=မန္တလေးမြို့ အိုးဘိုအကျဉ်းထောင်ကနေ လွှတ်မယ့် ပုဒ်မ ၅၀၅ (က) နဲ့ ဖမ်းဆီးခံရသူတွေကို ၃ ရက်ခွဲပြီးလွှတ်မယ်လို့ အကျဉ်းထောင် အသိုင်းအဝိုင်းနဲ့ နီးစပ်သူဆီကနေ သိရပါတယ်။
အာဏာသိမ်းစစ်ကောင်စီက ပုဒ်မ ၅၀၅ (က) မတရားဖမ်းဆီးခံထားရတဲ့သူတွေကို ပြန်လွှတ်ပေးမယ်ဆိုတဲ့ သတင်းကြောင့် မန္တလေး အိုးဘိုအကျဉ်းထောင်ရှေ့မှာ ဇွန် ၃၀ ရက်နေ့ မနက်ပိုင်းက စပြီး လူတော်တော်များများ လာရောက်စောင့်နေခဲ့ကြပါတယ်။
တရားလွှတ်တော်ရှေ့နေ တစ်ဦးက “ဒီနေ့တစ်ရက်တည်း အပြီးလွှတ်မှာ မဟုတ်ဘူး။ စုံစမ်းသိရသလောက်က သုံးရက်လောက် ခွဲလွှတ်မယ်ပြောတယ်။ ဒီနေ့ လွှတ်မယ့်သူတွေတောင် အခုထိ (ညနေ ၅ နာရီအထိ) မလွှတ်သေးဘူး။” လို့ ပြောပါတယ်။
ဒီကနေ့ ၁၇၀ ကျော် လွှတ်ဖို့ရှိနေပြီး မန္တလေးအိုးဘိုအကျဉ်းထောင်ကနေ စုစုပေါင်း ၃၀၀ နီးပါး လွှတ်မယ်လို့ သိရပါတယ်။
လွှတ်မယ်သူတွေထဲမှာ NLD ပါတီဝင်တွေ၊ နိုင်ငံရေး ပုံရိပ်ရှိသူတွေ၊ CDM ဝန်ထမ်းတွေ မပါဘူးလို့လည်း သိရပါတယ်။
