ချင်းပြည်နယ် အဝင်ထွက်ဂိတ်များတွင် ကြပ်မတ်စစ်ဆေးနေ
DVB
·
August 28, 2020
ချင်းပြည်နယ်မှာ ကိုဗစ်-၁၉ ရောဂါ ကူးစက်ပြန့်ပွားလာတာမရှိစေဖို့ ပြည်နယ်အတွင်း ဝင်ရောက်တဲ့ အဝင်အထွက်ဂိတ်တွေနဲ့ မြို့အဝင်ဂိတ်တွေကို ဩဂုတ် ၂၇ ရက်ကစပြီး စိစစ်ကြပ်မတ်နေပါတယ်။
ရခိုင်ပြည်နယ်မှာ ကိုဗစ်-၁၉ ပြန့်ပွားမှုများပြားလာတဲ့ အခြေနေအရ စိစစ်ဆောင်ရွက်နေ တာဖြစ်ပြီး ရောဂါဖြစ်ပွားတဲ့ ဒေသက ပြန်လာသူတွေကို Quarantine ထားရှိမယ်လို့ သိရပါတယ်။
ချင်းပြည်နယ် လူမှုရေးဝန်ကြီး ဦးပေါင်လွန်းမင့်ထန်က “ဆောင်ရွက်နေကျဆိုတာထက် အခုရက်ပိုင်းမှာ အရင်ထက်ပိုမိုထိရောက်အောင် စိစစ် ကြပ်မတ်နေပါတယ်။ လက်ရှိအခြေနေက ရခိုင်ပြည်နယ်ဘက်မှာ ကိုဗစ်-၁၉ ပိုဆိုးလာတာရယ်၊ အိန္ဒိယဘက်က နယ်စပ်တွေမှာ Lockdown တွေ ပြန်ဖြစ်လာတာရယ်ကြောင့်ပါ။ ကိုဗစ်-၁၉ နဲ့ ပတ်သက်ပြီး အသိပညာပေးတာတွေလည်း အမြဲလုပ်နေပါတယ်"လို့ ပြောပါတယ်။
ချင်းပြည်နယ်ထဲက မြို့နယ်တွေမှာလည်း ခရီးသွားလမှုစိစစ်တာ၊ ကိုယ်ပူချိန်တိုင်းတာ၊ ကျန်းမာရေးစစ်ဆေးတာတွေနဲ့ ကိုဗစ်-၁၉ နဲ့ ပတ်သက်ပြီး အသိပညာပေးတာတွေလည်း လုပ် ပါတယ်။
ချင်းပြည်နယ်မှာ လတ်တလော ကိုဗစ်-၁၉ ကူးစက်ခံထားရသူ ၄ ဦးရှိပြီး လက်ရှိမှာ တီးတိန်မြို့ပြည်သူ့ဆေးရုံကြီးမှာ ကုသမှုခံယူနေပါတယ်။
မြန်မာနိုင်ငံမှာ ဩဂုတ် ၂၈ ရက် မနက်အထိ ကိုဗစ်-၁၉ ကူးစက်ခံရသူ ၆၂၈ ဦးရှိနေပြီး ပိုးကင်းစင်လာသူ ၃၄၉ ဦးရှိကာ သေဆုံးသူ ၆ ဦးရှိပါတယ်။
သတင်း- ရန်နိုင်စိုး