိုင်ငံများ ဖြစ်ကြခဲ့ကြပြီး ဒီမိုကရေစီစနစ် ပြောင်းလဲကျင့်သုံးသည့် ကာလတွင် ပြိုကွဲသွားကြခြင်း ဖြစ်လေရာ ကျနော်တို့ မြန်မာနိုင်ငံအနေဖြင့် သတိကြီးစွာ ထားသင့်လှပေသည်။
ဒီမိုကရေစီစနစ်ကို ကျင့်သုံးသော ဘယ်လ်ဂျီယမ်နိုင်ငံမှာ ဥရောပတိုက်ရှိ အသေးငယ်ဆုံး နိုင်ငံငယ်တခုဖြစ်ပြီး ဒတ်ခ်ျစကားပြောသော (Flemings) ဖလန်းမင်းများနှင့် ပြင်သစ်စကားပြောသော ဝလွန်း (walloons) ဘယ်လ်ဂျီယမ်များ ထေိုင်ကြသည်။ ဘယ်လ်ဂျီယမ်ကို Flanders ဖလန်းဒါး၊ wallonia ဝလွန်းနီးယားနှင့် (ပြင်သစ် ဘာသာစကား ပြောသူများရော ဒတ်ခ်ျဘာသာစကား ပြောသူများပါ နေထိုင်သည့်) Brussels ဘရပ်ဆဲ ဒေသသုံးခုအဖြစ် ပိုင်းခြားထားပြီး ဒေသသုံးခုလုံး ကိုယ်ပိုင်အုပ်ချုပ်ခွင့် ရှိသည်။ သို့သော်လည်း ဖလန်းမင်းများနှင့် ဝလွန်းတို့အကြား ပွတ်တိုက်မှုများမှာ ယနေ့ထက်တိင်အောင်ရှိနေကာ မတည့်အတူနေဘဝက ရုန်းမထွက်နိုင်ကြသေးချေ။
(ဂ) မျိုးစပ် ဖွဲ့စည်းထားသော Hybrid federalism သို့မဟုတ် Territorial-ethnic federalism ( ကနေဒါ၊ အိန္ဒိယ၊ စပိန်၊ ဆွစ်ဇာလန်)
ဤပြည်ထောင်စုအမျိုးအစားတွင် ပါဝင်ဖွဲ့စည်းထားသော ယူနစ်များမှာ လူမျိုးကို အခြေခံသည် ရှိသလို၊ နယ်မြေဒေသကိုသာ အခြေခံသည့် ပြည်နယ်များလည်း ရှိသည်။ ဥပမာ- အိန္ဒိယနိုင်ငံတွင် တမီးနာဒူး၊ ပန်ဂျပ်၊ မဏိပူ၊ မီဇိုရမ်၊ နာဂလန်း စသည့် လူမျိုးကို အစွဲပြုသည့် ပြည်နယ်များနှင့် အူတာပရာဒက်ရှ်၊ အရူနာချယ်ပရာဒက်ရှ်၊ မီဂါလာယာ စသဖြင့် ဒေသအမည်ကိုသာ အစွဲပြု ခေါ်ဝေါ်သည့် ပြည်နယ်ပေါင်း ၂၈ ခုနှင့် ပြည်ထောင်စု နယ်မြေ ၇ ခု အတူပေါင်းစပ်ဖွဲ့စည်းထားသည်။ ဥပဒေပြုခွင့်အာဏာကို ပြည်ထောင်စုစာရင်း၊ ပြည်နယ်စာရင်းနှင့် ပူးတွဲဥပဒေပြုစာရင်းတို့အဖြစ် သုံးမျိုးခွဲခြားထားသည်။ အဆိုပါ စာရင်းများတွင် မပါဝင်သော ကြွင်းကျန်အာဏာ (Residual powers) များကိုမူ အမေရိကန်၊ သြစတြေးလျတို့နှင့်မတူဘဲ ကနေဒါနိုင်ငံမှာကဲ့သို့ ပြည်ထောင်စုသို့သာ အပ်နှင်းထားသည်ကို တွေ့ရသည်။ ဖွဲ့စည်းပုံအခြေခံဥပဒေက ပေးအပ်ထားသော ဥပဒေပြုခွင့်အာဏာများမှာလည်း အချိုးညီမဟုတ်ပေ။ ဂျမူးနှင့် ကက်ရှမီးယားပြည်နယ်သည် ပိုမိုမြင့်မားသောအာဏာ ရရှိသကဲ့သို့ ဒေလီနှင့် ပူဒူချာရီ ပြည်ထောင်စုနယ်မြေများသည် ပြည်နယ်ထက် ပိုမိုနည်းသော ဖက်ဒရယ်အခွင့်အာဏာကိုသာ ရရှိသည်။
အဆိုပါနိုင်ငံများရှိ ဖက်ဒရယ်စနစ်မှာလည်း ယနေ့ထိတော့ အလုပ်ဖြစ်လျက် ရှိသည်။
လူမျိုးအခြေပြု Ethnofederalism လော၊ နယ်မြေနှင့် လူမျိုး နှစ်မျိုးပေါင်းစပ် Hybrid federalism လော
၂၁ ရာစု ငြိမ်းချမ်းရေးညီလာခံတွင် တွေ့ရသော စာတမ်းတချို့တွင် အဓိကအားဖြင့် ပြည်နယ်များကို လူမျိုးအလိုက် ဖွဲ့စည်းရန် အဆိုပြုထားသည့်အတွက် ၎င်းအမျိုးအစားကို Ethnofederalism လူမျိုးအခြေပြု ဖက်ဒရယ်ဝါဒ ဟုသတ်မှတ်ရမည် ဖြစ်သည်။ ANP ရခိုင်အမျိုးသားပါတီ၏စာတမ်းမှာ ပြိုကွဲသွားပြီဖြစ်သော ယူဂိုဆလပ်ဗီးယား၏ ပုံစံကို ယူထားခြင်းဖြစ်ပြီး Sအန်အယ်လ်ဒီ ရှမ်းတိုင်းရင်းသားများ ဒီမိုကရေစီအဖွဲ့ချုပ်၏ ၈ ပြည်နယ်မူ စာတမ်းမှာလည်း Ethnofederalism ပင် ဖြစ်သည်။
Ethnofederalism ခေါ် လူမျိုးအခြေပြုဖက်ဒရယ်ပုံစံမှာ အမေရိကန်ပြည်ထောင်စု၏ နယ်မြေဒေသအခြေပြု ဖက်ဒရယ်စနစ် (Territorial federalism)၏ အခြား ရွေးချယ်စရာတခုအဖြစ် ဆိုဗီယက်ပြည်ထောင်စုက စတင်ကျင့်သုံးခဲ့ခြင်း ဖြစ်သည်။ ဒုတိယကမ္ဘာစစ်ကြီး နောက်ပိုင်းတွင် ၎င်း၏ မဟာမိတ်နိုင်ငံများ ဖြစ်ကြသော ယူဂိုဆလားဗီးယားနှင့် ချက်ကိုဆလိုဗက်ကီးယားနိုင်ငံများတွင်လည်း ကျင့်သုံးခဲ့သည်။ ကွဲပြားခြားနားသည့် တိုင်းရင်းသားလူမျိုးများ နေထိုင်ရာ တိုင်းပြည်တွင် သဘောတရားရေး (တန်းတူရေး၊ ကိုယ့်ကြမ္မာကိုယ် ဖန်တီးခွင့်ရှိရေး စသည်တို့) အခြေခံအရ အကျိုးအကြောင်း ရှိပြီး သင့်တော်သော လက်တွေ့ဆောင်ရွက်မှုအဖြစ် ကျင့်သုံးခဲ့ကြခြင်း ဖြစ်သည်။
သို့သော် လူမျိုးအခြေပြုဖက်ဒရယ်ပုံစံကို ဝေဖန်ထောက်ပြသူများက အဆိုပါပုံစံမှာ မွေးရာပါ အားနည်းချက်ရှိနေပြီး အမျိုးသားသွေးကွဲရေးနှင့် ခွဲထွက်ရေးတို့ကို အစဉ် အားပေးနေသည့်ပုံစံဟု ဆိုပါသည်။ ဆိုဗီယက်ယူနီယံနှင့် အရှေ့ဥပရောပမှ လူမျိုးအခြေပြု ဖက်ဒရယ်နိုင်ငံများ ပြိုကွဲသွားခြင်းကို လေ့လာသောပညာရှင် Cornell ကော်နဲက လူမျိုး အခြေပြုဖက်ဒရယ် အင်စတီကျူးရှင်းများ၊ ကိုယ်ပိုင်အုပ်ချုပ်ရေးများက ဗဟိုအစိုးရ ဆန့်ကျင်ရေးစိတ်ဓာတ်များကို ပေါ်ပေါက်စေပြီး ခွဲထွက်ရေးကို အားပေးသည်ဟု ဆိုသည်။ အဆိုပါ ဖက်ဒရယ်အင်စတီကျူးရှင်းများကိုယ်တိုင်က ပြိုကွဲမှုကို အားပေးသည့် မီဒီယာများ၊ အမျိုးသားရေး အမှတ်သရုပ်များ၊ အဖွဲ့အစည်းများ၊ ခေါင်းဆောင်များ၊ ပြည်ပ ထောက်ခံမှုများကို မွေးထုတ်ပေးခဲ့သည်ဟု ဆိုသည်။
ထိုသို့ပြိုကွဲစဉ်က သက်ဆိုင်ရာ လူမျိုးခေါင်းဆောင်များက အတူတကွ ရေရှည်ထာဝရ ပူးပေါင်းရန် ဆန္ဒအမှန်မရှိကြခြင်းကလည်း အချက်အချာကျသည်ဟု ဆိုပါသည်။
နောက်ထပ် အရေးကြီးသည့် လေ့လာတွေ့ရှိချက်တရပ်မှာ အမျိုးသားပြည်နယ် တခုအတွင်း နေထိုင်သော လူနည်းစုများက လူ့အခွင့်အရေးများ ငြင်းပယ်ခြင်းခံရသည့်အခါ သက်ဆိုင်ရာဒေသ၏ လူများစု လူမျိုးများနှင့် ပြဿနာတက်လေ့ရှိခြင်းဖြစ်သည်။ ဗဟိုက အဆိုပါလူနည်းစုကို ကာကွယ်ပေးရခြင်းမျိုးတွင် အခက်အခဲများ တွေ့ရတတ်သည်။ (မြန်မာနိုင်ငံတွင် ကချင်ပြည်နယ်တွင်း နေထိုင်ကြသော ရှမ်းနီတိုင်းရင်းသားများနှင့် KIA အကြားပဋိပက္ခပုံစံမျိုး)
၂၁ရာစု ပင်လုံညီလာခံတွင် (ANP) ရခုိင်အမျိုးသားပါတီက တင်ပြသောပုံစံပါ အာဏာခွဲဝေပုံ၊ လက်နက်ကိုင်တပ်များ ဖွဲ့စည်းထားရှိနိုင်ပုံ၊ သဘာဝအရင်းအမြစ်များကို စီမံခန့်ခွဲပုံများအရ၊ ပြည်နယ်များက ပြည်ထောင်စုထက် ပိုမိုအာဏာရှိနေသဖြင့် federal ပုံစံကိုကျော်လွန်၍ Confederal ပုံစံဖြစ်နေပါသည်။
Sအန်အယ်လ်ဒီ ကတင်သွင်းသော ၈ ပြည်နယ်မူတွင်လည်း အဓိကလူမျိုးအလိုက် ပြည်နယ်များ ဖွဲ့စည်းမည်ဖြစ်ပြီး ပြည်ထောင်စုသို့ ကန့်သတ်အာဏာကိုသာ ပေးထားကာ ကြွင်းကျန်အာဏာကို ပြည်နယ်များက ယူထားမည်ဖြစ်သဖြင့် (Coming together federal) ပုံစံတွင် Ethnofederal အနှစ်သာရ ဖြည့်စွက်ထားခြင်းဖြစ်သည်ဟု ယူဆပါသည်။
သို့ဖြစ်လေရာ မြန်မာနိုင်ငံအနေဖြင့် လူမျိုးစွဲ၊ ဒေသစွဲများ ပိုမိုသည်းသန် ပြင်းထန်စေကာ ပြိုကွဲမှုကို ပိုမိုတိမ်းညွတ်သည့် Ethnofederalism အစား Territorial federalism ဖြစ်စေ၊ Hybrid federalism ဖြစ်စေ ရွေးချယ်ခြင်းက ပိုမိုသင့်တော်သည်ဟု ထင်မြင်မိပါသည်။
ထို့ပြင် မြန်မာနိုင်ငံ၏ မျက်မှောက်အခြေအနေမှာ ပြည်ထောင်စုတွင် ပါဝင်ကြမည့် ပြည်နယ်များ (ယူနစ်များ) က ၁၇၈၁ ခုနှစ် အမေရိကား၏ ၁၃ ပြည်နယ်လို ဗဟိုအစိုးရကို မည်၍မည်မျှသာ အာဏာပေးမည်ဟု ကန့်သတ်ဆုံးဖြတ်ပေးနိုင်သော အခြေအနေ (အင်အား) မရှိပါချေ။ မျက်မှောက် ရင်ဆိုင်နေရသော အခြေအနေက Coming together ပုံစံထက် Holding together ပုံစံကိုသာ လက်ခံရမည့်အနေအထား ဖြစ်လေသည်။ ဗဟိုမှချုပ်ကိုင်မှု လွန်ကဲနေသော အာဏာအချို့ကိုသာ၊ စီးပွားရေး ဖွံ့ဖြိုးတိုးတက်မှုနှင့် လူနည်းစုတိုင်းရင်းသားလူမျိုးများ ကိုယ်ပိုင်ဆုံးဖြတ်ခွင့်တို့အတွက် တည်ဆဲအခြေခံဥပဒေကို ပြင်ဆင်ခြင်းဖြင့် ဗဟိုချုပ်ကိုင်မှု လျှော့ချရေး ကြိုးစားသွားခြင်းသာလျှင် လက်တွေ့ကျလိမ့်မည် ဖြစ်ပါကြောင်း တင်ပြလိုက်ရပေသည်။
ရဲထွန်း(သီပေါ)
စာကိုးး စင်ကာပူနိုင်ငံ နန်ယန်တက္ကသိုလ် ပညာရှင်များ၏ Ethnofederalism and its Critics: Offering a Hybrid Federal
Approach
း Wikipedia
း Federalism : A study of evolution and consequences
