မြဝတီမြို့ ကွမ်းခြံကွေ့အနီး ဂက်စ်တင်ကား ၂ စီးပစ်ခတ်ခံခဲ့ရ၊ တစ်ဦးသေဆုံးပြီး ယာဉ်တစ်စီး မီးလောင်

ဇန်နဝါရီ ၇ ရက်နေ့က ဓာတ်ငွေ့ရည် တင်ဆောင်လာတဲ့ တွဲကား ပစ်ခတ်ခံရပြီး မြင်တွေ့ရစဉ်

ကရင်ပြည်နယ် မြဝတီမြို့၊ ကွမ်းခြံကွေ့ (အာရှလမ်းမကြီး) အနီးမှာ ဇန်နဝါရီ ၁၆ ရက် နေ့လယ် ၁ နာရီလောက်က ဂက်စ်တင်ကား ၂ စီး ပစ်ခတ်တိုက်ခိုက်ခံခဲ့ရတဲ့အတွက် ယာဉ်မောင်း ၁ ဦး သေဆုံးပြီး ယာဉ် ၁ စီး မီးလောင်ပျက်စီးခဲ့ပါတယ်။

မြဝတီမြို့ကနေ မောင်းနှင်လာတဲ့ ဂက်စ်တင်ယာဉ် ၂ စီးကို အမည်မသိ လက်နက်ကိုင်တွေက ကွမ်းခြံကွေ့အနီးမှာ ပစ်ခတ်တိုက်ခိုက်ခဲ့တဲ့အတွက် ယာဉ် ၁ စီး မီးလောင် ပျက်စီးပြီး၊ အခြားယာဉ်မောင်း ၁ ဦးဟာ သေနတ်ထိမှန် သေဆုံးခဲ့တယ်လို့ ခရီးသွားယာဉ်မောင်းတွေဆီက သိရပါတယ်။

အဆိုပါ ပစ်ခံခတ်ခဲ့ရတဲ့ ယာဉ်တွေဟာ မီးဖိုချောင်သုံး ဂက်စ်တွေ တင်ဆောင်လာတာဖြစ်သလို မီးလောင်ပျက်စီးခဲ့တဲ့ ယာဉ်တစီးဟာ AwRa Trading ကုမ္ပဏီပိုင်ယာဉ်ဖြစ်ပြီး ယာဉ်မောင်း ပစ်သတ်ခံရတဲ့ယာဉ်ဟာ တခြားကုမ္ပဏီပိုင်ဖြစ်တယ်လို့ AwRa Trading ကုမ္ပဏီ တာဝန်ရှိသူက ပြောပါတယ်။

“မီးလောင်သွားတဲ့ ၁ စီးက ကျနော်တို့ ကုမ္ပဏီက ကားမှန်ပါတယ်။ ဘယ်အဖွဲ့က ပစ်တယ်ဆိုတာ ကျနော်တို့ကိုယ်တိုင်လည်း မသိသေးဘူး။ ပထမ ပစ်ခတ်တိုက်ခိုက်တဲ့ အဖွဲ့တုန်းက လုပ်တဲ့အဖွဲ့က ကြေညာတာ တွေ့တယ်။ အခုကတော့ ဘယ်ကဆိုတာ မသိသေးဘူး။ သူတို့ ဘာကြောင့် ပစ်ခတ်နေတယ်ဆိုတာတော့ မသိဘူး။ ထမင်းချက်တဲ့ ဂက်စ်တွေပဲ တင်နေတာ။” 

အလားတူ ဇန်နဝါရီ ၇ ရက် ညနေ ၆ နာရီလောက်က ကော့ကရိတ်မြို့ ကျိုက်ဒုံလမ်းခွဲအနီး အာရှလမ်းမပေါ်မှာ AwRa Trading Co.,Ltd.(ThaiGas) ကုမ္ပဏီပိုင် ဓာတ်ငွေ့ရည် (LPGas) တင်ဆောင်လာတဲ့ တွဲကား ပစ်ခတ်တိုက်ခိုက်ခံရတဲ့အတွက် မီးလောင်ပျက်စီးခဲ့ပါတယ်။

//
More News
Up