ကျိုက်ထိုမြို့နယ်တွင် စစ်ကောင်စီဂိတ်စခန်းတိုက်ခိုက်ခံရပြီး ၅ ဦး သေဆုံး

မွန်ပြည်နယ်၊ ကျိုက်ထိုမြို့နယ်၊ မုပ္ပလင်ကျေးရွာလမ်းခွဲရှိ စစ်ကောင်စီဂိတ်စခန်းကို ဇန်နဝါရီ ၂၈ ရက် နေ့လယ် ၂ နာရီခွဲလောက်မှာ ဝင်ရောက် တိုက်ခိုက်ခံရတယ်လို့ ကေအန်ယူ တပ်မဟာ(၁) တာဝန်ရှိသူတွေနဲ့ ဒေသခံတွေက ဒီဗွီဘီကို ပြောပါတယ်။

အဲဒီစစ်ကောင်စီဂိတ်စခန်းကို ကေအန်ယူလက်အောက်ခံ ကရင်အမျိုးသားလွတ်မြောက်ရေး တပ်မတော် KNLA တပ်မဟာ(၁) ၊ တပ်ရင်း(၃) နဲ့ ဒေသခံ ပြည်သူ့ကာကွယ်ရေး PDF ပူးပေါင်းအဖွဲ့က သွားရောက် တိုက်ခိုက်ခဲ့တာ ဖြစ်ပါတယ်။

အဲဒီတိုက်ခိုက်မှုကြောင့် စစ်ကောင်စီဘက်က ၅ ယောက်သေဆုံးပြီး ၂ ယောက် အပြင်အထန် ဒဏ်ရာရရှိခဲ့ကာ KNLA ပူးပေါင်းအဖွဲ့က ထိခိုက်ဒဏ်ရာရတာ မရှိဘူးလို့ ကေအန်ယူ တပ်မဟာ(၁) သထုံခရိုင်အတွင်းရေးမှူး ပဒိုစောစိုးမြင့်က ပြောပါတယ်။

ဒေသခံတွေအဆိုရ စစ်ကောင်စီဂိတ်စခန်းတိုက်ခိုက်ခံရပြီး နာရီပိုင်းအကြာမှာပဲ လူမှုကယ်ဆယ်ရေးအဖွဲ့တွေက စစ်ကောင်စီအလောင်းတွေကို လာရောက် ကောက်ယူသွားတယ်လို့ ဆိုပါတယ်။

ဒါ့အပြင် ဇန်နဝါရီ ၂၈ ရက် ညနေ ၄ နာရီလောက်မှာလည်း  ကျိုက်ထိုမြို့နယ်၊ ကျောက်ဖျားကျေးရွာအနီးမှာ KNLA ပူးပေါင်းတပ်နဲ့ စစ်ကောင်စီတပ်တို့ တိုက်ပွဲ ဖြစ်ပွားခဲ့ဖြစ်ပြီး၊ နှစ်ဖက်ထိခိုက်မှု အခြေအနေ အသေးစိတ် မသိရသေးပါဘူး။

ကျိုက်ထိုမြို့နယ်မှာတော့ ဇန်နဝါရီ ၂၅ ရက်ကစပြီး  KNLA ၊ PDF ပူးပေါင်းတပ်နဲ့ စစ်ကောင်စီတပ်တို့ တိုက်ပွဲ ဖြစ်ပွားနေတာဖြစ်ပြီး၊ အဲဒီတိုက်ပွဲကြောင့် ဒေသခံ ၁၀၀၀ ကျော် ဘေးလွတ်ရာသို့ ထွက်ပြေးတိမ်းရှောင်နေရတာပါ။

//
More News
Up