မကွေးတိုင်းနဲ့ စစ်ကိုင်းတိုင်းတို့မှာ နိုဝင်ဘာ ၂၇ ရက်နေ့က စစ်ကောင်စီတပ်တွေ တိုက်ခိုက်ခံရတာကြောင့် ၂၀ ကျော်သေဆုံးပြီး အများအပြား ဒဏ်ရာရရှိခဲ့တယ်လို့ သိရပါတယ်။
မကွေးတိုင်း၊ ရေစကြိုမြို့နယ်၊ မအူရွာအနီး နိုဝင်ဘာလ ၂၇ ရက် ညနေက စစ်ကောင်စီတပ်ဖွဲ့ဝင်တွေ တိုက်ခိုက်ခံရလို့ ၇ ဦးသေဆုံး၊ ၄ ဦး ဒဏ်ရာရရှိသွားတယ်လို့ မြောင်အင်အားစုတော်လှန်ရေးတပ်ဖွဲ့ တာဝန်ခံတဦးက ပြောပါတယ်။
''စကစတပ်သားတွေ စုဝေးလှုပ်ရှားနေချိန်မှာ မဟာမိတ်အဖွဲ့ဖြစ်တဲ့ မြောင်အင်အားစု တော်လှန်ရေးတပ်ဖွဲ့နဲ့ မြင်းခြံအင်အားစုတော်လှန်ရေးတပ်ဖွဲတို့ ပူးပေါင်းပြီး နေရာအသာစီးယူတိုက်ခိုက်ခဲ့လို့ စစ်ကောင်စီတပ်သား ၇ ဦးသေဆုံးတယ်။ ၄ ဦးကတော့ အပြင်းအထန် ဒဏ်ရာရရှိသွားကြတယ်လို့ မြေပြင်ကနေ သတင်းပေးပို့လာပါတယ်။''
ရေစကြိုက ထွက်ခွာလာတဲ့ စစ်ကောင်စီတပ်ဖွဲ့နဲ့ မအူရွာက စစ်ကောင်စီတပ်ဖွဲ့တွေ စုဝေးလှုပ်ရှားနေချိန်မှာ တိုက်ခိုက်ခဲ့တာဖြစ်ပြီး နိုဝင်ဘာ ၂၇ ရက်နေ့ ညနေ ၄ နာရီမှ ၆ နာရီခွဲအထိ ၂ နာရီခွဲနီးပါး ကြာမြင့်ကာ ဒေသခံကာကွယ်ရေးတပ်ပေါင်းစုတွေဘက်ကတော့ အထိအခိုက်မရှိ ပြန်လည်ဆုတ်ခွာလာနိုင်ခဲ့တယ်လို့ ဆိုပါတယ်။
နိုဝင်ဘာ ၂၇ ရက်နေ့ မနက်ပိုင်းကလည်း ရေစကြိုကနေ မအူကျေးရွာဆီကို ရေလမ်းကနေ ထွက်ခွာလာတဲ့ စစ်ကောင်စီမော်တော် ၅ စီးကို ဒေသခံပြည်သူ့ကာကွယ်ရေးတပ်ပေါင်းစုတွေ ပူးပေါင်းတိုက်ခိုက်ခဲ့လို့ စစ်ကောင်စီတပ်ဖွဲ့ဝင် ၄ ဦးသေဆုံးပြီး အများအပြားဒဏ်ရာရရှိခဲ့ပါသေးတယ်။
စစ်ကိုင်းတိုင်းဒေသကြီး၊ မြောင်မြို့နယ် ပရိမ္မကျေးရွာအနီးမှာလည်း ပြည်သူ့ကာကွယ်ရေးအဖွဲ့ ၈ ဖွဲ့နဲ့ စစ်ကောင်စီတပ်တို့ နိုဝင်ဘာ ၂၇ ရက်နေ့ မွန်းလွဲ ၁ နာရီလောက်နဲ့ ညနေ ၄ နာရီလောက် စုစုပေါင်းနှစ်ကြိမ် တိုက်ပွဲဖြစ်ပွားခဲ့တယ်လို့ ဒေသခံတွေဆီက သိရပါတယ်။
မြောင်ပြည်သူ့ကာကွယ်ရေးအဖွဲ့ရဲ့ ဗိုလ်သမန်းကျားက “ပထမတစ်ကြိမ်တိုက်ပွဲမှာ စစ်ကောင်စီဘက်က ၃ ဦး ကျဆုံးပြီး ဒုတိယအကြိမ်မှာ ၇ ဦးကျဆုံးကာ ၅ ဦးထက်မနည်း ဒဏ်ရာရရှိတာတွေရှိခဲ့တယ်။ စစ်ကောင်စီဘက်ကတော့ လက်နက်ကြီးနဲ့ ပစ်ခတ်ခဲ့တာတွေတော့ ရှိတယ်။ ဒါပေမဲ့ ကျနော်တို့ဘက်ကတော့ အကျဆုံးမရှိဘူး” လို့ ပြောပါတယ်။
ပြီးခဲ့တဲ့ နိုဝင်ဘာ ၂၆ ရက်နေ့ညကလည်း ပရိမ္မကျေးရွာမှာ တပ်ဆွဲထားတဲ့ စစ်ကောင်စီတပ်ကို ဒေသခံပြည်သူတော်ကာကွယ်ရေး မဟာမိတ် ၈ ဖွဲ့က ထိုးစစ်ဆင်တိုက်ခိုက်ခဲ့တယ်လို့ ဆိုပါတယ်။
မြောင်မြို့နယ်ပြည်သူ့ကာကွယ်ရေးနှင့် လုံခြုံရေးအဖွဲ့ (CDSOM)၊ နှလုံးလှလူမိုက်ကြီးများအဖွဲ့၊ မြင်းမူလျှပ်စီးပြောက်ကျားအဖွဲ့၊ Taloke-PDF၊ ပြည်သူ့တပ်မတော်(မြောင်) MUA၊ MGN TIGER၊ MGN RANGER နဲ့ Burmese Guerrilla Force-BGF စတဲ့ ပူးပေါင်းတပ် ၈ ဖွဲ့နဲ့ စစ်ကောင်စီတပ်တို့ အပြန်အလှန် တိုက်ပွဲဖြစ်ခဲ့ကြတာလို့ သိရပါတယ်။
ရေစကြိုနဲ့ မြောင်မြို့နယ် တိုက်ပွဲတွေအတွင်း စစ်ကောင်စီတပ်သားတွေ သေဆုံးဒဏ်ရာမှုနဲ့ပတ်သက်ပြီး အတည်ပြုနိုင်ဖို့ ဒီဗွီဘီက ဆက်လက်စုံစမ်းနေပါတယ်။