စစ်တွေမြို့၌ ညမထွက်ရ အမိန့်ထုတ်ပြန်
DVB
·
August 21, 2020
ရခိုင်ပြည်နယ် စစ်တွေမြို့မှာ ကိုဗစ်-၁၉ ပိုးတွေ့လူနာ တိုးလာနေတဲ့အတွက် သြဂုတ် ၂၁ ရက်နေ့ကစတင်ပြီး ညမထွက်ရအမိန့် ထုတ်ပြန်လိုက်ပါတယ်။
စစ်တွေမြို့နယ် အုပ်ချုပ်ရေးမှူး ဦးအောင်ဇော်ဦး လက်မှတ်ရေးထိုး ထုတ်ပြန်လိုက်တာပါ။
ရခိုင်ပြည်နယ် စစ်တွေမြို့နယ်မှာ အခုလက်ရှိဖြစ်ပေါ်နေတဲ့ ကိုဗစ်-၁၉ ရောဂါ အများပြည်သူတွေကို အချိန်တိုအတွင်း ကူးစက်ခံရမှု မရှိစေဖို့နဲ့ အချိန်မီ ထိန်းသိမ်းနိုင်ဖို့ အခုလို ညမထွက်ရ အမိန့်ထုတ်ပြန်ရတာလို့ ရေးသားထားပါတယ်။
ညမထွက်ရ အမိန့်မှာ ည ၉ နာရီက မနက် ၄ နာရီထိ ၂ လ ဖြစ်ပြီး အများပြည်သူ အကျိုးငှာ ရည်ရွယ်ထုတ်ပြန်တဲ့ အမိန့်ဖြစ်တာကြောင့် လိုက်နာဖို့ ပျက်ကွက်ပါက တည်ဆဲဥပဒေအရ အရေးယူခံရမယ်လို့ ဆိုပါတယ်။
ရခိုင်ပြည်နယ် စစ်တွေမြို့မှာ ပြည်ပခရီးသွားရာဇဝင်မရှိတဲ့သူတွေ ကိုဗစ်-၁၉ ရောဂါ ကူးစက်မှု မြင့်မားလာနေပြီး စစ်တွေပြည်သူ့ဆေးရုံကြီးမှာ ဒီနေ့ညနေအထိ အတည်ပြုလူနာ ၁၈ ဦးနဲ့ စောင့်ကြည့်လူနာ ၁၁ ဦးထိ ရှိတယ်လို့ သိရပါတယ်။
သတင်း - လင်းလက်
