မြန်မာနိုင်ငံမှာ စစ်အာဏာသိမ်းပြီးတဲ့နောက် နိုင်ငံရေးမတည်ငြိမ်မှု စားဝတ်နေရေး လုံခြုံရေး အကျပ်အတည်းတွေကြောင့် နိုင်ငံသားအများအပြားဟာ အိမ်နီးချင်း ထိုင်းနိုင်ငံထဲ ဝင်ရောက်လုပ် ကိုင်ရှာဖွေစားသောက်ဖို့ ကြိုးစားနေပြီး နေ့စဉ်လိုလို အဖမ်းခံနေကြရပါတယ်။
ဒီကနေ့ မေ ၉ ရက်နေ့က ထိုင်း-မြန်မာနယ်စပ်တာ့ခ်ခရိုင်ထဲမှာ တရားမဝင်မြန်မာ ၅၆ ဦး ဖမ်းဆီးရမိခဲ့တယ်လို့ AEC အာစီယံထိုင်းသတင်းမှာ ဖော်ပြပါတယ်။
သူတို့တွေကို ဖုပ်ဖရမြို့နယ် ဝေါ်လေကျေးရွာအုပ်စု မော်ကေထိုင်းကျေးရွာအနီး တောအုပ်ထဲမှာ မတူတဲ့အချိန် မတူတဲ့နေရာ ၂ ခုကနေ ဖမ်းမိခဲ့တာလို့ ဆိုပါတယ်။
ပထမတစ်အုပ်စုမှာ အမျိုးသား ၂၄ ဦး အမျိုးသမီး ၈ ဦး ပေါင်း ၃၂ ဦးရှိပြီး ဒုတိယအုပ်စုမှာတော့ အမျိုးသား ၇ ဦး အမျိုးသမီး ၇ ဦးနဲ့ ကလေးငယ် ၁၀ ဦးတို့ ပါဝင်တယ်လို့ ဆိုပါတယ်။
မေ ၈ ရက် မနက်ပိုင်းကလည်း အဆိုပါ တာ့ခ်ခရိုင် ထာ့ဆောင်ယန်းမြို့နယ် မဲ့အူးစုကျေးရွာအုပ်စု ထီးချွဲ့ခီကျေးရွာနားမှာ ကား ၂ စီးနဲ့အပြည့်လိုက်ပါလာတဲ့ မြန်မာနိုင်ငံသား ၂၅ ဦးကို ဖမ်းမိတယ်လို့ ထိုင်းစစ်တပ်သတင်းမှာ ဖော်ပြပါတယ်။
မေလ ၈ ရက်နေ့က ချင်းမိုင်ခရိုင် ဖှန်မြို့နယ် မဲ့ငွန်းကျေးရွာအုပ်စု ဘန့်ထမ့်ကျေးရွာအနီး တော အုပ်ထဲမှာ ထိုင်းနိုင်ငံထဲကို ခြေလျင်လျှောက်ပြီး ဝင်ရောက်လာတဲ့ မြန်မာနိုင်ငံသား ၃၁ ဦးကို ဖမ်းဆီးရမိခဲ့ကြောင်း အဆိုပါစစ်တပ်သတင်းက ဖော်ပြပါတယ်။
မေလ ၇ ရက်နေ့ကလည်း ထိုင်းတောင်ပိုင်း နာရာသီဝပ်ခရိုင်ထဲမှာ တရားမဝင်မြန်မာ ၈၉ ဦး ဖမ်းဆီးခံရတယ်လို့ မန်နေဂျာအွန်လိုင်း ထိုင်းသတင်းမှာ ဖော်ပြပါတယ်။
သူတို့ဟာ မြန်မာနိုင်ငံဘက်ကနေ တရားမဝင် ဝင်ရောက်လာပြီး မလေးရှားဆက်သွားဖို့ နာရာသီဝပ်ခရိုင် တာခ်ဘိုင်မြို့နယ် ကျေ့ဟေရပ်ကွက် ဆိုင်းထောင်းလမ်းထဲရှိ နေအိမ်အဟောင်းမှာ လာခေါ်မယ့်ကားကို စောင့်ဆိုင်းနေစဉ် တာဝန်ရှိသူတွေက ဝင်ရောက်ဖမ်းဆီးခဲ့တာလို့ ဆိုပါတယ်။ အဆိုပါ ၈၉ ဦးနဲ့ဆက်စပ်ပြီး သူတို့ကိုတင်ဆောင်ခဲ့တဲ့ ကား ၇ စီးလည်း သိမ်းဆည်းခံထားရတယ်လို့ သတင်းမှာ ဖော်ပြပါတယ်။
မေလ ၆ ရက်မနက်မှာတော့ ပရကျုပ်ခီရီခန်ခရိုင်မှာ တရားမဝင် မြန်မာ ၁၄ ဦး တင်ဆောင်လာတဲ့ကား ၁ စီး သေနတ်ပစ်ခံရပြီး ၁ ဦးသေဆုံး ၃ ဦး ဒဏ်ရာရခဲ့ပါတယ်။
