ရှမ်းပြည်နယ် တာချီလိတ်မြို့မှာ လူ ၅ ယောက်ထက်ပိုပြီး လူစုလူဝေးမပြုလုပ်ဖို့ စစ်အစိုးရက ပုဒ်မ-၁၄၄ ထုတ်ပြန်ထားပေမယ့် တာချီလိတ်မြို့ခံ ပြည်သူတွေကတော့ စစ်အာဏာရှင် ဆန့်ကျင်ရေး ဆန္ဒပြပွဲ ဆက်လက်ပြုလုပ်နေရာမှာ လူဦးရေ သိန်းချီပါဝင်လာပါတယ်။
ဖေဖော်ဝါရီ ၉ ရက်နေ့မှာတော့ တပ်မတော်က အာဏာသိမ်းမှုကို ဆန့်ကျင်ကြောင်း ဆန္ဒပြတဲ့နေရာမှာ ဝန်ထမ်းတွေ၊ ကျောင်းဆရာမတွေ၊ ကျန်မာရေးဝန်ထမ်းတွေ အပြင် မြန်မာဆက်သွယ်ရေး MPT က ဝန်ထမ်းတွေပါ ပါဝင်လာပြီး ရပ်ကွက်၊ ကျေးရွာအလိုက် ချီတက်ဆန္ဒထုတ်ဖော်ခဲတာ ဖြစ်ပါတယ်။
တာချီလိတ်၊ ရွှေတိဂုံဘုရားအောက်ခြေက စထွက်ချိန် လူဦးရေနည်းပါးခဲ့ပေမယ့် ဟောင်လိတ်လမ်းဆုံ အရောက်လောက်မှာ လူဦးရေပိုများလာပြီး မြို့ပြင်ကျေးရွာက မိုင်းကိုး၊ မယ်ယန်းဘက်ကလည်း လာရောက်ပူးပေါင်းပါဝင်လာပါတယ်။
မနေ့က ၈ ရက်နေ့မှာတော့ ဆန္ဒထုတ်ဖော်ရာမှာ ပါဝင်ခဲ့သူတွေထဲက အန်အယ်လ်ဒီပါတီဝင်တစ်ဦး ဖြစ်တဲ့ ဦးကျော်မြင့်နဲ့ မဇ္ဈိမလူမှုကူညီရေးအသင်းဥက္ကဋ္ဌ ဦးတင့်ဆွေတို့ကို တပ်မတော်က မနက် ၂ နာရီခွဲလောက်မှာ လာရောက်ဖမ်းဆီးခေါ်ဆောင်သွားပြီး အခုအချိန်ထိတော့ ပြန်လည်လွှတ်ပေးခြင်း မရှိသေးပါဘူး။