ဆေးသွင်းရာမှ ၂ လသားကလေး လက်ဖြတ်လိုက်ရသဖြင့် ကျန်းမာရေးဌာနကို တိုင်ကြားမည်

ပဲခူးတိုင်းဒေသကြီး ကျောက်ကြီးမြို့ သိန်တန်းရပ်ကွက်မှာ နေထိုင်တဲ့ ၂ လခွဲအရွယ် ကလေးငယ်တဦး ဆေးရုံမှာ ရင်ကျပ်ရောဂါနဲ့ အကြောဆေးသွင်းရာကနေ လက်ဖြတ်လိုက်ရလုိ့ ကျန်းမာရေးဌာနကို တိုင်ကြားမယ်လို့ မိခင်ဖြစ်သူက ပြောပါတယ်။ အသက် ၂ လခွဲအရွယ်ရှိတဲ့ မောင်ထက်ဝေခိုင်ဦးဟာ ရင်ကျပ်ရောဂါ ခံစားနေရတာကြောင့် မိဘတွေက သြဂုတ် ၁၇ ရက်နေ့က ကျောက်ကြီးမြို့နယ်ဆေးရုံကို ပို့ဆောင်ကုသခဲ့ပါတယ်။ ပို့ဆောင်ကုသရာမှာ ဆေးရုံတာဝန်ကျ သူနာပြုတွေက အကြောဆေး (ဒေသအခေါ် ပုလင်းကြီး) ချိတ်ပေးခဲ့တာမှာ အပ်ထိုးထားတဲ့ ကလေးငယ်ရဲ့ လက်ဟာ ညိုမည်း ရောင်ရမ်းလာတာကြောင့် သြဂုတ် ၂၄ ရက်နေ့မှာ တောင်ငူခရိုင်ဆေးရုံကို ပြောင်းရွှေ့ ကုသခဲ့ရတယ်လို့ ဆိုပါတယ်။ တောင်ငူခရိုင် ဆေးရုံမှာ မသက်သာတာကြောင့် ရန်ကုန်ကလေးဆေးရုံကြီးကို စက်တင်ဘာ ၁ ရက်နေ့က လွှဲပြောင်းပေးခဲ့ရပြီး ကလေးငယ်ရဲ့ ဘယ်ဘက်လက်ကို စက်တင်ဘာ ၄ ရက်နေ့က ဖြတ်ပစ်ခဲ့ရတယ်လို့ မိသားစုဝင်တွေက ဆိုပါတယ်။ ကလေးမိခင် ဒေါ်ဖြူနှင်းဝေက “စဖြစ်တာကတော့ ရင်ကျပ်တာပေါ့။ ကျောက်ကြီးဆေးရုံကို တင်လိုက်တယ်။ သူတို့ အလုံးကြီး ချိတ်ပေးတယ်ပေါ့နော်။ သွင်းတဲ့အချိန်မှာ ဘာမှမဖြစ်သေးဘူး။ နောက် တရက် နှစ်ရက်နေတော့ သူ့လက်ကလေးက ဖောင်းလာတယ်။ အဲဒီတော့ ဆရာမကို သွားပြောတယ်။ ဆရာမက အကြမ်းပတမ်းပဲ ဖြုတ်ပေးပါတယ်။ လက်ကလေးက မလှုပ်ရှားတော့ပါဘူး။ အဲဒါ ဆရာမတွေကို ပြောတော့ ဆရာမတွေက သူ့ကို ကြိုမပြောလို့ ကျမတို့လည်း အဆူခံရပါတယ်။ အဲဒါနဲ့ ကလေးလက်ကို သူတို့ အကောင်းဆုံး ဆေးနဲ့ ကုပေးဦးမယ်ဆိုပြီး တပတ်အကြာ စောင့်ခဲ့တယ်။ လက်လေးက မထူးလာဘူး။ ဒီ့ထက် ပိုဆိုးလာတယ်။ မည်းလာတယ်။ ပုပ်လာတယ်ပေါ့။ သူတို့ တာဝန်လွှဲစာပေးပါတယ်။ အဲဒါနဲ့ ကျမတို့ လွှဲစာအရ သွားရပါတယ်။ ကိုယ့်လမ်းစရိတ်နဲ့ပဲပေါ့။ တောင်ငူရောက်တော့ ဆရာမတွေက ရောက်ရောက်ချင်းပဲ ကလေးကို ဆေးကုသပေးတယ်။ ကုသပေးပြီး တပတ်လောက်နေတော့  ဆရာမတွေက သူတို့ ထောက်ပံ့ကြေးငွေနဲ့ ရန်ကုန် ကလေးဆေးရုံကြီးကို ထပ်လွှဲတယ်။ မနက်ခင်း ၁၁ နာရီခွဲလောက် သွားတာ၊ မနက် ၄ နာရီခွဲမှာ ရောက်တယ်။ ဆရာမတွေက ကလေးကို ဆက်ကုပေးပါတယ်။ နောက် ၅ ရက်လောက်မှာ သူ့ကို နားခွင့်ပေးထားတယ်။ ကလေး အားနည်းလို့ပေါ့။ ၆ ရက်မြောက်မှာ သူ့လက်ကလေးကို ဖြတ်တယ်။” လို့ ပြောပါတယ်။ အခုလို ကလေးငယ်ရဲ့ လက်ကို ဖြတ်ပစ်ရတဲ့အပေါ် မိသားစုဝင်တွေက ကျေနပ်မှုမရှိတဲ့ အတွက် ကျန်းမာရေးဝန်ကြီးဌာနနဲ့ ကလေးသူငယ် စောင့်ရှောက်ရေးအဖွဲ့တွေ ဆီကို တိုင်ကြားသွားမယ်လို့လည်း ဆိုပါတယ်။ ဖြစ်စဉ်နဲ့ပတ်သက်ပြီး ဒီဗွီဘီက ကျောက်ကြီးမြို့နယ် ဆေးရုံအုပ်ကြီးကို သွားရောက်မေးမြန်းခဲ့ရာမှာ ဖြေဆိုဖို့ တိုင်းအဆင့်ကို တင်ပြရမှာဖြစ်ပြီး နောက်တကြိမ် လာရောက်ဖို့ ချိန်းဆိုခဲ့ပါတယ်။ နောက်တကြိမ် ဒီဗွီဘီက သွားရောက်မေးမြန်းရာမှာတော့ “တိုင်းက ခွင့်ပြုတယ်လည်း မဟုတ်ဘူး။ ခွင့်မပြုဘူးလည်း မဟုတ်ဘူး။ အဲဒီအတွက် ကျနော် မဖြေနိုင်ဘူး။ သူတို့တွေလည်း တိုင်ကြဦးမှာ။ အဲဒီကျမှ ရှင်းတော့မယ်” လို့ပဲ ကျောက်ကြီးမြို့နယ် ဆေးရုံအုပ်ကြီးက ပြန်လည်ဖြေဆိုခဲ့ပါတယ်။ သတင်း - ကျော်အောင်(ကညွတ်ကွင်း)

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up