မန္တလေးတိုင်း မြင်းခြံခရိုင် နွားထိုးကြီးမြို့နယ်မှာ မေ ၂၄ ရက်မနက်က သေနတ်နဲ့ ပစ်သတ်ခံထားရတဲ့ အမျိုးသားရုပ် အလောင်း ၂ လောင်း တွေ့ရှိခဲ့ရတယ်လို့ ဒေသခံတွေက ပြောပါတယ်။
ထနှောင်းပင်လဲ ကျေးရွာအနီးမှာ ရိုက်နှက်နှိပ်စက်ခံထားရပြီး သေနတ်နဲ့ တေ့ပစ်ခံထားရတဲ့ အမည်မသိ အမျိုးသားအလောင်း ၂ လောင်းကို တွေ့ရှိခဲ့ရတာလို့ ဒေသခံတဦးက ပြောပါတယ်။
“မနက် ၇ နာရီလောက် ထနောင်းပင်လဲ ရွာနားမှာတွေ့တာ။ အမျိုးသား အလောင်း ၂ လောင်း။ ရိုက်နှက် နှိပ်စက်ထားပြီးမှ ခေါင်းကို သေနတ်နဲ့ တေ့ပစ်ထားတာ။ ကောင်လေးတွေက အသက် ၂၀ ဝန်းကျင်လေးတွေ။ ဘယ်သူလဲဆိုတာ မသိရသလို ဘယ်အဖွဲ့အစည်းက စွန့်ပစ်သွားလဲဆိုတာ မသိရဘူး။”
မြင်းခြံခရိုင်အတွင်းက ကျေးရွာတွေမှာ ဒီရက်ပိုင်းအတွင်း ရိုက်နှက် နှိပ်စက် သတ်ဖြတ်ပြီး လာရောက်စွန့်ပစ်ထားတဲ့ အလောင်းတွေ နေ့စဉ်နီးပါး တွေ့ရှိနေတယ်လို့ ဆိုပါတယ်။
မေ ၂၁ ရက်က မြင်းခြံခရိုင် မြင်းခြံ -မြို့သာ ကားလမ်းဘေး ထိန်ပန်းကျေးရွာအုပ်စု ထိန်ပန်းကျေးရွာ ဆိုင်းဘုတ်အနီးမှာ လက်ပြန်ကြိုးတုပ်ပြီး နှိပ်စက် သတ်ဖြတ်ထားတဲ့ အမည်မသိ အလောင်း ၁ လောင်း၊ မေ ၂၃ ရက်နေ့ကလည်း အဆိုပါရွာ ဆိုင်းဘုတ်အနီးမှာပဲ ရိုက်နှက် နှိပ်စက် သတ်ဖြတ်ထားတဲ့ အမျိုးသား အလောင်း ၁ လောင်းကို တွေ့ရှိခဲ့ရတယ်လို့ ဒေသခံတွေက ပြောပါတယ်။
