ပေါက်တောမြို့နယ် အလကခွဲကျောင်းအတွင်း ဆရာမတွေရဲ့ အဆောင်မှာ အမျိုးသားတဦးက ညအချိန်မတော် တံခါးတွန်းဖွင့်ပြီး အခန်းတွင်းဝင်ဖို့ ကြိုးပမ်းခဲ့တာနဲ့ ပတ်သက်လို့ ဖမ်းဆီးအရေးယူပေးဖို့ ဇွန် ၈ ရက်နေ့က ရဲစခန်းမှာ ဆရာမတွေ အမှုဖွင့်တိုင်ကြားလိုက်ပါတယ်။ ရခိုင်ပြည်နယ်၊ ပေါက်တောမြို့နယ်၊ သစ်ပုတ်ကျေးရွာ အလကခွဲမှာ စာသင်ပြနေတဲ့ ဆရာမတွေရဲ့ အဆောင်နေ အိပ်ခန်းထဲကို ဇွန် ၆ ရက်နေ့ ည ၁၁ နာရီအချိန်လောက်မှာ အသက် ၃၀ နှစ်အရွယ် လူတဦးက အချိန်မတော် ကျောင်းဝင်းထဲ ၀င်ရောက်လာပြီး အိပ်ခန်းတံခါးကို တွန်းဖွင့်ဖို့ ကြိုးပမ်းခဲ့တာလို့ မူလတန်းပြဆရာ မသဇင်မြတ်က ပြောပါတယ်။ “အဲ့ဒီမှာ ၁၁ နာရီရှိနေပြီ။ ညီမတို့အိပ်တဲ့ နှစ်ယောက်ခန်းတံခါးကို နှစ်ချက်တွန်းဖွင့်လိုက်ပါတယ်။ ညီမတို့က လန့်ပြီး အော်လိုက်ကြပါတယ်။ အဲ့ဒီအချိန်မှာ တဘက်အခန်းကို ညီမတို့က လှမ်းအော်ပြီးတော့ အကူအညီ တောင်းလိုက်တယ်။ အကုန်လုံးထွက်ပြီး ဓာတ်မီးထိုးကြည့်လိုက်တဲ့အခါမှာ တံခါးရှေ့မှာ မတ်တပ်ရပ်ပြီး ညီမတို့ကို ကြည့်နေပါတယ်။ အဲ့ဒီအချိန်မှာ ညီမတို့ အရမ်းကိုကြောက်နေပြီ” လို့ ဒီဗွီဘီကို ပြောပါတယ်။ အဲဒီနောက် အဲဒီလူဟာ ကျောင်းဝင်းထဲက ထွက်မသွားဘဲ အပင်ရိပ်ကိုကွယ်ပြီး တုတ်တချောင်းနဲ့ ဓာတ်မီးကိုကိုင်ကာ မှောင်ရိပ်ခိုနေတာကြောင့် ရွာက တာဝန်ရှိသူတွေကို ဖုန်းဆက် အကူအညီတောင်းခဲ့လို့ လာရောက်ဖမ်းဆီးခဲ့ပြီးနောက် စစ်ဆေးမေးမြန်းပြီး ပြန်လွှတ်ပေးခဲ့တယ်လို့ ဆရာမက ဆက်လက်ပြောပါတယ်။ ဒါပေမယ့် အရင်ကလည်း အဲဒီလူဟာ ဆရာမတွေရဲ့ အတွင်းခံဘောင်းဘီ၊ ဘော်လီတွေ ယူပြီး ဆုတ်ဖြဲတာ၊ မတော်တရော်တွေ လုပ်တာရှိတာကြောင့် ဆက်ပြီး နှောင့်ယှက်မှာ စိုးရိမ်လို့ ဆရာမတွေက  ရဲစခန်းမှာ တိုင်ကြားခဲ့တာဖြစ်ကြောင်း ဆရာမ မသဇင်မြတ်က ပြောပါတယ်။ “အရင်တုန်းက ဆရာမတွေရဲ့ အတွင်းခံဘောင်းဘီတွေ၊ အတွင်းခံဘော်လီတွေ ယူသွားတယ်။ နောက်ပြီး ဆုတ်ဖြဲထားတယ်။ ပေါက်ကရတွေ လုပ်ပစ်ခဲ့တယ်။ အဲ့ဒီလိုမျိုးဖြစ်ခဲ့တယ်။ ညီမတို့နေတဲ့ အဆောင်က ဆရာမတွေက အကုန် အပျိုတွေပဲစုပြီး နေကြတာပါ။ မတော်မတရား ပြုကျင့်သွားမှာကို ညီမတို့ကြောက်တယ်။ ဒါကြောင့် ရဲစခန်းမှာ အမှုဖွင့်လိုက်တာပါ။” ဒါနဲ့ပတ်သက်ပြီး ပေါက်တောမြို့ ပညာရေးမှူးရုံးမှ ဒု-မြို့နယ်ပညာရေးမှူး ဦးမျိုးနိုင်က  “အဲ့ဒီကျောင်းက ဆရာမတွေ တင်ပြလာပါတယ်။ ဒီအချက်လက်တွေကို ပညာရေးမှူးဌာနတွေကို တင်ပြထားပြီးပါပြီ။ ပေါက်တောမြို့မရဲစခန်းကို အကြောင်းကြားထားပါတယ်။ ဆရာမတွေကိုတော့ အထွေထွေပညာရေးမှူးရဲ့ ညွှန်ကြားချက်အရ မြို့နယ်ပညာရေးမှူးရုံးမှာ တွဲဖက်တာဝန်ထမ်းဆောင်ဖို့ ယာယီခန့်ထားပါတယ်။ ဆရာမတွေအစား အမျိုးသားကျောင်းဆရာတွေကို ခန့်အပ်သွားဖို့ စီစဉ်နေကြပါတယ်” လို့ ပြောပါတယ်။ ပေါက်တောမြို့မ ရဲစခန်းမှူး ဦးဘစောက ဆက်သွယ်မေးမြန်းရာမှာ ဒီအမှုဟာ ကျူးကျော်ဝင်ရောက်မှုနဲ့ အကျုံးဝင်ကြောင်း၊ တိုင်ကြားခံရသူဟာ ထွက်ပြေးတိမ်းရှောင်နေတာကြောင့် စုံစမ်းရှာဖွေနေတယ်လို့ ပြောပါတယ်။ “မနေ့က ဆရာမတွေ ရဲစခန်းကို တိုင်ချက်ဖွင့်ဖို့ ရောက်လာပါတယ်။ ဖြစ်စဉ်တွေကို ပြောပါတယ်။ ဒီဖြစ်စဉ်နဲ့ပတ်သက်လို့ အကုန်လုံး ချုံလိုက်တဲ့အခါမှာ ညအချိန်မတော် ကျူးကျော်ဝင်ရောက်မှုနဲ့ပဲ အကျုံးဝင်ပါတယ်။ အခုကတော့ တရားခံက ထွက်ပြေးတိမ်းရှောင်နေတယ်။ သူရောက်နိုင်တဲ့ နေရာတွေကို၊ သူရှိနိုင်မယ့်နေရာတွေကို ဆက်စစ်ပြီးတော့ လိုက်စုံစမ်းဖမ်းဆီးသွားပါမယ်” လို့ ပြောပါတယ်။ ဆရာမတွေရဲ့ အခန်းကို ၀င်ဖို့ ကြိုးပမ်းသူဟာ အသက်၃၀ အရွယ် ကိုကျော်ဌေးဝင်းဆိုသူဖြစ်ကာ အခုလို နှောင့်ယှက်တာဟာ သုံးကြိမ်တိတိ ဖြစ်ပွားခဲ့တာဖြစ်ပြီး တကြိမ်တခါမှ အရေးမယူတာကြောင့် အခုလို တိုင်ကြားရတာလို့  မသဇင်မြတ်က ပြောပါတယ်။ သတင်း - ၀ဏ္ဏခွာညို