ထိုင်းနိုင်ငံ ဘန်ကောက်မှာ မြန်မာနိုင်ငံသားတွေအနေနဲ့ စစ်အာဏာရှင်ဆန့်ကျင်ရေးဆန္ဒပြပွဲကို ၁ လကျော် ဆက်တိုက်ဆောင်ရွက်လာခဲ့ရာမှာ မတ်လ ၈ ရက်နေ့ကစပြီး ထိုင်းအာဏာပိုင်တွေက လုပ်ခွင့်မပေး တော့ပါဘူး။ 

ပြီးခဲ့တဲ့ မတ်လ ၈ ရက်နေ့ ဆန္ဒပြပွဲအပြီးမှာ နယ်မြေခံရဲတပ်ဖွဲ့က  ကိုဗစ်-၁၉ ကူး စက်မှု ကာကွယ်ရေးနဲ့ အရေးပေါ်အမိန့်ဥပဒေအရ ဆက်ပြီးဆန္ဒပြခွင့်မပြုတော့ဘူး ဆိုတဲ့အကြောင်း ဆန္ဒပြပွဲဦးဆောင်သူတွေကို ပြောကြားခဲ့တယ်လို့ ဘန်ကောက်အခြေစိုက် ထိုင်းနိုင်ငံရောက် မြန်မာ အသိုင်းအဝိုင်းတာဝန်ခံ ကိုစိုင်းက ဒီဗွီဘီကို ပြောပါတယ်။ 

“၈ ရက်နေ့မှာ နယ်မြေခံစခန်းမှူးက မတ်လ ၅ ရက်နေ့မှာ ထပ်ထုတ်ထားတဲ့  ဘန်ကောက် အပါအဝင် ၅ ခရိုင် ( ဘန်ကောက် ၊ စမွတ်စခွန်း ၊ စမွတ်ပရကန် ၊ ပထုန်ဌာနီ ၊ နွန်ထပူရီ ) ထဲမှာ ဆန္ဒပြမှုတွေ မပေးလုပ်တော့ဘူးလို့ ပြောတယ်။ သူတို့ရဲ့ ကိုဗစ်- ၁၉ ကာကွယ်ရေး ဥပဒေအရကော အရေးပေါ်အခြေအနေထုတ်ပြန်ချက်အရပါ ဆန္ဒပြပွဲမလုပ်ရဘူး အကယ်၍ လုပ်ရင် သူတို့အရေးယူပါတော့မယ်လို့ ဆိုပြီးအကြောင်းကြားတယ်။  အဲဒီနေ့ကစပြီး ဆန္ဒပြပွဲ ရပ်ဆိုင်းသွား တာပေါ့နော် ဘယ်သူ့မှမလုပ်တော့ဘူး။”

ဒါ့အပြင် ပြီးခဲ့တဲ့ ဖေဖော်ဝါရီလ ၂၈ ရက်နေ့ ဘန်ကောက် ယူအဲန်ရုံးရှေ့ဆန္ဒပြပွဲကို သွား ရောက်ခဲ့သူတွေထဲက ၂ ဦးမှာ ကိုဗစ်-၁၉ ပိုးကူးစက်ခံထားရတာတွေ့ရှိကြောင်း တာဝန်ရှိ သူတွေက ဒီကနေ့မနက်မှာ အကြောင်းကြားလာတယ်လို့ သူကဆက်ပြောပါတယ်။ 

၂၈ ရက်နေ့က ဆန္ဒပြပွဲကို လူတွေသောင်းနဲ့ချီ ပါဝင်ခဲ့ကြောင်း၊  အဲဒီနေ့က ပါဝင်သူတွေသူ  မိမိကိုယ်သံသယရှိရင် ဆေးသွားစစ်သင့်တယ်လို့ ဆိုပါတယ် ။ 

အဆိုပါ ပိုးတွေ့သူ ၂ ဦးမှာ အမှတ်စဉ် ၉၆၀ (မ) နဲ့ ၉၆၁ (ကျား) တို့ဖြစ်ပြီး ဘန်ကောက်ဖားဆီကျရွန်နယ်မြေ ဘန်ဝါ့ရပ်ကွက်မှ ဟိုတယ်ဝန်ထမ်းတွေဖြစ်ကာ နေမကောင်းလို့ ဆေးခန်းသွားပြရာက ၄ ရက်နေ့မှာ ကိုဗစ်-၁၉ ကူးစက်ခံထားရကြောင်း အဖြေထွက်တယ်လို့ thaipost.net သတင်းမှာ ဖော်ပြပါတယ်။    

ဘန်ကောက်ရောက် မြန်မာနိုင်ငံသားတွေ ဆန္ဒပြပွဲလုပ်ခွင့်မရှိပေမယ့် မိမိရောက်ရှိတဲ့ အ ရပ်ကနေ မြန်မာပြည်သူတွေနဲ့အတူ ဆုတောင်းပွဲတွေ လုပ်ဆောင်နိုင်သလို တဘက်ကလည်း CDM လုပ်ဆောင်နေတဲ့ ဝန်ထမ်းတွေအတွက် ထောက်ပံ့ကူညီမှုမှာ ပါဝင်နိုင်ကြောင်းဖိတ်ခေါ်ထား ပါတယ်။ 

လက်ရှိ ထိုင်းရောက်ရွှေ့ပြောင်းလုပ်သားအများစုဖြစ်တဲ့ အလှူရှင်ကနေ ထောက်ပံ့ငွေ ဘတ် ၂ သန်းနီးပါး လက်ခံရရှိပြီလို့ ဆိုပါတယ် ။ အဆိုပါထောက်ပံ့ငွေတွေနဲ့ ပတ်သက်တဲ့စာရင်းတွေကို Myanmar Community in Thailand လူမှုကွန်ရက်စာမျက်နှာမှာ မကြာခင်ဖော်ပြပေးမှာဖြစ်ပြီး နောက်ထပ် ထည့်ဝင်ကူညီလိုသူတွေအနေနဲ့  ဖုံးနံပတ် ၀၆၂ ၅၉၅ ၀၀၃၃ ကို ဆက်သွယ်နိုင်ပါတယ် ။ 

ထိုင်းနိုင်ငံ ဒုတိယမြို့တော် ချင်းမိုင်းမှာတော့ ဆန္ဒပြပွဲကို လုပ်ခွင့်ရှိပေမယ့် ဌာနဆိုင်ရာ အဖွဲ့အစည်း ၃ ခု လူထုကျန်းမာရေးဌာန ၊ မြူနီစီပါယ်ရုံးနဲ့ နယ်မြေခံရဲစခန်းတွေကို ကြိုတင် အကြောင်းကြားရမှာဖြစ်ပြီး ခရိုင်ကျန်းမာရေးဌာနက သတ်မှတ်ထားတဲ့ ကိုဗစ် ၁၉ ကာကွယ်ရေး စည်းကမ်းအတိုင်း ဆောင်ရွက်ရမယ်လို့  ချင်းမိုင်ရောက်မြန်မာနိုင်ငံသားများ စစ်အစိုးရဆန့်ကျင်ရေး ဆန္ဒပြပွဲစီစဉ်သူ တစ်ဦးဖြစ်တဲ့ ကိုဂျော်နီက ဒီဗွီဘီကို ပြောပါတယ် ။ 

“  သူတို့သတ်မှတ်ထားတဲ့ စည်းကမ်းချက်တွေနဲ့အညီ ဆန္ဒပြလို့ရပါတယ်ခင်ဗျ ၊ ဒါပေမဲ့ ထိုင်းနိုင်ငံရဲ့ လက်ရှိအခြေအနေကိုလည်း ကြည့်ရပါတယ်။ ကျနော်တို့ ချင်းမိုင်က ဆန္ဒပြပွဲနဲ့ လူထုဟောပြောပွဲကို မတ်လ ၂၇ ရက် တော်လှန်ရေးနေ့နဲ့အကိုက် လုပ်ဖို့ရည်ရွယ်ထားပေမဲ့ သူတို့ နယ်မြေအုပ်ချုပ်ရေးမှူး ရွေးကောက်ပွဲနဲ့ တိုက်ဆိုင်နေတော့ ဘယ်လိုလုပ်မလဲဆိုတာ ဆွေးနွေး နေပါတယ်၊ လုပ်တော့ လုပ်မယ်ခင်ဗျ   ”

ထိုင်းနိုင်ငံမှာ မြန်မာနိုင်ငံသားတွေ တရားဝင်အနေနဲ့ရော တရားမဝင်အနေနဲ့ပါ ဝင်ရောက်နေထိုင်နေတာ ၃ သန်းလောက်ရှိပါတယ်။

ကိုးကား - Thai Post