ပြည်တွင်းကိုဗစ်ကာလ ၇ လပြည့်၊ ကူးစက်ခံရသူ ၄၁,၀၀၀ ကျော်၊ သေဆုံးသူ ၁,၀၀၀ ကျော်လာ
DVB
·
October 23, 2020
ကျန်းမာရေးနှင့် အားကစားဝန်ကြီးဌာနရဲ့ ထုတ်ပြန်ချက်တွေအရ မြန်မာတနိုင်ငံ လုံးအတိုင်းအတာနဲ့ ကိုဗစ်-၁၉ ရောဂါကူးစက်ခံရသူစုစုပေါင်း ၄၀,၀၀၀ ကျော်လာခဲ့ပြီဖြစ်ကာ ရန်ကုန်တိုင်း၊ မြောက်ဥက္ကလာပမြို့နယ်က ပိုးတွေ့လူနာအများဆုံးမြို့နယ် ဖြစ်လာပါတယ်။
မြန်မာနိုင်ငံမှာ ပထမဆုံးသော ကိုဗစ်-၁၉ အတည်ပြုလူနာကိုတော့ ပြီးခဲ့တဲ့ မတ် ၂၃ ရက်နေ့က စတင်တွေ့ရှိခဲ့တာဖြစ်ပြီး ဒီကနေ့မှာတော့ ၇ လတင်းတင်း ပြည့်မြောက်ခဲ့ ချိန်မှာ ပိုးတွေ့လူနာ ၄၁,၀၀၈ ယောက်နဲ့ သေဆုံးသူ ၁,၀၀၅ ယောက် ရှိလာခဲ့တာ ဖြစ်ပါတယ်။
တနိုင်ငံလုံး ပိုးတွေ့လူနာအများဆုံးဖြစ်တဲ့ မြောက်ဉက္ကလာပမြို့နယ်မှာ ကိုဗစ်-၁၉ ပိုးတွေ့လူနာ ၂,၁၈၄ ယောက်ရှိနေပြီး သူ့နောက်မှာတော့ မင်္ဂလာဒုံ၊ လှိုင်သာယာ၊ အင်းစိန်နဲ့ သင်္ဃန်းကျွန်းမြို့နယ်တွေက ကိုဗစ်-၁၉ ပိုးတွေ့လူနာ ၁,၉၈၆ ယောက်၊ ၁,၉၇၃ ယောက်၊ ၁,၇၇၇ ယောက်၊ ၁,၆၂၁ ယောက်စီ အသီးသီးနဲ့ ထိပ်ဆုံး ၅ မြို့နယ်အနေနဲ့ ရှိနေခဲ့တာ ဖြစ်ပါတယ်။
တကျော့ပြန်ကူးစက်မှုတွေ စတင်ရာ ရခိုင်ပြည်နယ်မြို့တော် စစ်တွေမြို့မှာတော့ ကိုဗစ်-၁၉ ပိုးတွေ့လူနာ ၁,၂၃၀ ယောက် ရှိနေခဲ့တာပါ။
ပြည်နယ်နဲ့ တိုင်းအလိုက်ကြည့်မယ်ဆိုရင်တော့ ရန်ကုန်တိုင်းက လူနာအရေအတွက် ၃ သောင်းကျော် ကိုဗစ်-၁၉ ရောဂါကူးစက်ခံထားရပြီး ပိုးတွေ့လူနာအများဆုံး ဖြစ်ကာ ဒုတိယနေရာမှာတော့ ရခိုင်ပြည်နယ်က ရှိနေတာ ဖြစ်ပါတယ်။
တရုတ်နိုင်ငံအလယ်ပိုင်း ဝူဟန်မြို့က စတင်ခဲ့တဲ့ ကိုဗစ်-၁၉ ရောဂါကူးစက်ပျံ့နှံ့မှု ဟာ တကမ္ဘာလုံး ကပ်ရောဂါအသွင်ဆောင်လာခဲ့ပြီး လက်ရှိအချိန်ထိ နိုင်ငံပေါင်း ၂၀၀ ကျော်မှာ ရောဂါကူးစက်ခံရသူ စုစုပေါင်း ၄၁ ဒသမ ၈ သန်းကျော်လာခဲ့ပြီဖြစ်ကာ သေဆုံးသူ ၁ ဒသမ ၁ သန်းကျော်နေခဲ့ပြီ ဖြစ်ပါတယ်။
တကျော့ပြန်ကူးစက်မှုတွေ မြင့်တက်နေတဲ့ မြန်မာနိုင်ငံကတော့ အာဆီယံနိုင်ငံ တွေထဲမှာ ကိုဗစ်-၁၉ ကြောင့် သေဆုံးမှုအမြင့်ဆုံး အင်ဒိုနီးရှားနဲ့ ဖိလစ်ပိုင်ပြီးရင် တတိယမြောက် သေဆုံးမှုအများဆုံးနိုင်ငံ ဖြစ်လာခဲ့ပါတယ်။
