မန္တလေး မြတောင်သပိတ်စစ်ကြောင်းကို စစ်အာဏာသိမ်း လုံခြုံရေးတပ်တွေက အကြမ်းဖက် နှစ်ဖက်ညှပ်ဝင်ရောက်ဖြိုခွင်းခဲ့ပြီး ရိုက်နှက်ဖမ်းဆီးသွားမှုကြောင့် ရတနာပုံတက္ကသိုလ်က ဘူမိဗေဒကျောင်းသား ၁ ဦး သေဆုံးသွားတယ်လို့ ဒေသခံတဦးက ပြောပါတယ်။
ဒီနေ့မနက်ပိုင်း ၁၁ ခွဲလောက်က မန္တလေး ၂၉ လမ်းနဲ့ လမ်း ၃၀ နားမှာ မြတောင်သပိတ်စစ်ကြောင်းကို စစ်တပ်နဲ့ရဲတပ်ဖွဲ့ဝင်တွေက အကြမ်းဖက်ဖြိုခွင်းခဲ့မှုကြောင့် မောင်လင်းထက် သေဆုံးခဲ့ရတာဖြစ်ပြီး ဒဏ်ရာရသူတွေလည်း ရှိတယ်လို့ မြတောင်သပိတ်စစ်ကြောင်းမှာ ပါဝင်ခဲ့တဲ့ အမျိုးသမီးတဦးက ပြောပါတယ်။
“မောင်လင်းထက်ဟာ မြတောင်သပိတ်စစ်ကြောင်းမှာ သတ္တိရှိရှိနဲ့ စစ်အာ ဏာရှင်ကျဆုံးရေးသပိတ်တိုက်ပွဲမှာ ရှေ့တန်းကနေ အမြဲပါဝင်ခဲ့သလို အမြဲတက်ကြွနေတဲ့ ကျောင်းသားတဦးပါ။ အခုလို ဖြစ်လိမ့်မယ်လို့ လုံးဝထင်မထားဘူး၊ အရမ်းရက်စက်လွန်းတယ်။ ကျမတို့ကတော့ ဒီမြတောင်သပိတ်စစ်ကြောင်းနဲ့ ဆက်ပြီး စစ်အာဏာရှင်ကိုရအောင် တိုက်မှာမောင်လင်းထက်အတွက် ကျေကိုမကျေနပ်ဘူး၊ ဒင်းတို့ အကြွေးပြန်ဆပ်ရမယ်” လို့ ပြောပါတယ်။
အာဏာသိမ်းအစိုးရရဲ့ အကြမ်းဖက်ရိုက်နက်မူကြောင့် ကျဆုံးခဲ့ရတဲ့ အသက် ၁၉ နှစ်အရွယ် ဘူမိဗေဒကျောင်းသား မောင်လင်းထက်ဟာ မန္တလေး အောင်မြေသာစံမြို့နယ် မြောက်ပြင် (၉) လမ်း၊ ပန်းတော့ရပ်ကွက်မှာ နေထိုင်သူ ဖြစ်ပါတယ်။
မောင်လင်းထက် သေဆုံးသွားကြောင်း အာဏာသိမ်းစစ်ကောင်စီဘက်က မိဘတွေဆီ အကြောင်းကြားလာတာလို့ သိရပါတယ်။
