မန္တလေးတိုင်း ၁၂ မြို့နယ်တွင် လျှပ်စစ်မီတာခ အွန်လိုင်းမှ ပေးသွင်းနိုင်ရေး လုပ်ဆောင်
DVB
·
July 18, 2019
မန္တလေးတိုင်းအတွင်း လျှပ်စစ်မီတာ အွန်လိုင်းကနေ ငွေပေးချေနိုင်ဖို့အတွက် ၁၂ မြို့နယ်မှာ ဆောက်ရွက်နေတယ်လို့ လျှပ်စစ်ဓာတ်အားပေးရေး ကော်ပိုရေးရှင်းက ပြောပါတယ်။
လက်ရှိမှာတော့ မန္တလေးခရိုင်အတွင်း လျှပ်စစ်ဓာတ်အားသုံးစွဲမှုအတွက် ပေးသွင်းရမယ့် မီတာခတွေကို ဘဏ်တွေနဲ့ ချိတ်ဆက်ကာ အွန်လိုင်းကနေ ပေးသွင်းနိုင်ပြီဖြစ်ပေမယ့် လူသိနည်းပါးပြီး ပေးသွင်းမှု အလွန်နည်းနေသေးတယ်လို့ ဆိုပါတယ်။
မန္တလေးခရိုင်အပြင် စက်မှုဇုန်ရှိတဲ့မြို့တွေ၊ မြင်းခြံ၊ ကျောက်ဆည်၊ ပြင်ဦးလွင်၊ မိတ္ထီလာ၊ ပျော်ဘွယ်၊ စဥ့်ကိုင်၊ ဝမ်းတွင်း၊ ရမည်းသင်း၊ ပုဂံ၊ ညောင်ဦးနဲ့ ကျောက်ပန်းတောင်း စတဲ့ မြို့ကြီး ၁၂ မြို့မှာပါ ပေးသွင်းနိုင်ဖို့ ဆောင်ရွက်နေပါတယ်။
လွန်ခဲ့တဲ့ ၂ နှစ်လောက်ကစတင်ပြီး MESC Web Portal ကို တည်ဆောက်ခဲ့တဲ့အတွက် မန္တလေးခရိုင် အတွင်းက လျှပ်စစ်ဓာတ်အားသုံးစွဲသူတွေအနေနဲ့ သုံးစွဲတဲ့ယူနစ်နဲ့ ကျသင့်တဲ့ မီတာဘေလ်ကို အွန်လိုင်းကနေ ကြည့်ရှုလို့ရအောင် ဆောင်ရွက်ပေးခဲ့တယ်လို့ ဆိုပါတယ်။
၂၀၁၉ ခုနှစ် ဇန်နဝါရီလကနေ စတင်ပြီး မီတာဘေလ်ကို ဘဏ်တွေနဲ့ ချိတ်ဆက်ကာ အွန်လိုင်းကနေ ပေးသွင်းလို့ရတဲ့အထိ ဆောင်ရွက်ပေးထားပြီတယ်လို့ မန္တလေးတိုင်းဒေသကြီး လျှပ်စစ်ဓာတ်အားပေးရေးကော်ပိုရေးရှင်း ဒုတိယ တိုင်းအထွေထွေ မန်နေဂျာက ပြောပါတယ်။
မန္တလေးခရိုင်တခုတည်းတင် လျှပ်စစ်ဓာတ်အားသုံးစွဲသူ ၃၀၇၁၂၂ ဦး ရှိပေမယ့် မေလအတွင်း အွန်လိုင်းကနေ မီတာဘေလ်ပေးချေမှု ၂၆၂၄ ဦးသာ ရှိခဲ့တယ်လို့ ပြောပါတယ်။
မန္တလေးတိုင်းဒေသကြီး လျှပ်စစ်ဓာတ်အားပေးရေးကော်ပိုရေးရှင်း ဒုတိယ တိုင်းအထွေထွေ မန်နေဂျာ ဦးမြင့်လွင်က ''အခု ဘဏ်တွေနဲ့ချိတ်ပြီးတော့ အွန်လိုင်းကနေ မီတာခ ပေးသွင်းတဲ့သူဟာဆိုရင်တော့ မေလအထိဆိုရင် ၂၆၂၄ ဦးပဲရှိပါသေးတယ်။ ကျနော်တို့ မန္တလေးတိုင်းဟာဆိုရင် မေလအထိကို ဓာတ်အားသုံးစွဲတဲ့သူဟာ ၈၀၅၅၆၆ဦး ရှိတဲ့အတွက်ကြောင့် အွန်လိုင်းကနေ ငွေပေးသွင်းတဲ့သူဟာ နည်းနည်းလေးပဲ ရှိသေးတယ်လို့ ပြောရမှာဖြစ်ပါတယ်” လို့ ပြောပါတယ်။
ချိတ်ဆက်ပေးသွင်းလို့ရမယ့် ဘဏ်တွေကတော့ သမဝါယမဘဏ်၊ အာရှစိမ်းလန်း ဖွံ့ဖြိုးရေးဘဏ်၊ ပထမပုဂ္ဂလိကဘဏ်၊ မြန်မာ့ရှေ့ဆောင်ဘဏ်၊ ကမ္ဘောဇဘဏ်တို့နဲ့ ချိတ်ဆက်ပေးသွင်းနိုင်မယ်လို့ သိရပါတယ်။
ငွေပေးသွင်းရာမှာ ဘဏ်တွေထံ ကြိုတင်ငွေပေးသွင်းထားရမှာဖြစ်ပြီး အွန်လိုင်းကနေ ကျသင့်မီတာခ ကြည့်ရှုကာ အဆိုပါ ပေးသွင်းငွေထဲကနေ ဘဏ်တွေက လျှပ်စစ်ဓာတ်အားပေးရေးကော်ပိုရေးရှင်းထံ ပြန်လည်ပေးသွင်းမယ်လို့ ဆိုပါတယ်။
လစဉ် သုံးစွဲထားတဲ့ မီတာယူနစ်ကို သိရှိလိုပါက www.mescmm.com မှာ ဝင်ရောက်ကြည့်ရှုနိုင်တယ်လို့လည်း သိရပါတယ်။
အွန်လိုင်းကနေ ငွေပေးသွင်းမှု အားနည်းနေတာဟာ ဘဏ်နဲ့ချိတ်ဆက်သုံးစွဲတဲ့ အလေ့အထ အားနည်းနေတာ ဖြစ်နိုင်သလို အခြေခံ လူတန်းစားများတဲ့အတွက် ဘဏ်မှာ ငွေစုနိုင်သူ နည်းပါးတာ၊ အွန်လိုင်းငွေပေးချေဖို့ မဆောင်ရွက်တတ်တာ စတဲ့ အကြောင်းအရာတွေကြောင့် ဖြစ်နိုင်တယ်လို့ သိရပါတယ်။ အဲဒီအတွက် အသိပညာပေးမှုတွေ ပိုမိုလုပ်ဆောင်သွားမယ်လို့လည်း တာဝန်ရှိသူတွေက ပြောပါတယ်။
အွန်လိုင်းကနေ ငွေပေးသွင်းပါက အချိန်ကုန်သက်သာတာ၊ ကုန်ကျစရိတ်နည်းပါးတာ စတဲ့ အားသာချက်တွေ ရှိတယ်လို့လည်း ဦးမြင့်လွင်က ပြောပါတယ်။
"အွန်လိုင်းကနေ ဘေလ်ဆောင်ရင် နံပါတ် ၁ အချိန်ကုန် သက်သာတယ်ဗျာ၊ မီတာရုံးသွားရမယ်၊ မီတာရုံးသွားတဲ့အချိန်မှာ တန်းစီရမယ်၊ စောင့်နေရမယ့် အချိန်ကုန်သက်သာမယ်၊ နံပါတ် ၂ က သွားရမယ့် စရိတ်ဗျာ၊ ဆိုင်ကယ်နဲ့ပဲသွားမယ်ဆိုရင် ဆိုင်ကယ်ဆီကုန်ဦးမယ်၊ အချိန်ကုန်သက်သာတယ်၊ ငွေကုန်သက်သာတယ်။ နောက်တခုက ကျနော်တို့ အွန်လိုင်းနဲ့ ဆောင်တာသည် အော်တိုမက်တစ် ကျနော်တို့ ဌာနရယ်၊ ဘဏ်ရယ် ခင်ဗျား မီးသုံးတဲ့ မီတာဘေလ်ပေါ့ဗျာ၊ တဦးစီ တဦးစီရဲ့ အချက်အလက်တွေကို ချိတ်ထားပြီးဖြစ်တဲ့အတွက်ကြောင့် ဘဏ်မှာသာ ခင်ဗျား ငွေရှိခဲ့သည်ဆိုသော် ရက်လွန်သွားလို့ ရက်လွန်ဒဏ်ကြေးပေးရမှာလည်း မပူပင်ရဘူး၊ သူ့ဟာ သူဆောင်သွားမှာပဲ ဘဏ်က၊ အဲဒီ အားသာချက်တွေရှိပါတယ်။''
လတ်တလောအနေနဲ့ လျှပ်စစ်ရုံးတွေမှာ ကိုယ်တိုင် မီတာခ သွားရောက်ပေးဆောင်ရာမှာ ဝန်ထမ်းအင်အား များပြားလာတဲ့အပြင် ပုဂ္ဂလိကကုမ္ပဏီတွေနဲ့ ပူးပေါင်းဆောင်ရွက်နေတဲ့အတွက် အရင်လို စောင့်ဆိုင်းရတာ မရှိတော့ပဲ မြန်ဆန်လာတယ်လို့ မီတာခပေးသွင်းနေသူတွေက ပြောပါတယ်။
အွန်လိုင်းကနေ မီတာဘေလ်ပေးချေဖို့အတွက်ကိုတော့ နားလည်နိုင်သူတွေရော၊ နားမလည်နိုင်သူတွေပါရှိနိုင်ပြီး ဘဏ်အကောင့်မရှိသူတွေ၊ ဘဏ်အကောင့်မဖွင့်နိုင်သူတွေအတွက် အခက်အခဲ ရှိနိုင်တယ်လို့ မီတာခပေးဆောင်နေသူတွေက ပြောပါတယ်။
မဟာအောင်မြေမြို့နယ်နေ ဦးထွန်းဝင်းက ''ဘဏ်အကောင့်က တချို့ကျ ဘဏ်ကိုသွားဖို့ အချိန်မရတာတို့၊ ပိုက်ဆံငွေအမောင့် ဘဏ်ထဲမှာ မထားနိုင်တာတို့၊ အဲဒီတော့ ဦးလေးတို့က အမြဲတမ်း လည်ပတ်နေရတဲ့သူတွေကျတော့ ငွေအမောင့်ကို ဘဏ်ထဲမှာ သွားထားလို့ မရတော့ဘူးလေ။ ငွေကျတော့ ငွေသေကြီးဖြစ်သွားမှာပေါ့။ ပိုက်ဆံချမ်းသာတဲ့ လူတွေကျတော့ တမျိုးပေါ့၊ သိန်းလေးငါးခြောက်ထောင် ချမ်းသာတဲ့လူတွေကျတော့ တစ်ထောင်နှစ်ထောင်လောက် သွင်းထားပြီးတော့ ဒီဘဏ်ထဲကပဲ အလုပ်လုပ်လို့ ကောင်းတယ်လေ။ နောက် ငွေချေးတာတို့ အဲ့ဒါမျိုးတွေ အင်စတောမန့်တွေနဲ့ကိစ္စ မျိုးဆိုရင်တော့ မဆိုးဘူးပေါ့။ ဦးလေးတို့က ဒီဟာလေး ပေးချေဖို့လောက်နဲ့ကတော့ ပြဿနာမရှိဘူးပေါ့၊ နိုင်ငံခြားမှာလို ငွေသွင်းတဲ့စက်တွေ ဘာတွေရှိရင်တော့ မဆိုးဘူးပေါ့၊ ဘဏ်ကလေ'' လို့ ပြောပါတယ်။
ထိန်ထိန်လင်း
