ဟင်္သာတဆေးရုံက သူနာပြုဆရာမကြီးအပါအဝင် ကိုဗစ်-၁၉ လူနာ ၂ ဦး သေဆုံး
DVB
·
January 12, 2021
ဧရာဝတီတိုင်း၊ ဟင်္သာတပြည်သူ့ဆေးရုံမှာ တာဝန်ထမ်းဆောင်နေတဲ့ သူနာပြုဆရာမကြီး အပါအဝင် ဧရာဝတီတိုင်းထဲက ကိုဗစ်-၁၉ လူနာ ၂ ယောက် မနေ့က သေဆုံးခဲ့ပါတယ်။
ဆေးရုံဝင်းထဲမှာပဲ နေထိုင်တဲ့ အသက် ၆၀ အရွယ် သူနာပြုဆရာမကြီးဟာ အတူနေ သမီးဖြစ်သူ အနံ့ပျောက်တာကြောင့် ပြီးခဲ့တဲ့ ဒီဇင်ဘာ ၂၉ ရက်မှာတော့ COVID-19 Ag RDT နဲ့ စစ်ဆေးခဲ့ပြီး ပိုးတွေ့ခဲ့ပါတယ်။
သူ့မှာ သွေးတိုးနဲ့ ဆီးချိုရောဂါအခံရှိပြီး ပိုးတွေ့ချိန်မှာ ဖျားတာ၊ ချောင်းဆိုးတာနဲ့ ခေါင်းမူးတာတို့ ဖြစ်ခဲ့တယ်လို့ ဆိုပါတယ်။
ဟင်္သာတဆေးရုံကြီးမှာ ကုသခံနေတုန်း အောက်စီဂျင်ကျလာတာကြောင့် ဇန်နဝါရီ ၂ ရက်မှာ ရန်ကုန် မြောက်ဥက္ကလာပ အထူးကုဆေးရုံကြီးဆီ လွှဲပြောင်းပို့ဆောင်ခဲ့ပြီး အထူးကြပ်မတ်ကုသဆောင်မှာ ကုသခဲ့ပေမယ့် ဇန်နဝါရီ ၁၁ ရက် ည ၉ နာရီကျော်မှာ ကွယ်လွန်ခဲ့ပါတယ်။
နောက်တယောက်ကတော့ လပွတ္တာမြို့နယ်မှာ နေထိုင်တဲ့ အသက် ၄၂ နှစ်အရွယ် အမျိုးသား ဖြစ်ပြီး အနံ့ပျောက်တာ၊ နှာပိတ်တာတို့ကြောင့် လပွတ္တာ ပြည်သူ့ဆေးရုံကြီးမှာ ဇန်နဝါရီ ၂ ရက်နေ့က လာရောက်ပြသပြီး စစ်ဆေးရာမှာ ပိုးတွေ့ခဲ့တာပါ။
သူကတော့ အရက်စွဲတာနဲ့ နာတာရှည် အသည်းရောဂါရှိသူဖြစ်ပြီး ဆေးရုံမှာတက်ရောက် ဆေးကုသမှုခံယူနေစဉ် မနေ့ ညနေက ကွယ်ကွန်ခဲ့တာပါ။
တိုင်း ပြည်သူ့ကျန်းမာရေး ဦးစီးဌာနရဲ့ ထုတ်ပြန်ချက်အရ ဟင်္သာတမြို့နယ်ထဲမှာ မနေ့က ကိုဗစ်-၁၉ လူနာသစ် ၆၉ ယောက် ထပ်တွေ့ခဲ့ပြီး ဘိုကလေး၊ ပုသိမ်၊ လေးမျက်နှာ၊ ဓနုဖြူ၊ အင်္ဂပူ၊ မြောင်းမြနဲ့ ကြံခင်းမြို့နယ်တို့မှာလည်း လူနာသစ်တွေ တွေ့ခဲ့ပြီး စုစုပေါင်း ၁၀၄ ယောက်ဖြစ်ပါတယ်။
ဒီမနက်ပိုင်းအထိ ဧရာဝတီတိုင်းထဲမှာ ကိုဗစ်-၁၉ ပိုးတွေ့လူနာ ၄၇ ယောက် သေဆုံးခဲ့ပြီး ဖြစ်သလို ပိုးတွေ့လူနာ စုစုပေါင်းကတော့ ၅၁၁၃ ယောက် ရှိပါတယ်။
